தீபாவளிக்கு சிம்னி கிளீன் பண்றீங்களா? இந்த 8 தப்பு பண்ணா மோசம்!

பண்டிகை காலம் தொடங்கிவிட்டாலே வீடுகளில் உற்சாகத்துடன் சுத்தம் செய்யும் வேலைகளும் ஆரம்பமாகிவிடும். வீடு முழுவதையும் ஒட்டடை அடித்து, ஜன்னல் திரைகள், சமையலறை அலமாரிகள் என ஒவ்வொன்றாகச் சுத்தம் செய்யத் தொடங்குவோம்.

சமையலறையில் எண்ணெயில் பொரிப்பது, வறுப்பது, தாளிப்பது என சமைக்கும்போது எழும் புகை மற்றும் எண்ணெய்த் துகள்களை வெளியேற்றுவதில் சிம்னி முக்கியப் பங்கு வகிக்கிறது. தினமும் நமக்காக வேலை செய்யும் சிம்னியையும் முறையாகப் பராமரிப்பது அவசியம். ஆனால், சுத்தம் செய்யும்போது தெரியாமல் செய்யும் சில தவறுகள் அதன் செயல்பாட்டையே பாதிக்கக்கூடும்.

எனவே, பண்டிகைக்காக சிம்னியைச் சுத்தம் செய்யும் முன், நாம் தவிர்க்க வேண்டிய 8 முக்கியமான தவறுகள் என்ன என்பதைத் தெரிந்துகொள்வோம்.

 1. ஃபில்டரை நீண்ட நாட்கள் சுத்தம் செய்யாமல் இருப்பது

சமையலில் இருந்து வெளியேறும் எண்ணெய்த் துகள்கள் முதலில் ஃபில்டரில்தான் படிகின்றன. குறிப்பாக அடிக்கடி பொரியல், வறுவல் செய்யும் வீடுகளில் ஃபில்டரில் எண்ணெய் பிசுக்கு விரைவாகத் தேங்கிவிடும். இதை நீண்ட நாட்கள் சுத்தம் செய்யாமல் விட்டால் காற்றை உறிஞ்சும் திறன் குறையலாம்.

எனவே, சிம்னியை எவ்வளவு அடிக்கடி பயன்படுத்துகிறோம் என்பதைப் பொறுத்து ஃபில்டரை அவ்வப்போது அகற்றி சுத்தம் செய்வது நல்லது.

2. அதிக வீரியம் கொண்ட ரசாயனங்களைப் பயன்படுத்துவது

அழுக்கு அதிகமாக இருக்கிறது என்பதற்காக வீரியம் அதிகம் கொண்ட ரசாயன கிளீனர்களைப் பயன்படுத்த வேண்டாம். அவை சிம்னியின் உலோகப் பரப்பை பாதிக்கக்கூடும். சில சமயங்களில் அதன் பளபளப்பும் குறையலாம்.

மென்மையான பாத்திரம் கழுவும் திரவத்தை வெதுவெதுப்பான நீரில் கலந்து பயன்படுத்தலாம். இருப்பினும், சிம்னியுடன் கொடுக்கப்பட்டுள்ள பராமரிப்பு வழிமுறைகளைப் பின்பற்றுவது பாதுகாப்பானது.

3. கடினமான ஸ்க்ரப்பரால் தேய்ப்பது

கெட்டியாகப் படிந்திருக்கும் எண்ணெயை அகற்றுவதற்காக ஸ்டீல் ஸ்க்ரப்பர் போன்றவற்றால் சிம்னியை அழுத்தித் தேய்ப்பதைத் தவிர்க்க வேண்டும். இதனால் அதன் மேற்பரப்பில் கீறல்கள் ஏற்படலாம்.

மென்மையான ஸ்பாஞ்ச் அல்லது மென்மையான பிரஷ் கொண்டு சுத்தம் செய்தால் போதுமானது. குறிப்பாக ஃபில்டரைச் சுத்தம் செய்யும்போது அதிக அழுத்தம் கொடுக்காமல் கவனமாகக் கையாள வேண்டும்.

4. மின் இணைப்பைத் துண்டிக்காமல் சுத்தம் செய்வது

சிம்னியைச் சுத்தம் செய்யும்போது மிகவும் முக்கியமாகக் கவனிக்க வேண்டியது மின் பாதுகாப்பு. மின் இணைப்பு இருக்கும் நிலையில் ஈரமான துணியைக்கொண்டு சுத்தம் செய்வது ஆபத்தானது.

எனவே, சுத்தம் செய்வதற்கு முன் சிம்னியின் மின் இணைப்பைத் துண்டித்துவிட்டு, அதன் பிறகே சுத்தம் செய்யத் தொடங்க வேண்டும். மின் மோட்டார் அல்லது வயரிங் பகுதிகளில் தண்ணீர் படாமல் பார்த்துக் கொள்வதும் அவசியம்.

5. சமைத்து முடித்த உடனேயே சுத்தம் செய்வது

சமைத்து முடித்தவுடன் சிம்னியைச் சுத்தம் செய்ய அவசரப்பட வேண்டாம். அதன் சில பகுதிகள் சூடாக இருக்கலாம். அவற்றைத் தொட்டால் காயம் ஏற்படும் வாய்ப்பும் உள்ளது.

சிம்னி நன்றாகக் குளிர்ந்த பிறகு சுத்தம் செய்வதே பாதுகாப்பானது. மேலும், சூடாக இருக்கும் எண்ணெய்ப் படிவத்தைச் சுத்தம் செய்வதும் சிரமமாக இருக்கும்.

6. சிம்னியின் உட்புறத்தைப் புறக்கணிப்பது

வெளிப்புறம் பளபளப்பாக இருந்தால் மட்டும் சிம்னி முழுமையாகச் சுத்தமாகிவிட்டது என்று நினைக்கக் கூடாது. ஃபில்டருக்குப் பின்னால் உள்ள பகுதிகளிலும் காலப்போக்கில் எண்ணெய்ப் பிசுக்கு படியலாம்.

ஆனால், சிம்னியின் உட்புறப் பகுதிகளை நாமாகவே கழற்றி சுத்தம் செய்வது எல்லா மாடல்களுக்கும் ஏற்றதாக இருக்காது. தயாரிப்பு நிறுவனத்தின் வழிமுறைகளைப் பார்த்து அதன்படி பராமரிக்க வேண்டும். தேவைப்பட்டால் நிபுணரின் உதவியை நாடலாம்.

7. சிம்னிக்குள் தண்ணீரை ஊற்றுவது

சிம்னிக்குள் தண்ணீரை நேரடியாக ஊற்றி சுத்தம் செய்வது கூடாது. தண்ணீர் மோட்டார், மின் வயர்கள் போன்ற பகுதிகளுக்குள் சென்றால் பழுது ஏற்படுவதுடன், மின் பாதுகாப்புக்கும் ஆபத்து ஏற்படலாம்.

சுத்தம் செய்யவேண்டிய வெளிப்புறப் பகுதிகளை நன்றாகப் பிழிந்த ஈரத்துணியால் துடைத்து, பின்னர் உலர்ந்த துணியால் துடைக்கலாம். தண்ணீர் எந்த நிலையிலும் மின் பாகங்களுக்குள் செல்லாமல் பார்த்துக்கொள்ள வேண்டும்.

8. எண்ணெய் சேகரிக்கும் தட்டைக் கவனிக்காமல் விடுவது

சில சிம்னிகளில் எண்ணெய் சேகரிப்பதற்காகத் தனியாக ஒரு சிறிய தட்டு இருக்கும். அதில் எண்ணெய் அதிகமாகத் தேங்கிவிட்டால், அது நிரம்பி வழிந்து மீண்டும் சிம்னியிலும் சமையலறை மேற்பரப்பிலும் எண்ணெய் படியக்கூடும்.

எனவே, அந்தத் தட்டையும் அவ்வப்போது அகற்றி, வெதுவெதுப்பான நீர் மற்றும் மென்மையான சோப்பைப் பயன்படுத்தி நன்றாகக் கழுவ வேண்டும். சுத்தம் செய்த பிறகு முழுமையாக உலர்த்திய பின்னரே மீண்டும் பொருத்த வேண்டும்.

சுத்தமான சிம்னி... சுகமான சமையலறை!

சிம்னியைச் சுத்தம் செய்வது என்பது அதன் வெளிப்புறத்தை மட்டும் துடைப்பது அல்ல. ஃபில்டர், எண்ணெய் சேகரிப்பான் உள்ளிட்ட பகுதிகளையும் சரியான இடைவெளியில் பராமரிக்க வேண்டும். அதே நேரத்தில், மின் பாதுகாப்பு விஷயங்களில் எந்தச் சமரசமும் செய்யக்கூடாது.

சுத்தம் செய்யும்போது அவசரப்படாமல், சிம்னி நிறுவனத்தின் பராமரிப்பு வழிமுறைகளைப் பின்பற்றினால், அதன் செயல்திறனைத் தொடர்ந்து பாதுகாக்க முடியும். சுத்தமான சிம்னி சமையலறையைப் புத்துணர்ச்சியாக வைத்திருப்பதோடு, தினசரி சமையல் பணியையும் சிரமமின்றி செய்ய உதவும்.

பண்டிகை கால டீப் கிளீனிங்கின்போது சமையலறை சிம்னியைப் பாழாக்கும் 8 முக்கியத் தவறுகள் என்னென்ன, அவற்றை எவ்வாறு தவிர்ப்பது என்பது குறித்த முழுமையான புரிதல்.