தூக்கி வீசும் வாழைப்பழத் தோலில் இவ்வளவு ரகசியமா? கொசுக்களை விரட்ட இனி காசு செலவு பண்ணாதீங்க!

கொசுக்கள் பார்க்க சிறியதாக இருந்தாலும், அவை ஏற்படுத்தும் தொல்லைகளும், அவை பரப்பும் நோய்களும் அளப்பரியவை. பணக்காரர், ஏழை என்ற பாகுபாடின்றி அனைத்து வீடுகளிலும் கொசுக்கள் தொல்லை கொடுப்பது இயல்பு. இவை வைரஸ் காய்ச்சல், டெங்கு, சிக்குன்குனியா போன்ற பல்வேறு நோய்களைப் பரப்பி மனித உயிர்களுக்கு அச்சுறுத்தலாக விளங்குகின்றன. எனவே, கொசுக்களை விரட்டுவது அவசியம். சந்தையில் கொசு விரட்டிகள் பல கிடைக்கின்றன. அவை வெளியிடும் நச்சுப் புகையினால் நமது உடல் நலத்திற்கும், சுற்றுச்சூழலுக்கும் தீங்கு ஏற்படுகிறது. ஆனால், வாழைப்பழத் தோலை வைத்து கொசுக்களை விரட்டலாம்.

வாழைப்பழம் சாப்பிட்ட பிறகு அதன் தோலை குப்பையில் வீசுகிறோம். ஆனால், அந்தத் தோலில் கொசுக்களை விரட்டும் சக்தி உள்ளது என்பது நம்மில் பலருக்குத் தெரியாது. ரசாயனப் பொருட்களைத் தவிர்த்து, இயற்கையான வழியில் கொசுக்களை விரட்ட விரும்பினால், வாழைப்பழத் தோல் ஒரு சிறந்த தீர்வாக அமையும். வாழைப்பழத் தோலை வெவ்வேறு வழிகளில் பயன்படுத்தி கொசுக்களை விரட்டலாம். அவற்றில் சிலவற்றை இங்கே பார்க்கலாம்.

உலர்ந்த வாழைப்பழத் தோல்:

வாழைப்பழத் தோலை வெயிலில் உலர்த்தி அல்லது குறைந்த வெப்பநிலையில் அடுப்பில் வைத்து உலர வைக்கவும். உலர்ந்த வாழைப்பழத் தோலை தூபக் கலவையுடன் சேர்த்து எரிக்கலாம். வாழைப்பழத் தோல் எரியும்போது வெளியாகும் புகை கொசுக்களை விரட்டும். இந்த புகை மனிதர்களுக்கு தீங்கு விளைவிக்காது. இது ஒரு இயற்கையான கொசு விரட்டியாக செயல்படுகிறது. 

வாழைப்பழத் தோல் பேஸ்ட்:

வாழைப்பழத் தோலை மிக்ஸியில் போட்டு நன்றாக அரைத்து மென்மையான பேஸ்ட் ஆக்கிக் கொள்ளவும். இந்த பேஸ்ட்டை வீட்டின் மூலை முடுக்குகளில், குறிப்பாக கொசுக்கள் அதிகம் வரும் இடங்களில் தடவவும். வாழைப்பழத் தோலின் வாசனை கொசுக்களை விரட்டும் தன்மை கொண்டது. இந்த வாசனை இருக்கும்வரை கொசுக்கள் வீட்டிற்குள் வருவதை தவிர்க்கலாம். இந்த முறை மிகவும் எளிமையானது மற்றும் செலவு குறைந்தது. ஆனால், வாழைப்பழத் தோல் பேஸ்ட்டை தடவுவதால் சில சமயங்களில் எறும்புகள் மற்றும் பிற பூச்சிகள் வர வாய்ப்புள்ளது. 

படுக்கையறை கொசு விரட்டி:

இரவு தூங்கச் செல்வதற்கு ஒரு மணி நேரத்திற்கு முன்பு, வாழைப்பழத் தோலை சிறிய துண்டுகளாக வெட்டி அறையின் நான்கு மூலைகளிலும் வைக்கவும். வாழைப்பழத் தோலின் வாசனை கொசுக்களை விரட்டி நிம்மதியான தூக்கத்திற்கு வழிவகுக்கும். இந்த முறை குழந்தைகளுக்கு மற்றும் சுவாசப் பிரச்சினைகள் உள்ளவர்களுக்கு மிகவும் பாதுகாப்பானது. 

வாழைப்பழத் தோல் கொசுக்களை விரட்டுவது மட்டுமல்லாமல், வேறு சில நன்மைகளையும் கொண்டுள்ளது. வாழைப்பழத் தோலில் பொட்டாசியம், மெக்னீசியம் மற்றும் ஆன்டிஆக்ஸிடன்ட்கள் நிறைந்துள்ளன. இவை சருமத்திற்கும், தோட்டத்திற்கும் நன்மை பயக்கும். வாழைப்பழத் தோலை உரமாகவும் பயன்படுத்தலாம். இதனால், இரசாயன உரங்களைத் தவிர்த்து இயற்கையான முறையில் செடிகளை வளர்க்கலாம்.

கொசுக்கள் ஏற்படுத்தும் தொல்லைகளையும், நோய்களையும் கட்டுப்படுத்த வாழைப்பழத் தோல் ஒரு சிறந்த இயற்கை தீர்வாக அமையும். ரசாயனப் பொருட்களைத் தவிர்த்து, இயற்கையான முறையில் கொசுக்களை விரட்ட விரும்பினால், வாழைப்பழத் தோலை பயன்படுத்திப் பாருங்கள். 

- கிரி கணபதி