இந்த தப்பை செஞ்சா உங்க இண்டக்‌ஷன் அடுப்பு அவ்ளோதான்... உஷார்!

சமையல் எரிவாயு சிலிண்டர்களின் விலை தாறுமாறாக உயர்ந்து கொண்டே செல்வதால் நடுத்தர மக்கள் மாற்று வழிகளைத் தேடுகிறார்கள். இதனால் மின்சாரத்தில் இயங்கும் நவீன சாதனங்களுக்குப் பலரும் மாறத் தொடங்கிவிட்டார்கள். இதில் மிக முக்கியமானது இண்டக்‌ஷன் அடுப்பு (Induction Stove). இது சமையல் வேலையை மிகவும் வேகமாக எளிதாக்கினாலும், இதனைச் சரியாகப் பராமரிக்காவிட்டால் பலத்த நஷ்டத்தை நாம் சந்திக்க நேரிடும்.

பொதுவாக இந்த மின்சாதனத்தின் மேல்பகுதி மிக நேர்த்தியான கண்ணாடியால் வடிவமைக்கப்பட்டிருக்கும். நாம் தினமும் செய்யும் சில சிறிய கவனக்குறைவான தவறுகளால் அந்தக் கண்ணாடி எளிதாக உடைந்து போக அதிக வாய்ப்புகள் உள்ளன. பலரும் சமைத்து முடித்த உடனேயே சூடாக இருக்கும்போதே அடுப்பைச் சுத்தம் செய்யும் பழக்கத்தைக் கொண்டுள்ளனர். இது முற்றிலும் தவறாது. அடுப்பு முழுமையாகக் குளிர்ந்த பின்னரே அதைச் சுத்தம் செய்யத் தொடங்க வேண்டும்.

சுத்தப்படுத்தும் முறை!

சூடாக இருக்கும் கண்ணாடியின் மீது குளிர்ந்த நீரை ஊற்றினால் அது உடனடியாகப் பிடிவாதமான கறைகளை உருவாக்கிவிடும். இந்தக் கறைகளைப் போக்குவது மிகவும் கடினம். அதுமட்டுமின்றி இது அடுப்பின் செயல்திறனைக் குறைத்து உங்களின் சமையல் நேரத்தையும் அதிகமாக்கும். அதனால் எப்போதும் ஹீட் இண்டிகேட்டர்  விளக்கு அணைந்துள்ளதா என்பதைச் சரிபார்த்துவிட்டு, பிளக்கை முழுமையாக அகற்றிய பின்னரே மெதுவாகத் துடைக்க ஆரம்பிக்க வேண்டும்.

சமைக்கும்போது பால் அல்லது குழம்பு கொட்டிவிட்டால் அது காய்ந்து கெட்டியாகும் வரை அப்படியே விடக் கூடாது. உடனடியாக ஒரு மென்மையான ஈரத்துணியை வைத்து அதைத் துடைத்துவிட வேண்டும். சர்க்கரை அல்லது காபி போன்ற பிசுபிசுப்பான பொருட்கள் கொட்டிவிட்டால், சம அளவு வினிகர், தண்ணீரை கலந்து ஸ்ப்ரே செய்து சரியாக 10 நிமிடங்கள் கழித்துத் துடைப்பது நல்ல பலனைத் தரும்.

தவிர்க்க வேண்டியவை! 

பாத்திரங்களைத் தேய்க்கப் பயன்படுத்தும் இரும்பு நார் அல்லது சொரசொரப்பான ஸ்க்ரப்பர் கொண்டு கண்ணாடியை ஒருபோதும் தேய்க்கக் கூடாது. இப்படிச் செய்தால் கண்ணாடியில் நிறைய கீறல்கள் விழுந்து நாளடைவில் அது மிகவும் பலவீனமாகிவிடும். மென்மையான ஸ்பாஞ், மைக்ரோஃபைபர் துணிகளைப் பயன்படுத்துவதே பாதுகாப்பான சிறந்த முறை. இது சாதனத்தின் வெளிப்புற அழகைக் காப்பதுடன் அதன் ஆயுளையும் வெகுவாக அதிகரிக்கும்.

கூடுதலாக இந்த அடுப்புகளில் பயன்படுத்தும் பாத்திரங்களின் எடையிலும் நாம் அதிக கவனம் செலுத்த வேண்டும். அனுமதிக்கப்பட்ட எடையை விட மிக அதிகமான எடைகொண்ட பாத்திரங்களை வைக்கும்போது அந்த அழுத்தம் தாங்காமல் கண்ணாடி எளிதில் விரிசல் விட்டு உடையும். தட்டையான, சரியான அளவுள்ள பாத்திரங்களை மட்டுமே சமைப்பதற்கு எப்போதும் கவனமாகப் பயன்படுத்தப் பழக வேண்டும். 

கண்ணாடியில் விரிசல் வந்தால்?

எப்போதாவது கண்ட்ரோல் சுவிட்சுகள் இருக்கும் இடத்தின் அருகிலோ அல்லது கண்ணாடியின் வேறு எந்தப் பகுதியிலோ சிறிய விரிசலைக் கண்டால் உடனே உஷாராகிவிட வேண்டும். விரிசல் விட்ட கண்ணாடியுடன் தொடர்ந்து சமைப்பது மிகவும் ஆபத்தானது. எப்போது வேண்டுமானாலும் எதிர்பாராத ஒரு பெரிய மின் விபத்து அல்லது ஷாக் அங்கு மிக எளிதாக நடந்துவிடக் கூடும். ஏதாவது திரவம் அந்த விரிசலுக்குள் சென்றால் பெரும் சேதம் உண்டாகும்.

இண்டக்ஷன் அடுப்பை பொறுத்தவரை நமது பாதுகாப்பிற்குத்தான் நாம் எப்போதுமே முதல் முன்னுரிமை கொடுக்க வேண்டும். எனவே உங்களது பழைய இண்டக்‌ஷன் அடுப்பு கண்ணாடியில் விரிசல் இருந்தால், அதை ரிப்பேர் செய்யாமல் உடனடியாக மாற்றிவிட்டுப் புதிய ஒன்றை வாங்குவதே புத்திசாலித்தனமான முடிவு.