புத்தாண்டுத் தீர்மானம் எடுத்துக் கொள்ளுங்கள்!

புத்தாண்டின் போது, புதிய ஆண்டில் ஒருவர் ஏதாவது ஒன்றைச் செய்வதாகவோ அல்லது கடைப்பிடிப்பதாகவோ உறுதி எடுத்துக் கொள்வதை, ‘புத்தாண்டுத் தீர்மானம்’ (New Year's Resolution) என்று சொல்கின்றனர்.

முன்பு, மேற்கு நாடுகளில் ஒரு மரபாக இருந்து வந்த இவ்வழக்கம், தற்காலத்தில் உலகின் அனைத்துப் பகுதிகளிலும் பரவி இருக்கிறது.

புத்தாண்டுத் தீர்மானங்கள் என்பது, பொதுவாக உறுதி எடுத்துக் கொள்பவர் தனது பழக்க வழக்கங்களையோ இயல்புகளையோ மேம்படுத்திக் கொள்வது, ஏதாவது நல்ல செயல்களில் ஈடுபடுவது போன்றவற்றோடு தொடர்புடையனவாகவே அமைகின்றன.

புத்தாண்டுத் தீர்மானங்களை எடுக்கும் வழக்கம் எப்போது தோன்றியது? என்பது குறித்த உறுதியான தகவல்கள் எதுவுமில்லை. இருப்பினும், பல ஆயிரம் ஆண்டுகளுக்கு முன்பே, பாபிலோனியாவில் தமது கடவுளுக்கு முன் இவ்வாறான உறுதிமொழிகளை எடுத்துக் கொள்ளும் வழக்கம் இருந்திருக்கிறது. அவர்களுடைய தீர்மானங்கள், இரவலாக வாங்கிய பொருட்களைத் திரும்பக் கொடுப்பது, வாங்கிய கடன்களைத் திருப்பிச் செலுத்துவது போன்றவைகளாக அமைந்திருந்தன.

ரோமர்கள், புத்தாண்டின் முதல் மாதமான ஜனவரிக்கு உரிய கடவுளான, ‘சானுசு’ என்னும் கடவுளுக்கு இது போன்ற உறுதிமொழிகளைக் கொடுத்திருக்கின்றனர்.

ஐரோப்பாவின் நடுக்காலத்தில், பிரபுக்கள் ஒவ்வொரு கிறிஸ்துமஸ் விழாவிற்குப் பின்னரும் பிரபுகளுக்கு உரிய நெறிமுறைகளின் படி நடப்பதாக உறுதி எடுத்துக் கொள்வது வழக்கமாக இருந்திருக்கிறது என்கிற தகவல்களை மட்டுமே நம்மால் அறிய முடிகிறது.

தற்கால புத்தாண்டுத் தீர்மானங்கள் சில:

1. உடல் நலத்துக்கு உகந்த உணவு வகைகளை உட்கொள்ளல், உடல் எடையைக் குறைத்தல், உடற்பயிற்சியில் ஈடுபடல், மதுப்பழக்கத்தைக் குறைத்தல், புகைபிடிப்பதை நிறுத்துதல் போன்ற உடல் நலம் பேணும் வழக்கங்கள்.

2. ஆக்க வழியில் சிந்தித்தல், கூடுதலாகச் சிரித்தல், வாழ்க்கையைச் சிறப்பாக அனுபவித்தல் என்பது போன்ற உள நலத்தை மேம்படுத்தல்

3. கடன்களில் இருந்து மீளுதல், சேமித்தல், சிறிய முதலீடுகளைச் செய்தல் போன்ற நிதி நிலைமையை மேம்படுத்தல்

4. தற்போதைய வேலையை மேலும் திறம்படச் செய்தல், மேம்பட்ட புதிய வேலையில் சேருதல், சொந்தமாகத் தொழில் தொடங்குதல் உள்ளிட்ட தொழில் மேம்பாடு

5. அதிக மதிப்பெண்கள் பெறுதல், புதிதாக ஏதாவது கற்றுக் கொள்ளல், அடிக்கடி படித்தல், நூல்கள் வாசித்தல், திறன்களை வளர்த்துக் கொள்ளல் என்பது போன்ற கல்வி மேம்பாடு

6. தன்னை ஒழுங்குபடுத்திக் கொள்ளல், நேர மேலாண்மை, கூடிய அளவு பிறரில் தங்கியிருப்பதைத் தவிர்த்தல், தொலைக்காட்சி பார்ப்பதைக் குறைத்தல் போன்ற தனிப்பட்ட மேம்பாடு

7. தேவையானவர்களுக்கு வேண்டியவற்றை ஈதல், சமூகத் தொண்டில் ஈடுபடல் போன்ற பிறருக்கு உதவுதல்

8. பிறருடன் சிறந்த முறையில் பழகுதல், சமுதாய அறிவாண்மையை மேம்படுத்துதல் உள்ளிட்ட சமுதாயத் திறன்களை வளர்த்துக் கொள்ளல்

9. புதிய நண்பர்களைப் பெற்றுக் கொள்ளல், குடும்பத்தினருடன் அதிக நேரம் செலவு செய்தல், சொந்த வாழ்க்கையை நிலைப்படுத்திக் கொள்ளல், புதிய பண்பாடுகளை அறிதல், கூடுதலாக இறைவனை வணங்குதல்

என்பது போன்று அவரவரவர் விருப்பங்களுக்கும் தேவைகளுக்குமேற்றபடி ‘புத்தாண்டுத் தீர்மானம்’ எடுத்துக் கொள்கின்றனர்.

10. ***(இது உங்கள் தீர்மானத்துக்கான இடம்)***

வருகிற 2025 ஆம் புத்தாண்டில் நீங்களும் உங்கள் தேவைக்கேற்ற, உங்கள் வாழ்வை வளப்படுத்தும் அல்லது நல்வழிப்படுத்தும் தீர்மானங்களை எடுத்துக் கொண்டு செயல்பட வேண்டும் என்று கேட்டுக் கொள்வதுடன் புத்தாண்டு வாழ்த்துகளையும் தெரிவித்துக் கொள்கிறேன்.