மழைக்கால மின்வெட்டுக்கு நோ சொல்லுங்க: இன்வெர்ட்டர் பேட்டரியை இப்படி பராமரியுங்க!

மழைக்காலம் தொடங்கிவிட்டாலே மின்வெட்டு எப்போது ஏற்படுமோ என்ற கவலை பலருக்கும் வந்துவிடும். குறிப்பாக, பலத்த காற்று, கனமழை, மின்கம்பிகளில் ஏற்படும் பழுதுகள் போன்ற காரணங்களால் மின்சாரம் தடைப்படலாம். அத்தகைய நேரங்களில் நமக்கு உதவுவது இன்வெர்ட்டரும் அதன் பேட்டரியும்தான்.

ஆனால், மின்வெட்டு ஏற்படும் நேரத்தில் இன்வெர்ட்டர் சரியாகச் செயல்படவில்லை என்றால் சிரமம்தான். எனவே, மழைக்காலம் தொடங்குவதற்கு முன்பே பேட்டரியைச் சரிபார்த்துப் பராமரிப்பது அவசியம். இன்வெர்ட்டர் பேட்டரியின் ஆயுளை அதிகரிக்கவும், எதிர்பாராத நேரத்தில் ஏற்படும் சிக்கல்களைத் தவிர்க்கவும் உதவும் ஐந்து முக்கியமானபேட்டரி பராமரிப்பு வழிகளை இக்கட்டுரையில் தெரிந்துகொள்வோம்.

பேட்டரியை ஈரப்பதத்திலிருந்து பாதுகாக்கவும்:

மழைக்காலத்தில் வீட்டின் சுவர்களில் ஈரப்பதம் ஏற்படுவது இயல்பு. ஆனால், இன்வெர்ட்டர் பேட்டரி வைக்கப்பட்டிருக்கும் இடத்தில் தண்ணீர் தேங்குவதோ, மழைநீர் தெறிப்பதோ கூடாது. பேட்டரியை உலர்ந்த, காற்றோட்டமுள்ள இடத்தில் வைக்கவேண்டும். கூரை ஒழுகும் இடங்கள், ஈரமான சுவர்களுக்கு அருகிலுள்ள பகுதிகள் ஆகியவற்றைத் தவிர்ப்பது நல்லது. பேட்டரியைச் சுற்றிக் காற்று செல்லும் வகையில் இடவசதி இருக்கவேண்டும்.

பேட்டரியின் இணைப்புகளைச் சரிபார்க்கவும்:

பேட்டரியின் முனையங்களில் துருப்பிடித்தல், வெள்ளை அல்லது பச்சை நிறப் படிவங்கள் தோன்றுதல், இணைப்புகள் தளர்வாக இருத்தல் போன்றவற்றைக் கவனிக்கவேண்டும். இவை மின்சாரப் பரிமாற்றத்தில் சிக்கலை ஏற்படுத்தலாம். இணைப்புகளைச் சுத்தம் செய்வதையும் இறுக்குவதையும் தகுதியான தொழில்நுட்ப வல்லுநரின் உதவியுடன் செய்வது பாதுகாப்பானது. பேட்டரியின் முனையங்களை ஈரமான கைகளால் தொடக்கூடாது.

பேட்டரியின் நீர்மட்டத்தைக் கவனிக்கவும்:

தண்ணீர் நிரப்ப வேண்டிய வசதியுள்ள லெட்-ஆசிட் பேட்டரிகளில், உற்பத்தியாளர் குறிப்பிட்டபடி நீர்மட்டத்தைச் சரிபார்க்க வேண்டும். தேவைப்பட்டால் காய்ச்சி வடிகட்டிய நீரை (Distilled Water) மட்டுமே பயன்படுத்த வேண்டும். சாதாரணக் குடிநீரையோ குழாய் நீரையோ ஊற்றக்கூடாது. சீல் செய்யப்பட்ட பேட்டரிகளைத் திறக்கவோ, அவற்றில் நீர் சேர்க்கவோ கூடாது. இந்தப் பராமரிப்பின்போது பாதுகாப்பு வழிமுறைகளைக் கண்டிப்பாகப் பின்பற்ற வேண்டும்.

பேட்டரியின் சார்ஜ் மற்றும் பேக்கப் நேரத்தைச் சோதிக்கவும்:

மின்சாரம் இருக்கும்போதே இன்வெர்ட்டர் சரியாகச் சார்ஜ் ஆகிறதா என்பதை உறுதிப்படுத்துங்கள். மின்வெட்டு ஏற்பட்டால் எவ்வளவு நேரம் மின்சாரம் கிடைக்கிறது என்பதையும் கவனியுங்கள். வழக்கத்தைவிடக் குறைவான பேக்கப் நேரம் கிடைத்தால் பேட்டரியின் நிலையைத் தொழில்நுட்ப வல்லுநரிடம் பரிசோதிக்க வேண்டும். நீண்ட நேரம் அதிகச் சுமை கொடுப்பதைத் தவிர்த்து, தேவையில்லாத சாதனங்களை இன்வெர்ட்டரில் இணைக்காமல் இருப்பதும் உதவும்.

வயர்களையும் பாதுகாப்பு வசதிகளையும் பரிசோதிக்கவும்:

மழைக்காலத்தில் ஈரமான தரை, சேதமடைந்த வயர்கள், தளர்வான மின் இணைப்புகள் ஆகியவை ஆபத்தை ஏற்படுத்தலாம். இன்வெர்ட்டர் வயர்களில் வெடிப்பு, உருகுதல் அல்லது எரிந்த வாசனை இருந்தால் உடனடியாகப் பயன்படுத்துவதை நிறுத்தி நிபுணரின் உதவியைப் பெறவேண்டும். பேட்டரியின் அருகில் தீப்பெட்டி, மெழுகுவர்த்தி போன்ற தீப்பற்றக்கூடிய பொருட்களை வைக்காதீர்கள். பேட்டரியிலிருந்து ஹைட்ரஜன் வாயு வெளியேறக்கூடும் என்பதால், அந்த இடத்தில் காற்றோட்டம் இருப்பது மிகவும் முக்கியம்.

மழைக்காலத்தில் நினைவில் வைத்துக் கொள்ள வேண்டிய கூடுதல் டிப்ஸ்;

பேட்டரியை ஓவர் லோடு செய்யாதீர்கள்:

மின் வெட்டு ஏற்படும்போது ஃபேன், விளக்கு போன்ற அத்தியாவசிய பொருட்களை மட்டும் பயன் படுத்துங்கள். மிக்ஸி, ஹீட்டர் போன்ற அதிக மின்சாரம் தேவைப்படும் சாதனங்களை இன்வெர்ட்டரில் இயக்குவதைத் தவிர்க்கவும்.

அடிக்கடி மின்வெட்டு ஏற்பட்டால் கவனியுங்கள்:

மின்சாரம் திரும்பத் திரும்ப தடைபட்டால் பேட்டரி முழுமையாகச் சார்ஜ் ஆகாமல் போகலாம். அவ்வப்போது பேட்டரியின் செயல்பாட்டை கண்காணிக்க வேண்டும்.

எச்சரிக்கை ஒலியை அலட்சியப்படுத்தாதீர்கள்:

இன்வெர்ட்டரில் தொடர்ந்து பீப் சத்தம் கேட்டாலோ , எச்சரிக்கை விளக்கு எரிந்தாலோ அதன் கையேட்டில் கூறியுள்ள வழிமுறைகளை பின்பற்றுங்கள்.

அவசர விளக்கை தயாராக வைத்திருங்கள்:

நீண்ட நேர மின்வெட்டு ஏற்பட்டால் உதவுவதற்காக டார்ச் லைட், சார்ஜ் செய்யப்பட்ட பவர் பேங்க் ஆகியவற்றைத் தயாராக வைத்திருப்பது நல்லது.

சர்வீஸை தள்ளிப் போடாதீர்கள்:

பேட்டரி வீங்குதல், கசிவு அல்லது அதிக வெப்பம் போன்ற அறிகுறிகள் தென்பட்டால் நீங்களாகவே பழுது பார்க்க முயற்சிக்காமல் நிபுணரை அணுகுங்கள்..

நம் வீட்டில் கவனிக்கவேண்டிய சில விஷயங்கள்:

வீட்டில் அநேகமாக அனைவரும் இன்வெர்ட்டர் வைத்திருக்கிறார்கள். மழைக்காலம் தொடங்கும்போதே அதன் பேட்டரியை ஒருமுறை சரிபார்த்தல் நல்லது. மின்வெட்டு வந்த பிறகுதான் பேட்டரியில் பிரச்னை இருப்பது தெரியவருகிறது என்று பலரும் சொல்வதுண்டு. அதற்கு பதிலாக, முன்கூட்டியே கவனம் செலுத்தினால் அவசர நேரத்தில் சிரமப்பட வேண்டியதில்லை அல்லவா?

குறிப்பாக வீட்டில் குழந்தைகள் மற்றும் வயதானவர்கள் இருந்தால், மின்வெட்டு நேரத்திலும் தேவையான விளக்குகள், மின் விசிறிகள் செயல்படுவது அவசியம். எனவே பேட்டரியின் பராமரிப்பைத் தள்ளிப் போடாமல் அவ்வப்போது அதன் செயல்பாட்டைச் சரிபார்ப்பதை வழக்கமாக்கிக்கொள்ள வேண்டும். சிறிய முன்னெச்சரிக்கை நமக்கு பெரிய நிம்மதியை தரும்.

மின்வெட்டு ஏற்படும் நேரத்தில் பதற்றப்படுவதைவிட, முன்கூட்டியே இன்வெர்ட்டர் பேட்டரியைப் பராமரிப்பதே புத்திசாலித்தனம். மேலே கூறிய எளிய வழிமுறைகளைப் பின்பற்றுவதன் மூலம் பேட்டரியின் செயல்திறனைப் பாதுகாத்து, மழைக்கால மின்வெட்டுச் சிரமங்களைக் குறைக்கலாம். சிறிய பராமரிப்பு, பெரிய பிரச்னைகளைத் தவிர்க்க உதவும் என்பதை நினைவில் கொள்வோம். பாதுகாப்பான பராமரிப்புடன் மழைக்காலத்தை நிம்மதியாக எதிர்கொள்வோம்!