நவராத்திரி கொண்டாட்டம்: வீடுகளில் கொலு வைப்பது ஏன்?

அன்னை சக்தியை வழிபடும் மிக முக்கியமான பண்டிகைகளில் ஒன்றான சாரதா நவராத்திரி, இந்த ஆண்டு அக்டோபர் 11ம் தேதி ஞாயிற்றுக்கிழமை தொடங்குகிறது. தொடர்ந்து ஒன்பது நாட்கள் நடைபெறும் இந்த விழா, அக்டோபர் 20ம் தேதி விஜயதசமியுடன் நிறைவடைகிறது. வீடுகளில் கொலு, கோயில்களில் சிறப்பு பூஜைகள், பக்திப் பாடல்கள் என எங்கும் ஆன்மிகச் சூழல் நிறையும்.

நவராத்திரி என்றாலே அன்னை பராசக்தியின் ஒன்பது வடிவங்களையும் நினைவுகூர்ந்து வழிபடும் நாட்கள் என்று பொருள். முதல் நாளில் சைலபுத்ரி, இரண்டாம் நாளில் பிரம்மச்சாரிணி, மூன்றாம் நாளில் சந்திரகண்டா, நான்காம் நாளில் கூஷ்மாண்டா, ஐந்தாம் நாளில் ஸ்கந்தமாதா, ஆறாம் நாளில் காத்யாயனி, ஏழாம் நாளில் காலராத்திரி, எட்டாம் நாளில் மகாகௌரி, ஒன்பதாம் நாளில் சித்திதாத்ரி என தேவியின் ஒன்பது வடிவங்கள் போற்றப்படுகின்றன.

நவராத்திரியின் தொடக்க நாளில் வீடுகளில் கலசம் வைத்து வழிபடுவது முக்கியமான சடங்காக கருதப்படுகிறது. கலசம் தெய்வீக சக்தியின் இருப்பிடமாகக் கருதப்படுகிறது. வீட்டை சுத்தம் செய்து, பூஜையறையில் விளக்கேற்றி, மலர்கள் மற்றும் நைவேத்தியம் படைத்து அம்மனை வழிபடுவது வழக்கம்.

தமிழகத்தில் நவராத்திரி என்றாலே கொலு நினைவுக்கு வரும். படிகளில் பொம்மைகளை அழகாக அடுக்கி வைத்து, தினமும் சுமங்கலிகள் மற்றும் பெண்களை வீட்டுக்கு அழைத்து வெற்றிலை, பாக்கு, மஞ்சள், குங்குமம் போன்ற மங்கலப் பொருட்களுடன் தாம்பூலம் வழங்குவது பாரம்பரியம். சிறுமிகளை அம்பாளின் அம்சமாகக் கருதி கன்னிப்பூஜை செய்வதும் பல குடும்பங்களில் கடைப்பிடிக்கப்படுகிறது.

அக்கம்பக்கத்தினர் மற்றும் உறவினர்களை அழைத்து சுண்டல், இனிப்பு போன்ற பிரசாதங்களைப் பகிர்வது உறவுகளை மேலும் நெருக்கமாக்குகிறது.

நவராத்திரியில் ஒவ்வொரு நாளும் ஒரு நல்ல எண்ணத்தை வளர்த்துக்கொள்ளலாம். கோபத்தை குறைத்தல், பிறருக்கு உதவுதல், பொய் பேசாமல் இருப்பது, தேவையற்ற பேச்சைத் தவிர்ப்பது, மனதை அமைதியாக வைத்திருப்பது போன்ற நல்ல பழக்கங்களை இந்த நாட்களில் கடைப்பிடிப்பது வழிபாட்டின் உண்மையான பலனைத்தரும்.

வீட்டில் தினமும் விளக்கேற்றி தேவியின் நாமத்தைச் சொல்லி, சிறிது நேரம் தியானம் செய்வதும் மன அமைதிக்கு துணையாக இருக்கும். குழந்தைகளுக்கு கொலு பொம்மைகளின் பின்னணியில் இருக்கும் புராணக்கதைகள், தேவியின் பல்வேறு வடிவங்கள், நவராத்திரி பாடல்கள் ஆகியவற்றைச் சொல்லிக் கொடுப்பதன் மூலம் நம் பண்பாட்டின் மீது அவர்களுக்கு ஆர்வம் உருவாகும்.

மேலும், இந்த நாட்களில் கோயில்களுக்குச் சென்று அன்னையை தரிசிப்பதும், இயன்றவர்களுக்கு உணவு வழங்குவதும், தானம் செய்வதும் பக்தியை செயலாக மாற்றும் நல்ல வழிகளாகும். அன்னையின் அருள் அனைவரது இல்லங்களிலும் ஆரோக்கியம், அமைதி, ஒற்றுமை, வளம் நிறையச் செய்யட்டும். ஒவ்வொரு நாளும் பக்தியுடன் கழிப்போம்; நன்மைகள் பெருகட்டும்.

நவராத்திரியின் இறுதி நாட்களில் சரஸ்வதி பூஜைக்கும் ஆயுத பூஜைக்கும் சிறப்பு முக்கியத்துவம் உண்டு. புத்தகங்கள், இசைக்கருவிகள், தொழில் கருவிகள் போன்றவற்றை வைத்து வழிபட்டு, அறிவையும் தொழிலையும் மதிக்கும் பண்பை அடுத்த தலைமுறைக்கு எடுத்துச்செல்கிறோம். விஜயதசமி நாளில் புதிய கல்வி அல்லது கலைப் பயிற்சியைத் தொடங்குவது சிறப்பானதாகக் கருதப்படுகிறது.

கொலுவில் வைக்கப்படும் பொம்மைகள் வெறும் அலங்காரப் பொருட்கள் அல்ல. அவை நம் கலை, ஆன்மிகம், பாரம்பரியம் ஆகியவற்றை அடுத்த தலைமுறைக்கு எடுத்துச் செல்லும் சிறிய தூதர்கள் . குறிப்பாக தஞ்சாவூர் தலையாட்டி பொம்மைக்கு கொலுவில் தனிச் சிறப்பு உண்டு.

19 ம் நூற்றாண்டில் சரபோஜி மன்னர் காலத்தில் உருவானதாகக் கூறப்படும் இப்பொம்மைகள், சாய்த்தாலும் மீண்டும் நிமிர்த்தும் வகையில் வடிவமைக்கப்பட்டுள்ளது. இதனால் வாழ்க்கையில் எத்தனை சோதனைகள் வந்தாலும் தன்னம்பிக்கையுடன் மீண்டும் எழ வேண்டும் என்ற அழகான கருத்தை உணர்த்துகின்றன.

அதேபோல கொலுவில் ஆன்மிகத் தலங்களையும் புராணக் கதைகளையும் நினைவுபடுத்தும் பொம்மைகளை வைப்பதும் சிறப்பு.. திருப்பதி பிரம்மோற்சவம், மதுரை மீனாட்சி சுந்தரேஸ்வரர், அர்த்த நாரீஸ்வரர், ஆண்டாள், நரசிம்மர், தசாவதாரம் போன்ற தெய்வீக வடிவங்களுடன் ஸ்ரீராமர் பட்டாபிஷேகம், கிருஷ்ணரின் லீலைகள் போன்ற புராணக் காட்சிகளையும் சிறிய பொம்மை செட்களாக அமைக்கலாம்.

இவ்வாறு ஒவ்வொரு பொம்மைக்குப் பின்னால் ஒரு கதை இருப்பதால் கொலுவைப் பார்க்க வரும் குழந்தைகளுக்கு அந்த கதைகளை எடுத்துச்சொல்லலாம். இதன் மூலம் நவராத்திரி என்பது வெறும் வழிபாட்டு விழாவாக மட்டும் அல்லாமல் நம் பண்பாட்டையும் கைவினைக் கலையையும் கற்றுக் கொடுக்கும் அழகான அனுபவமாக மாறுகிறது.

நவராத்திரி என்பது வெறும் பண்டிகை மட்டுமல்ல; பெண் சக்தியைப் போற்றும் ஆன்மிக விழா, குடும்பத்தினரை ஒன்றிணைக்கும் பாரம்பரியம், நம் கலாசாரத்தை குழந்தைகளுக்கு அறிமுகப்படுத்தும் அழகான வாய்ப்பு. இந்த ஒன்பது நாட்களிலும் மனதை இறைவழிபாட்டில் செலுத்தி, அன்பையும் நல்ல எண்ணங்களையும் வளர்ப்போம்.

இக்கட்டுரையை வாசிப்பதன் மூலம் நவராத்திரியின் சிறப்பையும் அதன் பாரம்பரியத்தையும் அறிந்து, அன்னையின் அருளுடன் இந்த விழாவை மகிழ்ச்சியாகக் கொண்டாடலாம்.