அசல் மஞ்சள் தூள் vs கலப்படம் மஞ்சள் தூள்: ஏமாறாமல் இருக்க இந்த 7 சோதனைகளைச் செய்யுங்கள்!

இந்திய சமையலறையில் மஞ்சள் தூள் மிக முக்கியமான இடத்தைப் பிடித்துள்ளது. இது வெறும் மசாலாப் பொருள் மட்டுமல்ல; இது தூய்மை மற்றும் பக்தியின் அடையாளமாக உள்ளது. தினசரி சமையல் முதல் புனித சடங்குகள் வரை, நம் வீடுகளில் பல நூற்றாண்டுகளாக மஞ்சள் பயன்படுத்தப்பட்டு வருகிறது. ஆனால், சந்தையில் விற்கப்படும் பல மஞ்சள் தூள்கள் தூய்மையானதாக இல்லை.

சில தயாரிப்புகளில் செயற்கை வண்ணங்கள், சுண்ணாம்பு தூள், ஸ்டார்ச் அல்லது மாவுப் பொருட்கள், மரத்தூள் அல்லது உமி தூள், லெட் குரோமேட் மற்றும் இரசாயன சாயங்கள் போன்றவை பயன்படுத்தப்படுகின்றன.

இந்தப் பொருட்கள் மஞ்சளின் பலன்களை குறைக்கின்றன. சில சமயங்களில், அவை பெரும் தீங்கையும் விளைவிக்கலாம்.

வீட்டிலேயே மஞ்சள் தூளின் தூய்மையைச் சோதிக்கும் எளிய வழிகள்:

கடைகளில் நீங்கள் வாங்கும் மஞ்சள் இயற்கையானதா அல்லது கலப்படமானதா என்பதை வீட்டிலேயே அடையாளம் காண முடியும்.

1. தூய்மையான மஞ்சள் எப்போது இயற்கையான மண் வாசனையைக் கொண்டிருக்கும். ஒரு சிட்டிகை மஞ்சள் தூளை எடுத்து கவனமாக முகர்ந்து பார்க்கவும். அதில் வெதுவெதுப்பான மண் வாசனை மற்றும் லேசான காரமான வாசனை இருந்தால், அது சுத்தமான மஞ்சள்தூள். கலப்படம் செய்யப்பட்ட மஞ்சள்தூளில் மிக வலுவற்ற வாசனை அல்லது இரசாயன வாசனை இருக்கும்.

2. ஒரு வெள்ளைத்தாளில் சிறிது மஞ்சளைத் தூவி இயற்கை வெளிச்சத்தில் அதன் நிறத்தைக் கவனிக்கவும். தூய்மையான மஞ்சள் ஆழமான தங்க-மஞ்சள் நிறம் மற்றும் சீரான இயற்கை தோற்றத்தைக் கொண்டிருக்கும். கலப்பட மஞ்சள் மிகவும் பளபளப்பான மஞ்சள் அல்லது ஆரஞ்சு நிறம் மற்றும் சீரற்ற துகள்களைக் கொண்டிருக்கும்.

3. ஒரு சிட்டிகை மஞ்சள் தூளை எடுத்து உள்ளங்கைகளுக்கு இடையே 15 விநாடிகள் தேய்க்கவும். அசல் மஞ்சள், அடர்த்தியான மஞ்சள் கறையை விட்டுச்செல்லும்; சருமத்தில் லேசாக ஒட்டிக்கொள்ளும். கலப்பட மஞ்சள் எளிதில் உதிரும்; மிகக் குறைந்த நிறத்தையே தரும்.

4. ஒரு பாத்திரத்தில் தண்ணீர் நிரப்பி ஒரு ஸ்பூன் மஞ்சள் தூள் சேர்க்கவும். கலக்காமல் 10 முதல் 15 நிமிடங்கள் வரை காத்திருக்கவும். தூய்மையான மஞ்சள் தூள் அடியில் மெதுவாகப் படியும்; தண்ணீர் லேசான மஞ்சளாக இருக்கும். கலப்பட மஞ்சள் தூள் மேலே மிதக்கும்; தண்ணீர் உடனடியாக அடர் மஞ்சள் நிறமாகும்.

5. மஞ்சள் தூளுடன் சிறிது தண்ணீர் சேர்த்து சில துளி எலுமிச்சை சாறு ஊற்றவும். தூய்மையான மஞ்சளில் எந்தவித எதிர்வினையும் இருக்காது. கலப்பட மஞ்சளில் குமிழிகள் அல்லது நுரை வரும்.

6. உலோகக்கரண்டியில் சிறிதளவு மஞ்சள் தூளை வைத்து தீயின் மேல் கவனமாகக் காட்டவும். தூய்மையான மஞ்சள் மெதுவாக எரியும்; லேசான மண் வாசனை தரும். கலப்பட மஞ்சள் படபடவென வெடிக்கும்; கருகிய சர்க்கரை வாசனை தரும்.

7. விரல்களுக்கு இடையில் மஞ்சள் தூளை வைத்துத் தேய்க்கவும். தூய்மையான மஞ்சள் மென்மையான மற்றும் மிருதுவான அமைப்பைக் கொண்டிருக்கும். கலப்பட மஞ்சள் சொரசொரப்பாக அல்லது மணல் போன்ற உணர்வைத் தரும்.

கடைகளில் மஞ்சள் தூள் வாங்கும் போது கவனிக்க வேண்டியவை:

• மஞ்சள் வாங்கும் போது எப்போதும் நம்பகமான பிராண்டுகளைத் தேர்ந்தெடுக்கவும்.

• முடிந்தவரை ஆர்கானிக் மஞ்சள் தூளைத் தேர்ந்தெடுக்கவும்.

• நறுமணம் மற்றும் நிறத்தைச் சரிபார்க்கவும்.

• மிக மலிவான தயாரிப்புகளைத் தவிர்க்கவும்.

• ஆய்வகப் பரிசோதனை செய்யப்பட்ட பிராண்டுகளைத் தேர்ந்தெடுக்கவும்.

மஞ்சள் பல நூற்றாண்டுகளாக இந்திய பாரம்பரியத்தின் ஒரு அத்தியாவசிய பகுதியாக இருந்து வருகிறது. அதே சமயம் கலப்படம் காரணமாக, அதைப் பயன்படுத்துவதற்கு முன்பு மஞ்சளின் தரத்தைச் சோதிப்பது அவசியமாகிறது. மேலே குறிப்பிட்ட சோதனைகள் மூலம் வீட்டிலேயே எளிதாக உங்கள் மஞ்சள் இயற்கையானதா அல்லது மாசுகள் கலந்ததா என்பதை  அடையாளம் காண முடியும்.

இந்தக் கட்டுரையை வாசிப்பதன் மூலம், உங்கள் சமையலறைக்குத் தேவையான தூய்மையான மற்றும் நச்சுத்தன்மையற்ற மஞ்சள் தூளைத் தாங்களே தரம் பிரித்துத் தேர்ந்தெடுக்கும் முழுமையான விழிப்புணர்வைப் பெறலாம்.