பெற்றோர், பிள்ளைகள் நடுவில் சிக்கிய நடுத்தர வயதினர்: கவனிக்க வேண்டிய ஆபத்துகள்!

முதுமைக்கும் இளமைக்கும் பாலமாக நின்று தங்களை இழந்துவரும் நடுத்தர வயதினரின் மறுபக்கம்.
சாண்ட்விச் தலைமுறை
சாண்ட்விச் தலைமுறைGemini image
பிருந்தா நடராஜன்

பிருந்தா நடராஜன், 1987-88-ல் ஆனந்த விகடன் மாணவ பத்திரிகையாளர் திட்டத்தில் தேர்வாகிப் பணியாற்றியவர். கட்டுரைகள், சிறுகதைகள், செய்திகள் என்று பல பிரிவுகளிலும் திறம்பட எழுதும் ஆற்றல் பெற்றவர்.கடந்த சில ஆண்டுகளாக கல்கி ஆன்லைனில் எழுதி வருகிறார்.

Updated on: 

ஒரு பக்கம் வயதான பெற்றோரின் உடல்நலமும் பாதுகாப்பும்... மறுபக்கம் வளர்ந்த பிள்ளைகளின் வேலை, திருமணம், எதிர்காலம் என ஓய்வில்லாத பொறுப்புகள்! இவை இரண்டுக்கும் நடுவில் தங்களுடைய ஆசைகளையும் தேவைகளையும் ஒதுக்கிவிட்டு ஓடிக்கொண்டிருக்கும் ஒரு தலைமுறை இருக்கிறது. அவர்கள் எதிர்கொள்ளும் சவால்கள் என்ன? அவர்களின் மனதில் புதைந்திருக்கும் கவலைகள் எத்தகையவை? அதைப் பற்றித்தான் இக்கட்டுரை அலசுகிறது.

வாழ்க்கையின் ஒவ்வொரு கட்டத்திலும் ஒவ்வொரு விதமான பொறுப்புகள் காத்திருக்கின்றன. இளமையில் தங்களுடைய எதிர்காலத்திற்காக உழைப்பவர்கள், நடுத்தர வயதை எட்டும்போது குடும்பத்தின் இரு தலைமுறைகளுக்கும் ஆதரவாக இருக்கவேண்டிய சூழலுக்குத் தள்ளப்படுகிறார்கள்.

இவர்களைத்தான் இன்றைய சமூகத்தில் 'சாண்ட்விச் தலைமுறை' (Sandwich Generation) என்று குறிப்பிடுகிறார்கள். இரண்டு தலைமுறைகளின் தேவைகளுக்கு இடையில் சிக்கிக்கொள்ளும் இவர்களின் வாழ்க்கை வெளியில் பார்ப்பதற்கு இயல்பாகத் தெரிந்தாலும், உள்ளுக்குள் பல போராட்டங்களைக் கொண்டது.

பொதுவாக 40 முதல் 60 வயதுக்குள் இருப்பவர்கள் இந்தச் சூழலை அதிகம் எதிர்கொள்கிறார்கள். வயதான பெற்றோருக்கு மருத்துவப் பரிசோதனை, மருந்துகள், மருத்துவமனைப் பயணம், அன்றாடப் பராமரிப்பு எனப் பல தேவைகள் இருக்கும். அதே நேரத்தில், வளர்ந்த பிள்ளைகளின் கல்வி, வேலைவாய்ப்பு, திருமணம், வீடு வாங்குதல் போன்ற பொறுப்புகளும் இவர்களைச் சுற்றியே இருக்கும்.

இரண்டு தலைமுறைகளுக்கும் இடையில் பாலமாகச் செயல்படும் இவர்கள், பல நேரங்களில் தங்களுடைய உடல்நலத்தையும் மனநலத்தையும் கவனிக்க மறந்துவிடுகிறார்கள். பெற்றோருக்கு உதவுவதற்காகச் செலவிடும் பணம் ஒருபுறம்; பிள்ளைகளின் தேவைகளுக்காகச் செய்யும் செலவுகள் மறுபுறம். இதனால் சேமிப்பு, ஓய்வுக்காலத் திட்டமிடல், தனிப்பட்ட ஆசைகள் என அனைத்தும் பின்னுக்குத் தள்ளப்படுகின்றன.

சாண்ட்விச் தலைமுறை
சாண்ட்விச் தலைமுறைGemini image

வேலைக்குச் செல்பவர்களுக்கு இந்தச் சுமை இன்னும் அதிகம். அலுவலகப் பொறுப்புகளுக்கு இடையே பெற்றோரின் மருத்துவத் தேவைகளைக் கவனிப்பது, பிள்ளைகளின் பிரச்னைகளுக்குத் தீர்வு காண்பது என நேரம் போதாமல் தவிக்கிறார்கள். சிலருக்கு வெளிநாட்டில் அல்லது வேறு நகரங்களில் வசிக்கும் பிள்ளைகளின் தேவைகளையும் தொலைவிலிருந்தே கவனிக்க வேண்டியிருக்கிறது.

இதில் உணர்வுப்பூர்வமான சிக்கல்களும் உள்ளன. பெற்றோருக்கு தங்களைக் கவனிக்கப் பிள்ளைகள் நேரம் ஒதுக்கவில்லை என்ற வருத்தம் ஏற்படலாம். வளர்ந்த பிள்ளைகளோ தங்களுடைய வாழ்க்கையில் பெற்றோர் அதிகமாகத் தலையிடுவதாக நினைக்கலாம். இதனால் நடுத்தர வயதினர் இரு தரப்பினரிடமும் சமநிலையைப் பேண வேண்டிய கட்டாயம் ஏற்படுகிறது.

இதற்கான தீர்வுகள் என்ன?

பெற்றோரின் பராமரிப்பை ஒரு நபர் மட்டுமே ஏற்றுக்கொள்ளாமல், உடன்பிறந்தவர்கள் பொறுப்புகளைப் பகிர்ந்துகொள்ள வேண்டும். பிள்ளைகளும் வயதுக்கு வந்த பிறகு தங்களுடைய தேவைகளைத் தாங்களே நிர்வகிக்கப் பழக வேண்டும். குடும்பத்தில் வெளிப்படையான உரையாடல், மருத்துவக் காப்பீடு, அவசரகால நிதி, ஓய்வுக்காலச் சேமிப்பு போன்ற திட்டமிடல்கள் இந்தச் சுமையைக் குறைக்க உதவும். தேவையானபோது வெளிப்புறப் பராமரிப்பு உதவியையும் நாடலாம்.

சொந்த வாழ்க்கைக்கும் நேரம் ஒதுக்க வேண்டாமா?

இந்த பொறுப்புகளுக்கு நடுவே நடுத்தர வயதினர் தங்களுடைய வாழ்க்கையையும் மறந்து விடக்கூடாது. நண்பர்களுடன் பேசுவது, விருப்பமான பொழுது போக்குகளில் ஈடுபடுவது, நடைப்பயிற்சி செய்வது, அவ்வப்போது வெளியிடங்களுக்குச் சென்று வருவது போன்றவை மனதுக்கு உற்சாகம் அளிக்கும்.

இதையும் படியுங்கள்:
பிள்ளைகள் முதலீடா, மனிதர்களா? பெற்றோர் செய்யக்கூடாத மாபெரும் தவறு!
சாண்ட்விச் தலைமுறை

பெற்றோரின் உடல் நலப் பிரச்னைகளைக் கவனிக்கும் போது அவர்களுடைய தனிமையையும் புரிந்து கொள்ள வேண்டும். அதேபோல பிள்ளைகளும் பெற்றோரின் வயதையும் உடல் சோர்வையும் புரிந்துகொண்டு உதவ முன் வர வேண்டும். முதியோர் பராமரிப்பு என்பது பெண்களின் பொறுப்பு மட்டுமே என்ற எண்ணமும் மாற வேண்டும்.. கணவன் மனைவி இருவரும் இணைந்து பொறுப்புகளைப் பகிர்ந்துகொள்வது அவசியம்.

குடும்பத்தில் ஒருவர் சோர்வடைந்தால் மற்றவர்கள் அவருக்குத் துணையாக இருக்க வேண்டும். ஏனெனில் பராமரிப்பவர்களுக்கும் சில நேரங்களில் கவனம் செலுத்துவது தேவைப்படுகிறது.

அன்பு என்பது கடமைகளைச் சுமத்துவது மட்டும் அல்ல.. ஒருவருக்கொருவர் ஆதரவாக இருப்பதும் தான்.

குடும்ப உறுப்பினர்கள் மாதம் ஒரு முறையாவது ஒன்றாக அமர்ந்து தங்களுடைய தேவைகள், பிரச்சினைகள், எதிர்பார்ப்புகள் குறித்து மனம் விட்டு பேசவேண்டும். சில குடும்பங்களில் சாப்பிடும் நேரம் அனைவரும் உட்கார்ந்து சாப்பிடுவதும் முக்கியமான பகிர்ந்து கொள்ள வேண்டிய பிரச்சனைகளை பகிர்ந்துகொள்வதும் வழக்கமாக இருக்கிறது. அப்போதுதான் தவறான புரிதல்கள் நீங்கி, பொறுப்புகள் சுமையாக இல்லாமல் பகிர்ந்து கொள்ளும் நல்ல விஷயமாக மாறும்.

இதையும் படியுங்கள்:
பெற்றோரின் அந்த ஒரு வார்த்தை… பல ஆண்டுகள் கழித்தும் மனதில் ரணமாய் வலிப்பது ஏன்?
சாண்ட்விச் தலைமுறை

பெற்றோரைக் கவனிப்பதும் பிள்ளைகளுக்கு வழிகாட்டுவதும் அன்பின் வெளிப்பாடுதான். ஆனால் அந்த அன்புக்காக ஒருவர் தன்னையே முற்றிலும் இழந்துவிடக் கூடாது.

இரண்டு தலைமுறைகளின் நலனையும் காப்பதுடன், தங்களுடைய ஆரோக்கியத்தையும் மகிழ்ச்சியையும் பாதுகாத்துக் கொள்வதே நடுத்தர வயதினரின் வாழ்க்கையை அர்த்தமுள்ளதாக மாற்றும். அவர்களுக்கும் அன்பும் ஆதரவும் ஓய்வும் தேவை என்பதை குடும்பத்தினர் உணர வேண்டும்!

இக்கட்டுரையை வாசிப்பதன் மூலம் நடுத்தர வயதினர் தங்கள் வாழ்க்கையில் ஆரோக்கியம், குடும்பம், பொருளாதாரம், மனநிம்மதி ஆகியவற்றுக்கு எவ்வாறு முக்கியத்துவம் கொடுத்து வாழவேண்டும் என்பதைத் தெரிந்துகொள்ளலாம். வாழ்க்கையின் அடுத்த கட்டத்தை நம்பிக்கையுடனும் மகிழ்ச்சியுடனும் அமைத்துக்கொள்ள சில பயனுள்ள வழிகளையும் அறிந்துகொள்ளலாம்!

இதனை வாசிக்கும் வாசகர்கள், தங்களின் அன்றாடத் தியாகங்களுக்கு ஆழமான அங்கீகாரத்தையும், குடும்பத்தில் சமநிலையைப் பேண நடைமுறைக்கு உகந்த வழிகளையும் பெறுவதுடன், தங்களுடைய உடல் மற்றும் மனநலத்திற்கு முன்னுரிமை அளிக்க வேண்டியதன் அவசியத்தையும் உணர்ந்து தெளிவு பெறுவார்கள்.