வாஷிங் மெஷினில் பிளாங்கெட்டை 'ஹக்' முறையில் வைத்தால் என்ன ஆகும்? துவைக்கும் சீக்ரெட் டிப்ஸ்!

முன்பெல்லாம் நம் வீடுகளில் ஈரோடு பெட்ஷீட், சென்னிமலை பெட்ஷீட் என்று விதவிதமான கலர் கலரான பெட்ஷீட்களைப் படுக்கையில் உபயோகித்துக் கொண்டிருந்தோம். ஆனால், இப்பொழுது நவீன காலத்திற்கு தகுந்த மாதிரி குவில்ட் மற்றும் கம்போர்ட்டர்ஸ் எனப்படும் சற்று தடிமனான போர்வைகளைத்தான் உபயோகித்துக் கொள்கிறோம். அது குளிருக்கு கதகதப்பாக இருந்தாலுமே, அதைத் துவைக்கும்போது ஏற்படும் பிரச்சனைகள் பல. அதைப் பற்றி இந்தப் பதிவில் பார்க்கலாம்.

படுக்கையில் போர்த்திக்கொள்ளும் பிளாங்கெட் என்றாலே கதகதப்பும் சுகமும்தான் நினைவுக்கு வரும். ஆனால், அதை வாஷிங் மெஷினில் துவைத்த பிறகு, உள்ளே இருக்கும் பஞ்சு ஆங்காங்கே திரண்டு கட்டியாகி, பிளாங்கெட்டின் வடிவமே மாறிவிட்டால்?

“இனிமேல் பிளாங்கெட்டை மெஷினில் துவைக்கவே கூடாது!” என்று முடிவு செய்துவிட வேண்டாம். அதைத் துவைக்கும் முறையில்தான் சிறிய மாற்றம் தேவை.

இங்கு குறிப்பிடப்படும் தடிமனான பிளாங்கெட் (Comforter) வகையை வாஷிங் மெஷினில் துவைக்கும்போது, சில அடிப்படை விஷயங்களை மட்டும் கவனித்தாலே கட்டிகள் ஏற்படுவதை வெகுவாகக் குறைக்கலாம்.

முதலில் மெஷினின் அளவைப் பாருங்கள்!

பெரிய அளவிலான பிளாங்கெட்டை சிறிய வாஷிங் மெஷினுக்குள் திணித்து துவைப்பது மிகப்பெரிய தவறு. டிரம் முழுவதும் பிளாங்கெட் அடைத்துக்கொண்டால், தண்ணீரும் டிடர்ஜென்ட்டும் அதன் எல்லாப் பகுதிகளுக்கும் சரியாகச் செல்லாது.

இதனால் பிளாங்கெட் முறையாகச் சுத்தமாகாமல் போகலாம். மேலும், உள்ளே இருக்கும் பஞ்சு அல்லது நிரப்புப் பொருள் ஒரே இடத்தில் திரண்டு கட்டிகளாகிவிடும் வாய்ப்பும் அதிகம். துணி கிழிவது, தேய்வது போன்ற பிரச்னைகளும் ஏற்படலாம்.

எனவே, பிளாங்கெட் மெஷினுக்குள் சுதந்திரமாகச் சுழலக்கூடிய அளவுக்கு இடம் இருக்க வேண்டும். உங்கள் மெஷினில் அது சரியாகப் பொருந்தவில்லை என்றால், பெரிய கொள்ளளவு கொண்ட வாஷிங் மெஷின் அல்லது லாண்ட்ரி சென்டரைப் பயன்படுத்துவது நல்லது.

‘ஹக்’ முறையில் பிளாங்கெட்டை வையுங்கள்!

பிளாங்கெட்டை அப்படியே சுருட்டி மெஷினுக்குள் போடுவதற்குப் பதிலாக, முதலில் அதை நீளவாக்கில் மூன்று பகுதிகளாக மடித்துக்கொள்ளுங்கள்.

பிறகு அதை மெதுவாகச் சுருட்டி, வாஷிங் மெஷின் டிரம்மின் உள்பகுதியை அணைத்துக்கொள்வது போல வையுங்கள்.

இந்த முறை பிளாங்கெட் ஒரே இடத்தில் குவிந்து கிடப்பதைத் தவிர்க்க உதவும். தண்ணீரும் டிடர்ஜென்ட்டும் சீராகச் செல்லும். சுழலும் நேரத்தில் மெஷினின் சமநிலையும் சிறப்பாக இருக்கும்.

சரியான வாஷ் சைக்கிளைத் தேர்வு செய்யுங்கள்!

பிளாங்கெட்டைத் துவைக்கும்போது அதிக வெப்பமான தண்ணீரைப் பயன்படுத்துவதைத் தவிர்ப்பது நல்லது. பொதுவாகக் குளிர்ந்த அல்லது இளஞ்சூடான தண்ணீர் பயன்படுத்தலாம்.

உங்கள் வாஷிங் மெஷினில் ‘Bedding’, ‘Bulky’ போன்ற சைக்கிள்கள் இருந்தால், அவற்றைப் பயன்படுத்துங்கள். உங்கள் பிளாங்கெட்டில் இருக்கும் பராமரிப்பு லேபிளில் குறிப்பிடப்பட்டுள்ள வழிமுறைகளையும் கட்டாயம் பின்பற்றுங்கள்.

டிடர்ஜென்ட் அதிகமாகப் போடாதீர்கள்!

“சோப்பு அதிகமாகப் போட்டால் துணி இன்னும் நன்றாகச் சுத்தமாகும்” என்று நினைப்பது இயல்பு. ஆனால், பிளாங்கெட்டைத் துவைக்கும்போது இது சரியான அணுகுமுறை அல்ல.

அதிகப்படியான டிடர்ஜென்ட் பிளாங்கெட்டின் உள்ளே தங்கி, பஞ்சு அல்லது இறகுகள் ஒன்றோடு ஒன்று சேர்ந்து கட்டியாகக் காரணமாகலாம்.

எனவே, டிடர்ஜென்ட் பாட்டிலில் குறிப்பிடப்பட்டுள்ள அளவையே பயன்படுத்துங்கள். துவைத்த பிறகு Extra Rinse வசதி இருந்தால், அதையும் பயன்படுத்தலாம். இது சோப்பு எச்சங்கள் வெளியேற உதவும்.

உலர்த்தும்போதுதான் இன்னும் அதிக கவனம்!

பிளாங்கெட்டை டிரையரில் போட்டுவிட்டு அப்படியே மறந்துவிடக் கூடாது.

சுமார் 30 நிமிடங்களுக்கு ஒருமுறை டிரையரை நிறுத்தி, பிளாங்கெட்டை வெளியே எடுத்து நன்றாக உதறுங்கள். உள்ளே இருக்கும் பஞ்சு அல்லது நிரப்புப் பொருள் சீராகப் பரவியிருக்கிறதா என்பதையும் பார்த்துவிட்டு மீண்டும் டிரையரில் போடுங்கள்.

குறைந்த வெப்பத்தில் உலர்த்துவது பொதுவாகப் பாதுகாப்பானது. அதிக வெப்பம் பிளாங்கெட்டின் துணி அல்லது உள்ளிருக்கும் நிரப்புப் பொருளைப் பாதிக்கக் கூடும்.

மிக முக்கியமான விஷயம்: பிளாங்கெட் முழுமையாக உலர்ந்திருக்க வேண்டும். உள்ளே ஈரப்பதம் தங்கிவிட்டால், துர்நாற்றம், பூஞ்சை போன்ற பிரச்சனைகள் ஏற்படலாம்.

அடிக்கடி துவைப்பதும் நல்லதல்ல!

பிளாங்கெட்டை அடிக்கடி துவைத்தால்தான் அது சுத்தமாக இருக்கும் என்று நினைக்க வேண்டாம்.

குறிப்பாக பஞ்சு அல்லது இறகு நிரப்பப்பட்ட பிளாங்கெட்களைத் தேவையில்லாமல் அடிக்கடி துவைப்பது, அதன் உள்ளிருக்கும் நிரப்புப் பொருளையும் நார்களையும் பாதிக்கக்கூடும்.

பிளாங்கெட்டின் மேல் Duvet Cover பயன்படுத்தினால், பிளாங்கெட்டை அடிக்கடி துவைக்க வேண்டிய அவசியம் குறையும். கறைகள் ஏற்பட்டால், முழு பிளாங்கெட்டையும் துவைப்பதற்குப் பதிலாக முதலில் அந்தப் பகுதியை மட்டும் சுத்தம் செய்வதும் உதவும்.

மாதம் ஒருமுறை வெயிலில் உலர்த்துங்கள்!

பயன்படுத்தும் சூழ்நிலைக்கு ஏற்ப, பிளாங்கெட்டை மாதம் ஒருமுறை வெளிக்காற்றிலும் மிதமான வெயிலிலும் வைத்து நன்றாகக் காற்றோட்டம் செய்வது புத்துணர்ச்சியாக வைத்திருக்க உதவும். ஆனால், நேரடிக் கடும் வெயிலில் நீண்ட நேரம் வைப்பதற்கு முன் அதன் பராமரிப்பு வழிமுறைகளைப் பார்த்துக்கொள்ளுங்கள்.

பிளாங்கெட் துவைக்கும் ‘சூப்பர்’ குறிப்புகள்!

மெஷின் கொள்ளளவுக்கு ஏற்ற பிளாங்கெட்டையே துவைக்கவும்.

பிளாங்கெட்டை மூன்று பகுதிகளாக மடித்து, ‘ஹக்’ முறையில் டிரம்மில் வைக்கவும்.

குளிர்ந்த அல்லது இளஞ்சூடான தண்ணீரைப் பயன்படுத்தவும்.

மிதமான டிடர்ஜென்ட்டை அளவோடு பயன்படுத்தவும்.

Extra Rinse வசதி இருந்தால் பயன்படுத்தவும்.

உலர்த்தும்போது 20–30 நிமிடங்களுக்கு ஒருமுறை பிளாங்கெட்டை உதறவும்.

குறைந்த வெப்பத்தில் உலர்த்தவும்.

பயன்படுத்துவதற்கு அல்லது மடித்து வைப்பதற்கு முன் முழுமையாக உலர்ந்திருக்கிறதா என்பதை உறுதி செய்யவும்.

தேவையில்லாமல் அடிக்கடி துவைக்காதீர்கள்.

ஒரு பிளாங்கெட்டை முறையாகத் துவைத்து, சரியாக உலர்த்துவதற்கு அதிக சிரமம் தேவையில்லை. ஆனால், மெஷினின் சரியான அளவு, குறைந்த அளவு டிடர்ஜென்ட், சரியான வாஷ் சைக்கிள், முழுமையான உலர்த்தல்—இந்த நான்கு விஷயங்களைக் கவனித்தாலே, பிளாங்கெட் நீண்ட நாட்களுக்கு மென்மையாகவும் பஞ்சுபோன்ற தன்மையுடனும் இருக்கும்!

அடிக்கடி அதிக பணத்தைச் செலவழித்து டிரை கிளீனிங் கொடுக்க வேண்டிய அவசியமின்றி, வீட்டிலேயே மிக எளிதாகவும் பாதுகாப்பாகவும் பிளாங்கெட்களைப் புதுப்பொலிவுடன் பராமரிக்க முடியும்.