15 நிமிடம் போதும்: உங்கள் வாழ்க்கையை ஒரு சுவாரஸ்யமான நாள் ஆக்கலாம்!

நாம் தினமும் மணிக்கணக்கில் மொபைல் திரையை வெறித்துப் பார்த்துக்கொண்டு நேரத்தை வீணாக்குகிறோம். சலிப்பான அந்த வாழ்க்கையிலிருந்து வெளியே வருவது ஒன்றும் அவ்வளவு கடினமான விஷயம் அல்ல. வெறும் 15 நிமிடங்கள் ஒதுக்கினால் போதும், ஒவ்வொரு நாளையும் ஒரு சுவாரஸ்யமான நாள் ஆக மாற்றிவிடலாம். இதற்காகப் பெரிய அளவில் திட்டமிடவோ பணத்தைச் செலவழிக்கவோ தேவையில்லை. சின்னச் சின்னச் செயல்களே மனதளவில் பெரிய மாற்றத்தைக் கொடுக்கும்.

மூன்று முக்கிய விதிகள்!

இந்த பதினைந்து நிமிடங்களைச் செலவிட மூன்று அடிப்படையான விஷயங்களை மனதில் கொள்ள வேண்டும். முதலாவது தனித்துவம், இரண்டாவது சற்று அசௌகரியமான உணர்வு, மூன்றாவது எதிர்பாராத செயல். அதாவது, இதுவரை நீங்கள் செய்யாத, உங்களுக்குச் சிரமமாகத் தோன்றும், முன்னதாகத் திட்டமிடாத ஒரு புதிய விஷயத்தை இந்த நேரத்தில் செய்ய வேண்டும்.

உங்கள் தினசரி வேலைகள் எதுவாக இருந்தாலும், அதில் இந்தப் பதினைந்து நிமிடங்களை மட்டும் கொஞ்சம் வித்தியாசமாகப் பயன்படுத்துங்கள். நீங்கள் வழக்கமாகச் செல்லாத ஒரு புதிய தெருவில் நடந்து செல்வது, அமைதியான பூங்காவில் அமர்ந்து புத்தகம் படிப்பது, ஒரு புதிய ஸ்கில் கற்றுக்கொள்வது, நீண்ட நாட்களாகப் பேசாத நண்பரிடம் பேசுவது என எதுவாக வேண்டுமானாலும் இருக்கலாம்.

சின்ன செயல்களில் பெரிய மாற்றம்!

உடற்பயிற்சி செய்ய நேரம் இல்லை என்று சொல்பவர்கள், இந்தப் பதினைந்து நிமிடங்களில் அதிகபட்சம் எத்தனை புஷ்-அப்ஸ் எடுக்க முடியும் என்று தங்களுக்குத் தாங்களே ஒரு சவால் வைத்துக்கொள்ளலாம். முதல் வாரம் 60 எடுத்தால், அடுத்த வாரம் 70, அதற்கடுத்து 100 என உங்கள் இலக்கை உயர்த்திக்கொண்டே போகலாம். அதேபோல, புல்வெளியில் வெறுங்காலுடன் நடப்பது, புதிய உணவு வகையைச் சமைக்க முயற்சிப்பது, அறையைச் சுத்தம் செய்வது போன்ற எளிய விஷயங்கள்கூட மனதிற்குப் பெரிய புத்துணர்ச்சியைத் தரும்.

பயங்களை உடைத்தெறியும் வழிகள்!

இந்த முயற்சியில் ஆரம்பத்தில் ஒருவிதத் தயக்கம் இருப்பது இயல்புதான். எனக்கும் வீட்டிற்கு நண்பர்களை அழைத்துப் பேசுவது மிகவும் தயக்கமான ஒரு விஷயமாக இருந்தது. அந்த அசௌகரியத்தை உடைக்க வேண்டும் என்பதற்காகவே, அதை ஒரு சவாலாக ஏற்றுக்கொண்டு வீட்டிற்கு நண்பர்களை அழைத்தேன்.

அதேபோல, வீடியோக்களை உருவாக்கி இணையத்தில் பதிவேற்ற வேண்டும் என்ற ஆசை இருந்தாலும், முகம் காட்டப் பயந்து தள்ளிப்போட்டுக்கொண்டே இருந்தேன். பிறகு இந்தப் பதினைந்து நிமிடச் சவாலின் ஒரு பகுதியாக, வெறும் 24 மணி நேரத்திற்குள் 30 வினாடிகள் கொண்ட ஒரு சிறிய வீடியோவை தைரியமாகப் பதிவேற்றினேன். அதுதான் என் வாழ்க்கையில் பெரிய திருப்புமுனையாக அமைந்து, இன்று பல வீடியோக்களை உருவாக்கும் நம்பிக்கையைக் கொடுத்துள்ளது.

மொபைல் பயன்பாட்டைக் குறைக்கும் டிப்ஸ்!

இந்த முயற்சிகள் உங்களுக்குள் இருக்கும் தன்னம்பிக்கையை மிகப்பெரிய அளவில் வளர்க்கும். உங்களின் தயக்கங்கள் மெல்ல மெல்ல உடைந்து, கடினமான விஷயங்களையும் மிக எளிதாகச் செய்து முடிக்கும் தைரியம் கிடைக்கும். மணிக்கணக்கில் சமூக வலைத்தளங்களில் மூழ்கிக் கிடப்பதற்குப் பதிலாக, இப்படி நிஜ உலகோடு தொடர்பில் இருப்பது மன அழுத்தத்தைப் பெருமளவு குறைக்கும். உங்களை நீங்களே அடுத்த கட்டத்திற்கு உயர்த்திக்கொள்ள இது ஒரு மிகச்சிறந்த வாய்ப்பு.

உங்கள் கைகளில் இருக்கும் ஸ்மார்ட்போனைக் கீழே வையுங்கள். இன்றே இந்த முயற்சியைத் தொடங்குங்கள். உங்களுக்கு மிகவும் சவாலாகத் தோன்றும் ஏதோ ஒரு சிறிய விஷயத்தை வெறும் பதினைந்து நிமிடங்களுக்குச் செய்து பாருங்கள், ஒவ்வொரு நாளும் ஒரு சுவாரஸ்யமான நாள் ஆவதை நீங்களே உணர்வீர்கள்.