அதிகப்படியான பாசிட்டிவ் எண்ணம் ஆபத்தா? கடைசி நேர பதற்றத்தை தவிர்க்க 'தற்காப்பு எதிர்மறை சிந்தனை'!

இன்றைய காலகட்டத்தில் போக்குவரத்து நெரிசல் அதாவது டிராபிக் ஜாம் என்பது தினமும் மணிகொரு தரம் நடக்கக்கூடிய செயலாக மாறிவிட்டது. ஒரே இடத்தில் வாகனத்தில் ஒரு மணி நேரம் கூட காத்திருக்க வேண்டிய சூழ்நிலையையும் நாம் சந்திக்கிறோம்.

எனக்குத் தெரிந்த நண்பர் ஒருவர் முன் ஜாக்கிரதையுடன் நடந்து கொள்ளும் மற்றொரு நண்பரை கேலி செய்வார். “எல்லாத்துலேயும் பாசிட்டிவா யோசிக்கணும் பிரதர். வீட்டிலே இருந்து புறப்பட்டா கரெக்ட்டா போய் சேர்ந்துடுவோம்னு நம்பணும். அதைவிட்டுட்டு டிராபிக்லே மாட்டிகிட்டா என்னாகறது? டயர் பஞ்சர் ஆனா என்னாகறதுன்னு நெகட்டிவா யோசிச்சா அப்படியே ஆயிடும். ஊருக்கு முன்னாடி அங்கே போய் உட்கார்ந்து என்னத்தை சாதிக்கப் போறே?” என்பார்.

ஆனால் கேலிக்கு உள்ளான நண்பர் இதை பெரிதாக எடுத்துக் கொள்ளாதவர். ஆனால் கேலி செய்த நண்பர் ஒரு சமயம் இதுபோல விமானத்தைப் பிடிக்க சரியான நேரத்தில் புறப்பட்டார். ஆனால் அன்று அவருடைய நேரம் சரியில்லை. வழியில் டயர் பஞ்சராகி அதை சரிசெய்து கொண்டு புறப்பட காலதாமதமாகி அன்றைய விமானத்தைத் தவறவிட்டுவிட்டார். அன்றுதான் அவர் முன்னதாக பயணத்தைத் திட்டமிடுவதன் அவசியத்தை உணர்ந்துகொண்டார்.

இப்படித்தான் எனது நண்பர் ஒருவர் அவருடைய மகனின் கவுன்சிலிங்கிற்குச் செல்ல முன்னதாக டிமாண்ட் டிராப்ட் எடுத்து வைக்காமல் கவுன்சிலிங்கிற்கு முந்தைய நாள் எடுத்துக் கொள்ளுவோம் என்று அலட்சியமாக இருந்து விட்டார். அப்படியே முந்தைய நாள் வங்கிக்குச் சென்றார். அன்று பார்த்து நெட்வொர்க் மற்றும் சர்வர் பிரச்னையால் அவரால் டிமாண்ட் டிராப்ட் எடுக்க முடியாமல் போய்விட்டது. பாவம் அவர் திண்டாடிவிட்டார். பிறகு மறுநாள் காலை வங்கிக்குச் சென்று டென்ஷனுடன் டிமாண்ட் டிராப்ட் எடுத்து சமாளித்து கவுன்சிலிங்கில் பங்கேற்றார்.

எல்லாவற்றிற்கும் நேர்மறை சிந்தனை பொருந்தாது என்பதை நாம் உணரவேண்டும். எந்த ஒரு விஷயத்தை கடைசி நேரத்தில் செய்து முடிக்கலாம் என்ற எண்ணத்தை முதலில் கைவிட வேண்டும். நேரம் கிடைக்கும்போது உரிய செயலைச் செய்துவிட்டால் நாம் நிம்மதியாக இருக்கலாம்.

சிலர் வீட்டிலிருந்து ரயில் அல்லது விமான நிலையத்திற்குச் செல்ல டாக்சியை புக் செய்வது வழக்கம். அப்படிச் செல்லும்போது சற்று முன்னதானவே டாக்சியை புக் செய்து டிரைவரை நீங்கள் முடிவு செய்திருக்கும் நேரத்திற்கு ஒரு அரைமணி நேரத்திற்கு முன்னதாக வீட்டிற்கு வரச்சொல்லிவிட வேண்டும்.

அவர் முன்னதாக வந்துவிட்டால் கவலை இல்லை. அவரும் நிம்மதியாக இருப்பார். நீங்களும் நிம்மதியாகப் புறப்படலாம். இத்தகைய செயல் எல்லாவற்றிற்கும் பொருந்தும்.

பொதுவாக யாருமே எந்த ஒரு செயலையும் நல்லபடியாக முடிக்க வேண்டும் என்றே விரும்புவார்கள். இதில் நேர்மறை எதிர்மறை சிந்தனைக்கே இடமில்லை. எனவே நண்பர்களே! எதையும் நெருக்கத்தில் செய்து கொள்ளலாம் என்று அலட்சியமாக இருந்துவிடாதீர்கள். எந்த ஒரு செயலையும் திட்டமிட்டு முன் கூட்டியே செய்வதால் உங்களுக்கு நன்மையைத் தவிர வேறொன்றும் விளையாது என்பதைப் புரிந்துகொண்டு செயல்படுங்கள்.

இந்த பதிவை வாசிப்பதன் மூலம், அளவுக்கு மீறிய நேர்மறை சிந்தனையால் ஏற்படும் கடைசி நேரத் தவறுகளைத் தவிர்த்து, பயணங்கள் மற்றும் நிதி சார்ந்த பணிகளை முன்கூட்டியே திட்டமிடலின் முக்கியத்துவம் பதற்றமில்லாத மன அமைதியான வாழ்க்கையை எப்படிக் கட்டமைப்பது என்ற தெளிவான வழிகாட்டுதலைப் பெறுவீர்கள்.