நல்லெண்ணெய் vs நெய் vs தேங்காய் எண்ணெய்: அறிவியல்படி எது ஆபத்தில்லாதது?

வீட்டில் விளக்கேற்றுவது என்பது ஆன்மீக ரீதியாகவும், நேர்மறை ஆற்றலை (Positive Energy) கொண்டு வருவதற்காகவும் கடைபிடிக்கப்படும் ஒரு முக்கிய வழிபாடாகும். விளக்கில் லட்சுமி, குபேரன் குடியிருப்பதாக ஐதீகம் உள்ளது. வீடோ, கோவிலோ, எந்த இடமானாலும் சாதாரணமாக வழிபடுவதை விட விளக்கேற்றி வழிபட்டால் அதன் பலன் இருமடங்காக இருக்கும்.

பொதுவாக இந்து மத வழிபாட்டில் ஏற்றி வைக்கப்படும் திருவிளக்கு (தீபம்) என்பது வெறும் இருளை அகற்றும் கருவி மட்டுமல்ல; அது மங்கலம் மற்றும் தெய்வங்களின் வடிவமாகப் பார்க்கப்படுகிறது.

தினமும் வீட்டில் விளக்கு ஏற்றுவதால் லட்சுமி மற்றும் குபேரனின் அருள் கிடைப்பதால் வீட்டில் செல்வ வளம் பெருகும். எதிர்மறை ஆற்றல்கள் (நெகட்டிவ் எனர்ஜி) நீங்கி, நேர்மறை ஆற்றல் மற்றும் அமைதி நிலவும்.

அதேபோல் கோவில்களில் தீபம் ஏற்றுவது ஆகம சாஸ்திரங்களின்படி பெரும் புண்ணியத்தைத்தரும் என்பது ஐதீகம். கோவிலில் விளக்கேற்றி வழிபட்டால் மனதில் உள்ள குழப்பங்கள் நீங்கி அமைதி நிலவும்.

விளக்கின் பல்வேறு பகுதிகளில் பல தெய்வங்கள் வாசம் செய்வதாக சாஸ்திரங்கள் கூறுகின்றன:

விளக்கின் சுடர் (ஜோதி): லட்சுமி தேவி வாசம் செய்கிறார். இது செல்வத்தையும் மங்கலத்தையும் குறிக்கும்.

விளக்கின் கீழ் பகுதி (பீடம்): பிரம்மன் வாசம் செய்கிறார்.

விளக்கின் தண்டு பகுதி: மகாவிஷ்ணு வாசம் செய்கிறார்.

நெய்/எண்ணெய் தேங்கும் அகல் பகுதி: உருத்திரன் (சிவன்) வாசம் செய்கிறார்.

திரி மற்றும் எண்ணெய்: குபேரன் மற்றும் சரஸ்வதி தேவியின் அம்சமாகக் கருதப்படுகிறது.

விளக்கேற்றும் நேரம் :

அதிகாலை: பிரம்ம முகூர்த்த வேளையில் (சூரிய உதயத்திற்கு முன்பு) விளக்கேற்றலாம்.

மாலை: அந்தி சாயும் நேரத்தில் (மதியம் 5:30 மணி முதல் 6:30 மணி வரை - சாயரட்சை காலம்) விளக்கேற்றுவது மிகவும் சிறந்தது.

விளக்கேற்ற பயன்படுத்த வேண்டிய எண்ணெய்: (விளக்கேற்ற எந்த எண்ணெய்)

காலையும் மாலையும் வீட்டில்... பூஜையறையிலும் வாசலிலும் விளக்கேற்றுவதே மிகப்பெரிய பலன்களைத் தந்தருளும் என்கிறது சாஸ்திரம் என்பதை மறந்துவிடாதீர்கள்.

ஆனால் வீட்டில் விளக்கேற்றும்போது, எந்த வகை எண்ணெயை உபயோகிக்கலாம் என்கிற குழப்பம் பலருக்கும் இருக்கிறது. ஒவ்வொன்றுக்கும் ஒவ்வொரு பலன் உண்டு என்கிறார்களே... எந்த எண்ணெய் கொண்டு, விளக்கேற்ற வேண்டும் என்று தவித்து மருகுபவர்கள் ஏராளம்.

தற்போது பல எண்ணெய்கள் விளக்கேற்ற வந்துவிட்டன. பல எண்ணெய்களின் கலவையும் வந்துவிட்டன. அதேசமயம் வழிபாட்டிற்கு இந்த பொருட்களைத்தான் பயன்படுத்த வேண்டும். இவற்றை பயன்படுத்தக் கூடாது என்ற முறை உள்ளது.

அப்படி எந்த எண்ணெய் கொண்டு விளக்கேற்றுவது, அதனால் என்ன பலன் கிடைக்கும், வீட்டில் எந்த எண்ணெய்யால் விளக்கேற்றி வேண்டும், கோவிலில் எந்த எண்ணெய்யால் விளக்கேற்றினால் என்ன பலன் கிடைக்கும் என்பது குறித்த பலரது சந்தேகங்களுக்கான பதில்களை இங்கே காணலாம்.

பொதுவாக வீட்டில் அல்லது கோவிலில் விளக்கேற்றுவதற்கு பசு நெய், நல்லெண்ணெய், மற்றும் தேங்காய் எண்ணெய் ஆகிய மூன்றுமே சிறந்தவைதான் என்றாலும், ஆன்மீக சாஸ்திரப்படியும், அறிவியல் ரீதியாகவும் பசு நெய் முதலிடத்தையும், நல்லெண்ணெய் இரண்டாமிடத்தையும் பெறுகின்றன.

பொதுவாக நல்லெண்ணெய் அல்லது பசு நெய்யினால் மட்டுமே வீட்டில் விளக்கேற்ற வேண்டும். இதில் மட்டுமே மகாலட்சுமி வாசம் செய்வதாக ஐதீகம்.

பசு நெய் (Cow Ghee): சாஸ்திரங்களின்படி, விளக்கேற்ற நெய்யே மிக உன்னதமானது. இது வீட்டில் 'சாத்வீக' (தூய்மையான) அதிர்வுகளை ஈர்க்கிறது. நெய் விளக்கு ஏற்றி வழிபடுவதால் மகாலட்சுமியின் அருள் கிடைத்து, வறுமை நீங்கி செல்வம் பெருகும் என்பது ஐதீகம்.

மேலும் மன அமைதி, ஈஸ்வர அனுக்கிரகம், ஐஸ்வர்யம் மற்றும் நேர்மறை ஆற்றல் அதிகரிக்க பசு நெய் கொண்டு விளக்கேற்றுவது மிகவும் சிறந்தது. கோவில்களில் உள்ள முக்கிய தெய்வங்களுக்கும், பிரகார தீபங்களுக்கும் அல்லது சிறப்பு அபிஷேக காலங்களில் நெய்தீபம் ஏற்றப்படுகிறது.

அறிவியல்: நெய் விளக்கு எரியும்போது காற்றில் ஆக்சிஜனை மேம்படுத்தி, நேர்மறை ஆற்றல் வளையத்தை (Energy Field) உருவாக்குகிறது. பசு நெய் எரியும்போது மிகக் குறைவான புகையையே வெளியிடுகிறது (High Smoke Point). இது காற்றில் உள்ள அசுத்தங்களைச் சுத்திகரித்து, மூளைக்கும் சுவாசத்திற்கும் புத்துணர்ச்சியூட்டும் ஓசோன் மற்றும் நேர்மறை ஆற்றலை உருவாக்குவதாக நம்பப்படுகிறது.

நல்லெண்ணெய் (Sesame Oil): இந்த எண்ணெய் தினசரி வழிபாட்டிற்குச் சிறந்தது; நல்வாழ்வு, ஆரோக்கியம் மற்றும் மன அமைதி தரும். துர்சக்திகள் விலகி குடும்பத்தில் மகிழ்ச்சி நிலவும். மேலும் வீட்டில் உள்ள பீடைகள் நீங்கவும், பிணிகள், நவகிரக தோஷங்கள் (குறிப்பாக சனி தோஷம்)மற்றும் தடைகள் விலகவும் நல்லெண்ணெய் கொண்டு தினமும் அல்லது வாராந்திர வழிபாடுகளில் விளக்கேற்றலாம்.

அறிவியல்: நல்லெண்ணெய் எரியும்போது காற்றில் பரவும் அதன் துகள்கள், கிருமிநாசினியாகச் செயல்படுகின்றன. காற்றில் உள்ள நுண்கிருமிகளை அழிக்கும்; நீண்ட நேரம் சீராக எரியும் தன்மை கொண்டது. மாலை நேரத்து (சந்தியா காலம்) காற்றில் உள்ள ஈரப்பதத்தால் ஏற்படும் நுண்கிருமிகளை இது அழிக்கிறது.

தேங்காய் எண்ணெய் (Coconut Oil): குறிப்பாக தென்னிந்திய பாரம்பரியத்தில் விநாயகர் வழிபாட்டிற்கும், குலதெய்வ வழிபாடு மற்றும் குடும்ப நலனுக்கும் தேங்காய் எண்ணெய் பயன்படுத்தப் படுகிறது. குடும்பத்தில் மகிழ்ச்சியையும், அமைதியையும் கொண்டு வர இந்த தீபம் ஏற்றப்படுகிறது. கேரளா போன்ற பாரம்பரியப் பகுதிகளில் இந்த எண்ணெயில் விளக்கு ஏற்றுவது மிகவும் பிரபலம். மனதை அமைதிப்படுத்தும் மென்மையான நறுமணம் கொண்டது. குளிர் காலத்தில் உறைந்து போகலாம். குடும்ப ஒற்றுமை மற்றும் மன மகிழ்ச்சியைத் தரும்.

அறிவியல்: இது எரியும்போது ஒரு மென்மையான நறுமணத்தைத் தந்து மன அழுத்தத்தைக் குறைக்கும். எனினும், குளிர் காலங்களில் இது எளிதில் உறைந்துவிடுவதால், தினசரி பயன்பாட்டில் நல்லெண்ணெய் அளவுக்குப் பிரபலம் இல்லை.

இலுப்பை எண்ணெய்: பல்வேறு மருத்துவ குணங்கள் கொண்ட இலுப்பை எண்ணெய் கொண்டு வீடுகளில் தீபம் ஏற்றினால் நேர்மறையான சக்திகள் ஈர்க்கப்படும். இதனால் வீடுகளில் இருக்கும் எதிர்மறை சக்திகள் ஒழிந்து, மங்களங்கள் பெருகும்.

கோவில்களில் விளக்கேற்ற பயன்படுத்த வேண்டியவை:

நல்லெண்ணெய் (Sesame / Gingelly Oil): கோவில்களில் பொதுவாக மூலவர் சன்னதியில் அல்லது சுவாமிக்கு தீபம் ஏற்ற நல்லெண்ணெய் முதன்மையாகப் பயன்படுத்தப்படுகிறது.

பசு நெய்: கோவில்களில் உள்ள முக்கிய தெய்வங்களுக்கும், பிரகார தீபங்களுக்கும் அல்லது சிறப்பு அபிஷேக காலங்களில் நெய்தீபம் ஏற்றப்படுகிறது.

ஐந்து கூட்டு எண்ணெய் / பஞ்ச தீப எண்ணெய் (Pancha Deepam Oil): நல்லெண்ணெய், பசு நெய், இலுப்பை எண்ணெய், castor oil (விளக்கெண்ணெய்) மற்றும் தேங்காய் எண்ணெய் ஆகிய ஐந்தும் கலந்த கலவை கோவில்களிலும் சில சிறப்பு வழிபாடுகளிலும் பயன்படுத்தப்படுகிறது.

தவிர்க்க வேண்டியவை:

* ஒருபோதும் கடலை எண்ணெய், பாமாயில், சூரியகாந்தி எண்ணெய் போன்ற சமையல் எண்ணெய்களைக் கொண்டு வீட்டில் விளக்கேற்றக் கூடாது. அப்படி பயன்படுத்தினால் கடன்பிரச்சினைகளையும், மனக்கவலையையும் உண்டாக்கும் என்று சாஸ்திரங்கள் கூறுகின்றன.

* ஏற்கனவே எரிந்த விளக்கில் மீதமுள்ள எண்ணெயுடன் மறுபடியும் புதிய எண்ணெயை ஊற்றி விளக்கேற்றுவதைத் தவிர்க்க வேண்டும்.

* சந்தையில் விற்கப்படும் மலிவான 'பூஜை எண்ணெய்களில்' செயற்கை வாசனை திரவியங்களும் இரசாயனங்களும் கலந்திருக்கலாம், இவை கரும்புகையை உண்டாக்கும். எனவே, சுத்தமான எண்ணெய்களைப் பயன்படுத்துவதே நல்லது.

- சுருக்கமாகச் சொன்னால், ஆன்மீக ரீதியாகவும் அறிவியல் ரீதியாகவும் பசு நெய் மிகச் சிறந்தது, ஆனால் பொருளாதார ரீதியாகவும் பலன்களின் அடிப்படையிலும் தினசரி ஏற்ற நல்லெண்ணெய் மிகச் சிறந்த மாற்றாகும்.