கோவில்களில் உடைக்கும் தேங்காய் அழுகி போயிருந்தால் கெட்ட சகுணமா?

நம் வீடுகளில் தேங்காயை (Coconut) உணவுப்பொருளாக மட்டும் பயன்படுத்தாமல் அதை ஆன்மீக காரியங்களுக்கும் பலகாலமாக பயன்படுத்தி வருகிறோம். தேங்காய் உடைப்பது கண் திருஷ்டியை போக்கும் என்று சொல்வதுண்டு. விஷேச நாட்களிலும், புதிதாக ஏதாவது தொழில் தொடங்கும் போதும் தேங்காய் உடைத்து ஆரம்பிப்பது நம்மிடம் வழக்கமாக உள்ளது. இத்தகைய சிறப்பு வாய்ந்த தேங்காயை வைத்து சில சகுணங்களை கூட நம் முன்னோர்கள் கணித்தார்கள் என்று சொன்னால் நம்பமுடிகிறதா? அதைப் பற்றி விரிவாக இந்தப் பதிவில் காண்போம்.

கோவில்களில் தேங்காய் உடைக்கும் போது அந்த தேங்காய் உடையும் விதத்தை வைத்து சகுணத்தை சொல்வார்கள். கோவில்களில் உடைக்கும் தேங்காயில் தேங்காய் பூ இருந்தால், நல்ல சகுணமாக கருதப்படுகிறது. இது அதிகமான பணவரவு வரப்போவதை குறிக்கிறது. உங்களுக்கு வந்து சேர வேண்டிய பணம் எங்கிருந்தாலும், வராத கடன்கள் அனைத்தும் வந்து சேரும். புதிய முயற்சி எடுக்க நினைப்பவர்கள் தைரியமாக எடுக்கலாம். வியாபாரம் செய்பவர்களுக்கு நல்ல லாபம் கிடைக்கும் என்று பொருள்.

அர்ச்சனைக்கு தரும் தேங்காயின் கண் பகுதி பெரிதாக உடைந்தால், எதிரிகள் அழிந்துப் போவார்கள் என்று அர்த்தம். தேங்காயின் அடிப்பகுதி பெரிதாக உடைந்தால், வேண்டுதல் நிறைவேறுவதில் தாமதம் ஏற்படும்.

தேங்காய் சரிபாதியாக உடைந்தால், குடும்பத்தில் இருக்கும் மனக்கசப்பு நீங்கி ஒற்றுமை ஏற்படும். தேங்காய் நீள்வாக்கில் உடைந்தால், பிரச்சனை ஏற்படும் என்று சொல்லப்படுகிறது.

தேங்காய் முற்றிலுமாக உடையாமல் இருந்தால், நீங்கள் எதிர்பார்க்கும் காரியத்தில் சில தடைகள் ஏற்படலாம். மீண்டும் ஒரு முறை தேங்காய் உடைத்து வழிபட வேண்டும். நீங்கள் உடைக்கும் தேங்காய்க்குள்ளே நீர் இல்லாமல் இருந்தால், நீங்கள் நினைத்த காரியம் நிறைவேறுவதற்கு அதிக முயற்சி தேவைப்படும்.

சிலர் உடைக்கும் தேங்காய் அழுகி போயிருந்தால் ஏதோ கெட்ட சகுணம் என்று நினைத்து வருந்துவதுண்டு. ஆனால், தேங்காய் அழுகி போயிருக்கிறது என்றால், நல்லது தான். இதன் மூலமாக நம்மிடம் இருக்கும் தீயசக்தி, பீடை, கண் திருஷ்டி நம்மை விட்டு அகன்று போகும் என்று அர்த்தம். அதாவது, நீங்கள் அனுபவிக்க இருந்த கஷ்டங்கள் அல்லது கெட்ட பலன்களை அந்த தேங்காய் ஏற்றுக் கொண்டது என்று பொருள். இதனால், பதற்றப்பட தேவையில்லை.

அதுப்போல சிதறு தேங்காய் உடைக்கும் போது நன்றாக சிதற வேண்டும் என்று சொல்வார்கள். சரிசமமாக உடையக்கூடாது. தேங்காய் சிறுசிறு துண்டுகளாக உடைந்து ஓடினால் தான் நம் துன்பங்களும் நம்மை விட்டு அகலும் என்பது ஐதீகம்.