இருண்ட காட்டில் த்ரில் பயணம்: இருட்டுக்குள் ஒளிந்திருக்கும் காட்டின் விசித்திர உலகைக் காணலாமா?

இரவு சஃபாரி என்பது வனவிலங்குகள் மற்றும் இயற்கையை இரவு நேரத்தில் அதன் இயல்பான சூழலில் அனுபவிக்கும் ஒரு சிலிர்ப்பான அனுபவ முறையாகும்.

இது பகலில் பார்க்க முடியாத முள்ளம் பன்றிகள், ஆந்தைகள் போன்ற விலங்கினங்களை உற்று நோக்க உதவுகிறது. இருட்டிய பின்பு காடுகளிலோ அல்லது பிரத்தியேக உயிரியல் பூங்காக்களிலோ இரவு நேர விலங்குகளின் (Nocturnal Animals) நடமாட்டத்தைக் காணச்செல்லும் ஒரு அற்புதமான சாகச பயணம் ஆகும். பகலில் தூங்கி இரவில் வேட்டையாடும் விலங்குகளை அவற்றின் இயற்கையான சூழலில் பார்க்க இது ஒரு அரிய வாய்ப்பை வழங்குகிறது.

பகல் நேரங்களில் வனவிலங்குகளின் அழகை ஆராய்வதில் கிடைக்கும் சாகச உணர்வை விட இரவில் பதுங்கி திரியும் விலங்குகளை பார்க்கும்போது கிடைக்கும் அனுபவமே தனிதான்.

நிசப்தமான இரவில் பூச்சிகளின் ஒலியைக் கேட்பதும், இரவுப் பறவைகளின் கூவலை கேட்பதும், மரத்தில் கண்கள் ஒளிர அமர்ந்திருக்கும் ஆந்தைகளைப் பார்ப்பதும் சுவாரசியமான விஷயங்கள். சில சமயங்களில் இரவில் வேட்டையாடும் விலங்குகளைக் காண்பதற்கான அரிய வாய்ப்புகளும் கிடைக்கும்.

சாகசங்கள் நிறைந்த இரவு சஃபாரி பயணத்திற்கான வழிகாட்டுதல்கள்:

இரவு நேர சஃபாரிக்கு ஜீப்பில் ஏறியதும் நம் இதயம் வேகமாக துடிக்கத் தொடங்கும். மறக்க முடியாத அனுபவத்தை வழங்குவதற்கு எந்த விலங்கு எங்கிருந்து திடீரென்று தோன்றுமோ என்று லேசான பயத்துடன் கூடிய ஆர்வமும் ஏற்படும். இந்த இயற்கையின் முற்றிலும் மாறுபட்ட உலகத்திற்குள் நுழைவதில் ஏற்படும் பரவசம் வார்த்தைகளால் சொல்ல முடியாது.

பொதுவாக இரவில் சுறுசுறுப்பாக இருக்கும் விலங்குகளுக்கு பெரிய கண்களும் கருவிழிகளும் இருக்கும். அவற்றின் கண்களில் கூம்பு செல்களைவிட கோல் செல்கள் அதிகமாக இருக்கும்‌ பெரிய கருவிழியானது அதிக ஒளியை சேகரிக்க உதவுகிறது‌ இது நம்மை விட இருட்டில் சிறப்பாகப் பார்க்க அவற்றிற்கு உதவுகிறது. இரவு நேர பறவைகளும் விலங்குகளும் இரவில் சுறுசுறுப்பாக இயங்குகின்றன. அவற்றை இரவு நேர சஃபாரியின் பொழுது கண்டுக்களிக்கலாம்.

இரவு சஃபாரிக்கு வனவிலங்கு பூங்காக்களில் ஆன்லைன் மூலம் முன்கூட்டியே அனுமதிச்சீட்டுகளைப் பெறலாம். குளிர் மற்றும் பூச்சிகளிடமிருந்து பாதுகாக்கும் அடர்நிற உடைகள் மற்றும் சக்தி வாய்ந்த டார்ச் ஆகியவற்றை எடுத்துச்செல்வது அவசியம். விலங்குகளைத் தொந்தரவு செய்யாமல் இருக்க அமைதியைப் பின்பற்றுவதும் மிகவும் அவசியம். முக்கியமாக இரவு நேர வனவிலங்கு பயணங்களின் பொழுது பாதுகாப்பு கருதி வாகனங்களை விட்டு இறங்குவதோ அல்லது விலங்குகளை புகைப்படம் எடுக்க ஃபிளாஷ் விளக்குகளைப் பயன்படுத்துவதோ கண்டிப்பாகத் தடை செய்யப்பட்டுள்ளது.

மத்திய பிரதேசத்தில் அமைந்துள்ள பென்ச் தேசியப் பூங்கா (Pench), கன்ஹா (Kanha), பாந்தவ்கர் (Bandhavgarh) மற்றும் சத்புரா (Satpura). ஆகிய இடங்களில் மாலை 7 மணி முதல் இரவு 10 மணி வரை இந்த இரவு சஃபாரி நடத்தப்படுகிறது.

இங்கு காட்டுப்பன்றிகள், சிறுத்தைகள், முள்ளம்பன்றிகள், ஆந்தைகள் மற்றும் அதிர்ஷ்டம் இருந்தால் புலிகளையும் கூடக் காணமுடியும். கேரளாவின் பரம்பிக்குளம் புலிகள் காப்பகம் மற்றும் பெரியார் காப்பகங்களில் இரவு நேரக் காட்டு தங்குமிடங்கள் மற்றும் இரவு நடைப்பயணங்கள் போன்ற சாகசமான அனுபவங்கள் வழங்கப்படுகின்றன.

ராஜஸ்தான் போன்ற பாலைவனப் பகுதிகளில் நட்சத்திர குவியல்களுக்குக் கீழ் பாலைவன அமைதியை அனுபவிக்கவும், உள்ளூர் கிராமங்களை சுற்றி பார்க்கவும் நடத்தப்படும் இரவு சஃபாரி மிகவும் பிரபலமானது.

ஜெய்சால்மர் - காடுகள் மட்டுமின்றி தார் பாலைவனத்தின் மணல் குன்றுகளுக்கு இடையே ஒட்டக சவாரி செய்து, கேம்ப்ஃபயர் இரவு உணவுடன் நட்சத்திரங்களின் கீழ் தூங்கும் பாலைவன இரவு சஃபாரியும் மிகவும் பிரபலமானது.

சர்வதேச அளவில் புகழ்பெற்ற சிங்கப்பூர் நைட் சஃபாரி உலகின் முதல் இரவு நேர வனவிலங்கு பூங்காவாகும். தினமும் இரவு 7 மணி முதல் நள்ளிரவு 12 மணி வரை திறந்திருக்கும் இப் பூங்காவில் திறந்தவெளி டிராம் வண்டிகள் மூலம் இரவு நேர விலங்குகளை மிக அருகில் பாதுகாப்பாக காணமுடியும். மேலும் கிரீச்சர்ஸ் ஆஃப் தி நைட் (Creatures of the Night) விலங்கு நிகழ்ச்சிகளும், தீ நடனங்களும் இங்கு மிகவும் பிரபலமானவை.

கென்யாவில் உள்ள மசாய் மாரா (Maasai Mara) - ஆப்பிரிக்கக் காடுகளில் இரவு நேரத்தில் சிங்கம், சிறுத்தை, ஹைனா போன்ற வேட்டையாடும் விலங்குகள் தீவிரமாக உலா வருவதை அங்கீகரிக்கப்பட்ட தனியார் காம்ப்கள் மூலம் இரவு கேம் டிரைவ்களில் (Night Game Drive) காணலாம்.

இந்த வழிகாட்டியின் மூலம் இந்தியாவின் மிகச்சிறந்த இரவு நேர காட்டுப் பயணங்களைப் பற்றிய தெளிவான திட்டமிடலையும், வனவிலங்குகளை அவற்றின் இயற்கை சூழலில் பாதுகாப்பாகக் கண்டு ரசிப்பதற்கான அத்தியாவசியத் தேவைகளையும் நீங்கள் முழுமையாக அறிந்துகொண்டு, உங்கள் அடுத்த சாகசப் பயணத்தை உடனே துவங்கலாம்.