பாலியின் பிரமிப்பூட்டும் பாண்டவா கடற்கரை சாலை... இருபுறமும் சுண்ணாம்பு சுவர்கள்!

இந்தோனேசியாவில் உள்ள பாலி உலகின் மிகவும் பிரபலமான சுற்றுலாத் தலங்களில் ஒன்றாகும். இந்துக் கோயில்கள், கடற்கரைகள், நீர்வீழ்ச்சிகள் ஆகியவற்றுக்கு பெயர் பெற்ற இது சுற்றுலாப் பயணிகளுக்கு உண்மையான மகிழ்ச்சியைத் தருகிறது.

கடற்கரை என்றாலே அங்கு ஆர்ப்பரிக்கும் அலையும், அங்கு வீசும் குளிர் காற்றும் மனதை கொள்ளை கொள்ளும். கடற்கரைக்கு செல்லும் பாதையே பிரமிப்பூட்டும் விதமாக காட்சி அளித்தால் எப்படி இருக்கும்? அப்படி ஒன்றுதான் இந்தோனேசியாவின் பாலி நகரில் அமைந்திருக்கும் பாண்டவா கடற்கரை சாலை. மலையை குடைந்து உயரமான நிலப்பரப்புக்கு நடுவே இந்த சாலையை அமைத்திருக்கிறார்கள்.

சாலை அமைக்க இரண்டு ஆண்டுகள் ஆனதாக தகவல்கள் தெரிவிக்கின்றன. அந்த குறுகிய இடத்துக்குள் செல்லும் சாலையில் பயணிப்பது மலைப்பை ஏற்படுத்தும். வியப்பூட்டும் அந்த சாலையில் பயணிப்பதற்காகவே பலரும் கடற்கரைக்கு படையெடுக்கிறார்கள். சாலை 300 மீட்டர் நீளம் கொண்டது மற்றும் அதன் இருபுறமும் குன்றின் 40 மீட்டர் உயர சுண்ணாம்பு சுவர்கள் உள்ளன.

தெற்கு குட்டாவில் உள்ள படூங்கில் பாண்டவா கடற்கரைக்கு செல்லும் சாலை, ஒரு குன்றின் வழியாக செதுக்கப்பட்டு அதன் இருபுறமும் உயரமான பாறைகளை கொண்டுள்ளது. அவற்றில் ஒரு பாறைகளில் குன்றின் மேல் பாண்டவர்கள் மற்றும் குந்தி தேவியின் சிலைகள் செதுக்கப்பட்டுள்ளது. குந்தி, யுதிஷ்டிரன், பீமன், அர்ஜுனன், நகுலன், சகாதேவன் ஆகிய ஆறு உருவங்கள் மேலிருந்து கீழாக செதுக்கப்பட்டுள்ளது.

இந்த சாலையானது சுண்ணாம்பு பாறைகளில் செதுக்கப்பட்ட ஒரு அழகிய சாலையாகும். கடந்த காலத்தில், இந்த கடற்கரை ஒரு பெரிய செதுக்கப்பட்ட சுண்ணாம்பு பாறைகளுக்கு பின்னால் மறைக்கப்பட்டுள்ளதை போல் அமைந்துள்ளதால், இது ரகசிய கடற்கரை என்று அழைக்கப்படுகிறது.

பாண்டவா கடற்கரை அதன் அற்புதமான இயற்கை அழகு மற்றும் உள்ளூர் அழகிற்காக அறியப்பட்ட அமைதியான இடமாகும். இது ஆழமற்ற நீண்ட கடற்கரையாகும். அலைகள் மற்றும் நீரோட்டங்கள் அவ்வளவு வலுவாக இல்லாததால் இந்த கடற்கரை நீச்சலுக்கு மிகவும் ஏற்றது. அதுமட்டுமின்றி இந்த கடற்கரை வாலிபால், ஜெட் ஸ்கீயிங் மற்றும் பாராகிளைடிங் போன்ற நீர் விளையாட்டுகளுக்கு பெயர் பெற்றது.

இது வெள்ளை மணலுடன் கூடிய மிகவும் சுத்தமான கடற்கரையாகும். முன்பு ரகசிய கடற்கரை என்று அழைக்கப்பட்ட இந்த பஞ்ச பாண்டவா கடற்கரையின் அழகை ரசிக்க வெளிநாட்டு சுற்றுலாப் பயணிகளை எப்போதும் அழைக்கிறது. பாலியின் மறைந்திருக்கும் கடற்கரைகளில் பாண்டவா கடற்கரையும் ஒன்று என்றே சொல்ல வேண்டும்.

பாலியின் பிரமிப்பூட்டும் பாண்டவா கடற்கரை சாலை சமூக ஊடகங்களில் வைரலாகி வருவதையடுத்து சுற்றுலா பயணிகள் அங்கு செல்ல படையெடுத்து வருகின்றனர். I Gusti Ngurah Rai சர்வதேச விமான நிலையத்திலிருந்து நீங்கள் வாகனம் மூலம் 20 கிலோமீட்டர் தொலைவில் உள்ள இந்த கடற்கரையை அடையலாம்.