வழிதவறும் சிறார்: பதின்பருவ சிறுவர்களின் வன்முறைப் போக்கைத் தடுப்பது எப்படி?

பதின்பருவம் என்பது தன்னம்பிக்கையும் சுதந்திர உணர்வும் வேகமாக வளரும் காலம். நண்பர்களின் தாக்கம், சமூக ஊடகம், குடும்பச் சூழல், ஊடகங்களில் காணப்படும் வன்முறை, தவறான முன்மாதிரிகள் போன்றவை குழந்தையின் நடத்தையைப் பாதிக்கலாம். சிலருக்கு போதைப்பொருள் பழக்கமும் தவறான பாதைக்குத் தள்ளும் காரணியாக அமையலாம்.

பேருந்து, சாலை, பள்ளி வளாகம், கடை, பூங்கா போன்ற இடங்கள் தனிப்பட்ட இடங்கள் அல்ல. அங்கு பிறரின் பாதுகாப்பையும் உரிமையையும் மதிப்பது குழந்தைகள் கற்றுக்கொள்ள வேண்டிய அடிப்படைப் பண்பு. படிக்கட்டில் தொங்கிப் பயணம் செய்வது போன்ற ஆபத்தான செயல்களைத் தவிர்ப்பதும், அறிவுறுத்துபவரை மரியாதையுடன் அணுகுவதும் நல்ல குடிமகன் உருவாகும் முதல் படிகள்.

“என்னை யாரும் கேள்வி கேட்கக்கூடாது” என்ற மனநிலைக்குப் பதிலாக, “என் செயல் சரியா?” என்று தன்னைத்தானே கேட்டுக்கொள்ளும் பழக்கம் வேண்டும். தவறை ஒப்புக்கொள்வது பலவீனம் அல்ல. அதைத் திருத்திக் கொள்வதே உண்மையான தைரியம். கருத்து வேறுபாடு ஏற்பட்டாலும் வார்த்தைகளால் பேசுவதுதான் நாகரிகம். கையால் தீர்வு காண்பது அல்ல.

குழந்தை எங்கு செல்கிறது, யாருடன் பழகுகிறது, இணையத்தில் எதைப் பார்க்கிறது என்பதில் அக்கறையுடன் இருக்க வேண்டும். வீட்டில் பெரியவர்கள் வன்முறையை ரசிப்பது அல்லது கோபத்தை அடிதடி மூலம் வெளிப்படுத்துவது குழந்தைகளுக்கு தவறான முன்மாதிரியாக அமையலாம். கட்டுப்பாட்டுடன் கூடிய அன்பும், தினசரி ஒழுக்கம் பற்றிய உரையாடலும் அவசியம்.

பள்ளி என்பது பாடங்களை மட்டும் கற்றுத்தரும் இடமல்ல, சமூகப் பொறுப்பையும் கற்றுத்தரும் இடம். மாணவர்களின் நடத்தை மாற்றங்களை ஆசிரியர்கள் ஆரம்பத்திலேயே கவனித்து, தேவையானபோது பெற்றோருடன் இணைந்து ஆலோசனை வழங்க வேண்டும். பிரச்சினை தீவிரமானால் உளவியல் ரீதியான ஆலோசனை பெறச் செய்வது முக்கியம்.

திரையில் காட்டப்படும் வன்முறையை நிஜ வாழ்க்கையின் வீரச் செயலாகக் குழந்தைகள் புரிந்துகொள்ளக்கூடாது. ஒரு காட்சியைப் பார்த்த பிறகு, “இது உண்மையில் நடந்தால் யாருக்கு என்ன பாதிப்பு ஏற்படும்?” என்று பெற்றோர் பேச வேண்டும். இணையத்தில் உருவாகும் கருத்து மோதல்களும் நேரடி சண்டையாக மாறாமல், பொறுப்புடன் கையாளப்பட வேண்டும்.

பள்ளிக் கல்வித் துறை, பள்ளி நிர்வாகம், காவல்துறை மற்றும் சமூக நல அமைப்புகள் இணைந்து செயல்பட வேண்டும். பள்ளிகளில் உளவியல் ஆலோசனை, போதைப்பொருள் தடுப்பு விழிப்புணர்வு, இணையப் பாதுகாப்பு, பொது ஒழுக்கம், சட்ட விழிப்புணர்வு போன்றவற்றை தொடர்ந்து வழங்குவது பயனுள்ளதாக இருக்கும். சம்பவம் நிகழ்ந்த பிறகு நடவடிக்கை எடுப்பதுடன், முன்கூட்டியே தடுப்பதே முக்கியம்.

சுதந்திரம் என்பது எதை வேண்டுமானாலும் செய்வது அல்ல, நமது செயலால் பிறருக்கு பாதிப்பு ஏற்படாதபடி நடப்பதே உண்மையான சுதந்திரம். பேருந்தில் பாதுகாப்பாகப் பயணம் செய்வது முதல், கருத்து வேறுபாட்டை அமைதியாக அலசி ஆராய்வது வரை ஒவ்வொரு சிறிய பழக்கமும் எதிர்கால மனிதரை உருவாக்குகிறது.