தொடர்கதை: ரோஸ் மில்க் - அத்தியாயம் 1

இவன் டேபிளில் இருந்த உலக உருண்டையை உருட்டிக்கொண்டே ஸ்வேதா சொல்லிக் கொண்டிருந்தாள். அவள் உதட்டசைவுக்கேற்ப அவள் காதுகளில் அணிந்திருந்த தங்க ஊஞ்சல்கள் ஆடிக்கொண்டிருந்தன.

''எத்தனை ஆடுகளை வெட்டப் போறாங்களோ தெரியல? மிகைப்படுத்திப் பேசறதே உன் வழக்கமாப் போச்சு ஸ்வே.''

கண் சிமிட்டி சிரித்தாள். அது அவள் விமேனரிசம்.

''நீ பச்சமண்ணு ஆதி.''

ஸ்வேதா இவன் பேட்ச் மேட். அதனால் இவனை ஒருமையில் விளிக்கும் சுதந்திரத்தை எடுத்துக்கொண்டவள்.

''சரிதான் சுட்ட மண்ணே.. நீ சொல். என்ன விஷயம்?''

அந்தக் கம்பெனியின் அனைத்து விஷயங்களும் அறிவாள். அவள் கணவன் வர்மா ஹெச் ஆர்ல இருக்கார்.

''இன்னைக்கு டிக்ளேர் பண்ணப் போறாங்களாம். நேத்துதானே ஹையர் லெவெல் மீட்டிங் நடந்தது. நேரம் அதிகமில்லை ஜென்டில்மேன் அதான்.''

ஒரு குளிர் கத்தி இவன் வயிற்றுக்குள் செருகியது போலிருந்தது. மூச்சை உள்ளிழுத்து நிதானமாக வெளிவிட்டான்.

ப்ரீத் இன்.. ப்ரீத் அவுட்.