சிறுகதை: காவல்காரன்.. சீஸர்!

போலீஸ் ஸ்டேஷனுக்கு வந்த போனை ஏட்டையா தான் எடுத்தார்.

“சொல்லுங்க யாரு பேசறீங்க.. எங்கே இருந்து பேசறீங்க.. என்ன பிரச்சினை.. உங்க பெயர் என்ன..”

மறுமுனையில் பதில் வந்தது.

“உங்க பெயர் சீஸரா.. ஒழுங்கா முழுப் பெயர் சொல்லுங்க.. என்னது சீஸர் ஐ பி 10.115.12.08 என்ன ஒரே குழப்பமா இருக்கு.”

இன்ஸ்பெக்டர் மாதவன் “என்ன ஏட்டு என்ன போனில் யாரு ?”

“ஐயா.. ஏதோ ஒரு குரல் பேசுது.. பெயர் கேட்டா சீஸர்ன்னு சொல்லி ஏதோ பெரிய நம்பர் சொல்லுது.”

“போனை இங்கே குடுங்க.. யெஸ் இன்ஸ்பெக்டர் மாதவன் தான். என் பெயர் உங்களுக்கு எப்படி தெரியும்.. ஆமாம் இதுக்கு முன்னால் பேசியது ஹெட் கான்ஸ்டபிள் வேலுசாமி தான். விஷயத்தைச் சொல்லுங்க. என்னது நீங்க ஒரு ரோபோ வா..”

மறுமுனையில் ஒரு ரோபோ தான் பேசியது.. ”உங்க ஸ்மார்ட் போனை பாருங்க வீடியோ காலில் வாங்க.. விஷயம் புரியும்.”