கமர்கட்டு முதல் தேன் மிட்டாய் வரை: எங்கே சென்றன 90 களில் கிடைத்த மிட்டாய்கள்?

பள்ளி மணி அடித்ததும் வகுப்பறையைவிட பள்ளி வாசலை நோக்கி ஓடிய நாட்கள் உங்களுக்கு நினைவிருக்கிறதா? கையில் இருந்த சில ரூபாய்க்குள் கிடைத்த அந்தச் சிறிய இனிப்புகளின் சுவை இன்றும் பலர் நாவில் தங்கியிருக்கிறது

சாக்லேட், ஐஸ்கிரீம் என்று இன்றைய குழந்தைகளின் உலகம் மாறிவிட்டது. ஆனால் நம் பள்ளிப் பருவத்தை இனிமையாக்கிய அந்த மிட்டாய்கள் மட்டும் நம் நினைவிலிருந்து மறையவில்லை!

இன்றைய குழந்தைகளுக்கு வண்ணமயமான பாக்கெட் இனிப்புகளும் சாக்லேட்டுகளும் எளிதாகக் கிடைக்கின்றன. ஆனால் 80, 90-களில் பள்ளி வாசல்களிலும் தெருமுனைக் கடைகளிலும் கிடைத்த சிறிய மிட்டாய்கள் தனி உலகம்.

கமர்கட்டு, தேன் மிட்டாய், சவ்வு மிட்டாய் போன்றவை வெறும் இனிப்புகள் அல்ல; நண்பர்கள், பள்ளி இடைவேளை, சில்லறைக் காசு சேர்த்த மகிழ்ச்சி எனப் பல நினைவுகளின் சின்னங்கள். அந்த மிட்டாய்கள் இன்று எங்கே போயின?

பள்ளி மணி அடித்ததும் வாசலுக்கு வெளியே இருந்த சிறிய கடையை நோக்கி ஓடுவோம். கண்ணாடி பாட்டிலுக்குள் ஆரஞ்சு நிறத்தில் மின்னும் தேன் மிட்டாய்கள், காகிதத்தில் சுற்றப்பட்ட கமர்கட்டுகள், நீண்ட குச்சியில் சுற்றி வைக்கப்பட்ட சவ்வு மிட்டாய்—ஒவ்வொன்றும் தனித் தனி அழகு. தேன் மிட்டாயை வாயில் போட்டதும் மெதுவாகக் கரையும் இனிப்பு; கமர்கட்டைக் கடிக்கும்போது கிடைக்கும் தேங்காய், வெல்லத்தின் மணம்; சவ்வு மிட்டாயை இழுத்து நீட்டி மோதிரமாகவோ கடிகாரமாகவோ செய்து கையில் அணிவிக்கும் மிட்டாய்க்காரரின் சாமர்த்தியம்—இவற்றை மறக்க முடியுமா?

அந்தக் காலத்தில் மிட்டாய் வாங்குவது பெரிய செலவு அல்ல. கையில் இருந்த சில்லறையை நண்பர்களுடன் சேர்த்து எண்ணி, யார் எதை வாங்குவது என்று முடிவு செய்வதே ஒரு சின்ன கொண்டாட்டம். சிலர் தங்கள் மிட்டாயை பாதியாக உடைத்து நண்பருக்குக் கொடுப்பார்கள்.

இன்று நினைத்துப் பார்த்தால், அந்த இனிப்பைவிட அதைச் சுற்றியிருந்த நட்பும் பகிர்வும்தான் அதிகம் நினைவுக்கு வருகிறது. அப்படியானால் இவை எல்லாம் எங்கே போயின? சிறிய பெட்டிக்கடைகள் குறைந்ததும், பள்ளி வாசல்களில் விற்பனை செய்த மிட்டாய்க்காரர்கள் அரிதானதும் ஒரு காரணம். பெரிய நிறுவனங்களின் பாக்கெட் தின்பண்டங்களும் சாக்லேட்டுகளும் அதிக இடத்தைப் பிடித்தன.

தயாரிப்புச் செலவு, மூலப்பொருட்கள் கிடைப்பது, விற்பனை வாய்ப்பு போன்ற சவால்களால் பாரம்பரிய மிட்டாய் தயாரிப்பவர்களும் குறைந்தனர். ஜவ்வு மிட்டாய் விற்பவர்களை இப்போது திருவிழாக்கள் அல்லது சில கண்காட்சிகளில் மட்டுமே பார்க்க முடிகிறது.

ஆனால் இந்த மிட்டாய்கள் முழுவதுமாக மறைந்துவிடவில்லை என்பது மகிழ்ச்சியான செய்தி. சென்னையில் பாரம்பரிய இனிப்புகளை மீண்டும் அறிமுகப்படுத்தும் கடைகளும் ஆன்லைன் விற்பனை முயற்சிகளும் உருவாகியுள்ளன. கமர்கட்டு, தேன் மிட்டாய், சவ்வு மிட்டாய் உள்ளிட்ட பழைய சுவைகளைத் தொகுப்பாக விற்கும் முயற்சிகளும் உள்ளன. மயிலாப்பூரில் உள்ள பாரம்பரிய இனிப்புக் கடைகளிலும் கமர்கட்டு போன்ற இனிப்புகள் தயாரிக்கப்படுகின்றன. பழைய சுவையைத் தேடி வரும் பெரியவர்களும், அதை முதன்முறையாகச் சுவைக்கும் குழந்தைகளும் இவற்றுக்கு புதிய வாடிக்கையாளர்களாகிறார்கள்.

கமர்கட்டு பொதுவாக தேங்காய், வெல்லம் சேர்த்து செய்யப்படுகிறது. தேன் மிட்டாய் அரிசி, உளுந்து மாவுக் கலவையைச் சிறு உருண்டைகளாகப் பொரித்து சர்க்கரைப் பாகில் ஊறவைத்து தயாரிக்கப்படுகிறது. சவ்வு மிட்டாயின் தனிச்சிறப்பு அதன் சுவையைவிட, அதை விற்பவர் கைகளால் உருவாக்கும் பொம்மைகள், மோதிரங்கள், வளையல்கள்தான். இவை ஒவ்வொன்றும் சிறு தொழிலாளர்களின் கைவினையையும் வாழ்வாதாரத்தையும் தாங்கி நிற்கின்றன.

பள்ளி வாசலில் இனித்த பால்யம்!!

மதியம் பள்ளி மணி அடித்ததும் வாசலுக்கு ஓடிய காலம் உண்டு.. காரணம் பள்ளி வாசலில் காத்திருந்த அந்த சின்ன சின்ன மிட்டாய்கள் தான்.. பள்ளிப் பருவம் என்றாலே படிப்பு, விளையாட்டு, நண்பர்கள் எனப் பல நினைவுகள் மனதில் தோன்றும்... ஆனால் அந்த நினைவுகளுக்கு நடுவில் ஒரு தனி இடத்தைப் பிடித்திருப்பவை பள்ளி வாசலில் விற்கப்பட்ட கமர்கட்டு, தேன் மிட்டாய், சவ்வு மிட்டாய் போன்ற எளிய இனிப்புகள் தான்..

இன்றைய குழந்தைகளுக்குப் பலவிதமான சாக்லேட்டுகளும் நவீன தின்பண்டங்களும் கிடைக்கின்றன.. ஆனால் நம் பள்ளி நாட்களில் ஒரு சிறிய மிட்டாய் கிடைத்தாலே அது பெரிய கொண்டாட்டமாக இருந்தது.. கமர்கட்டு என்றாலே அதன் கடினமான இனிப்பு சுவை நினைவுக்கு வரும்..

இந்த மிட்டாயை வாயில் போட்டு மெதுவாக கடித்து சுவைப்பதே ஒரு தனி அனுபவம்..

தேன் மிட்டாயின் சிவப்பும் ஆரஞ்சு நிறமும் அதன் மேல் படிந்திருக்கும் சர்க்கரை பாகின் இனிப்பும் குழந்தைகளை எளிதில் கவர்ந்து விடும்.ஒரே ஒரு மிட்டாய் வாங்கினாலும் அதை நண்பர்களுடன் பகிர்ந்து சாப்பிடுவதில் கிடைத்த மகிழ்ச்சிக்கு ஈடு இணை இல்லை..

சவ்வு மிட்டாய்க்கு மட்டும் தனி ரசிகர்கள் இருந்தார்கள்.. வண்ண வண்ணமாக நீண்டு இழுக்க கூடிய அந்த மிட்டாயை விற்பவர் குழந்தைகள் கேட்கும் வடிவங்களில் செய்து கொடுப்பார்.. கையில் மோதிரம் போலச் சுற்றிக் கொடுப்பதும், சில நேரங்களில் கடிகாரம் போல செய்து கையில் அணிவிப்பதும் குழந்தைகளுக்கு ஆச்சரியமாக இருக்கும்..

அதை சாப்பிடுவதற்கு முன்பே கையில் அணிந்து கொண்டு நண்பர்களிடம் காட்டுவதில் அப்படி ஒரு பெருமை.. இந்த மிட்டாய்களைப் பற்றி நினைக்கும் போது என் அத்தைகள் கூறிய பள்ளி பருவ அனுபவங்கள் நினைவுக்கு வருகிறது.. அவர்கள் படித்த காலத்தில் பள்ளி வாசலில் மிட்டாய் விற்பவரிடம் தேன் மிட்டாய் வாங்கி சாப்பிட்ட நினைவுகளை மகிழ்ச்சியாக பகிர்ந்து கொள்வார்கள்..

தேன் மிட்டாயின் இனிப்பையும் அதை வாங்கி சாப்பிட்ட நாட்களை நினைவு கூறும் போது அவர்களின் பேச்சில் அவ்வளவு உற்சாகம் தெரியும்.. அத்தை சொன்ன தேன் மிட்டாய் அனுபவமும் பாட்டி தந்த சவ்வு மிட்டாய் நினைவும் வெவ்வேறு காலத்தைச் சேர்ந்தவை என்றாலும் இரண்டிலும் பொதுவானது அந்த சிறிய மகிழ்ச்சி தான்..

இன்று அந்த நாட்களை நினைத்து பார்க்கும் போது ஒரு சிறிய மிட்டாய் எத்தனை பெரிய நினைவுகளை நமக்குள் வைத்திருக்கிறது என்று வியக்கத் தோன்றுகிறது.இன்று பள்ளி வாசல்களில் இந்த மிட்டாய்களப் பார்க்க முடிகிறதா என்ன?. காலத்திற்கேற்ப குழந்தைகளின் உணவுப் பழக்கங்களும் மாறி விட்டது.. இருப்பினும் பாரம்பரிய இனிப்புகளைத் தயாரிக்கும் சில சிறு விற்பனையாளர்களும் கடைகளும் இவற்றின் சுவையை இன்னும் உயிர்ப்புடன் வைத்திருக்கின்றன.. விரும்புபவர்கள் அவற்றை தேடி வாங்கிச் சுவைப்பதும் உண்டு..

பள்ளி வாசல் மிட்டாய்கள் இன்று அரிதாகிவிட்டாலும், அவற்றின் சுவை நம் நினைவுகளில் இன்னும் உயிரோடு இருக்கிறது. கமர்கட்டு, தேன் மிட்டாய், சவ்வு மிட்டாய் ஆகியவை வெறும் இனிப்புகள் அல்ல..

பள்ளிப் பருவத்தின் குறும்புகளையும், அத்தையின் அனுபவத்தையும், பாட்டியின் அன்பையும் சுமந்து நிற்கும் பால்ய நினைவுகள்.. அடுத்த தலைமுறைக்கும் இந்த இனிய பாரம்பரியத்தை அறிமுகப்படுத்துவோம்.

உங்கள் பள்ளிப் பருவத்து இனிய நினைவுகளை மீட்டெடுத்து, நவீன உலகில் மறக்கப்பட்டுவரும் பாரம்பரிய சுவைகளை அடுத்த தலைமுறைக்குக் கொண்டு சேர்க்கும் ஏக்கத்தையும் மகிழ்ச்சியையும் இக்கட்டுரை உங்களுக்குத் தரும்.