குழந்தைகளின் நிம்மதியைப் பறிக்கும் பள்ளிப் பை சுமை! பெற்றோர்கள் தெரிந்து கொள்ள வேண்டிய உண்மைகள்!

ஒரு நாளுக்குத் தேவையான பாடப்புத்தகங்கள், குறிப்பேடுகள் மட்டுமே பையில் இருக்கும்படி திட்டமிடலாம். தேவையற்ற புத்தகங்களின் எடையைக் குறைப்பது குழந்தையின் உடல் சிரமத்தை குறைக்கும். அதே சமயம் பள்ளிக்குச் செல்லும் மகிழ்வைக் கூட்டும்.

வீட்டுப்பாடத்தின் எண்ணிக்கை அதிகரிப்பதால் அறிவு அதே அளவில் அதிகரிக்கும் என்று சொல்ல முடியாது. குறைவான பணியாக இருந்தாலும், அதை குழந்தை புரிந்து சுயமாகச் செய்யவும் செய்த பாடத்தின் சாரத்தை மனதில் நிறுத்திக் கொள்ளவும் வாய்ப்பு கொடுப்பதே சிறந்த பயிற்சி.

ஆசிரியரின் நேரடி வழிகாட்டுதலுடன் வகுப்பறையிலேயே சில எழுத்துப் பயிற்சிகளையும் பாடப்பயிற்சிகளையும் முடிக்கச் செய்தால், குழந்தையின் சந்தேகங்கள் உடனுக்குடன் தீரும். வீட்டில் மீண்டும் அதே பணியைச் செய்வதற்கான சுமையும் குறையும்.

வாசிப்புடன் விளையாட்டு, கலை, இசை, கைவினை, இயற்கை சார்ந்த செயல்பாடுகள் போன்றவற்றுக்கும் நேரம் தேவை. குழந்தையின் திறமை பாடப் புத்தகங்களில் மட்டுமே மறைந்திருப்பதில்லை.

அந்த நாளை செயல்முறை கற்றலுக்காகப் பயன்படுத்தலாம். சுற்றுப்புறத்தை கவனித்தல், அறிவியல் செய்முறை பயிற்சி, தோட்டப்பணி அல்லது குழு செயல்பாடுகள் போன்றவை குழந்தைக்கு வேறுவிதமான கற்றல் அனுபவத்தைத் தரும்.

நன்றாக மனப்பாடம் செய்வது மட்டுமே அறிவின் அடையாளமல்ல. கேள்வி கேட்பது, காரணம் கண்டுபிடிப்பது, புதிய யோசனைகள் சொல்வது, பிரச்சினைக்குத் தீர்வு காண்பது போன்ற திறன்களையும் பாராட்ட வேண்டும்.

போதுமான ஓய்வு, விளையாட்டு, சத்தான உணவு, தூய்மையான குடிநீர் ஆகியவை குழந்தையின் வளர்ச்சிக்கு அடிப்படை. உடலும் மனமும் சோர்வடையும் வரை படிக்கச் சொல்வதைவிட, புத்துணர்ச்சியுடன் தகுந்த இடைவேளைகளுடன் கற்கும் சூழலை உருவாக்குவது அவசியம்.

“எத்தனை மதிப்பெண்?” என்று கேட்பதற்கு முன், “இன்று என்ன புதிதாகக் கற்றாய்?” என்று கேட்போம். பயத்தால் படிக்கும் குழந்தை தேர்வு மதிப்பெண்களுக்காக மட்டும் கற்கும். ஆர்வத்தால் கற்கும் குழந்தை வாழ்க்கைக்காகக் கற்றுக்கொள்ளும்.