சிறுகதை: தொடுவானத்தில் ஒரு மின்னல்!

அந்தப் பெரிய கட்டடத்தின் முன் ஒரு சொகுசு கார் வந்து நிற்க, முன்னிருக்கையில் இருந்து இறங்கினாள் லெட்சு என்கின்ற லட்சுமி. சூட்கேஸை எடுத்துக்கொண்டு நடந்தவளிடம் பெற்றுக் கொள்வதற்காக ஓடிவந்து கையை நீட்டினார் உதவியாளர் கணபதி. “இருக்கட்டும்யா” என்று மறுத்து விட்டு விடுவிடுவென நடந்து படியில் ஏறினாள்.

பின்னிருக்கை கதவைத் திறந்து இறங்கிய அந்த நிறுவனத்தின் தலைவர் சாய்ராம், கைப்பேசி அழைக்கவே பேசியவாறு மெல்ல நடந்து வந்தான். ஏதோ கோளாறாகி மின்தூக்கி மேலேயே நின்று போயிருந்தது. எனவே பக்கவாட்டில் இருந்த படியில் ஏறி மேல போகும் போது வழியில் ஒரு பீரோவுக்கு பின்புறம் பிரிவு அதிகாரி ஜானும் கணபதியும் கிசுகிசு என்று பேசிக்கொள்வது சாய்ராம் காதில் விழுந்தது.

“இத்தனை வருஷமா நான் தான் ஐயாவுக்கு எல்லாம் செய்வேன். அப்பப்போ அஞ்சு பத்துன்னு குடுப்பாரு. இந்த.. இது. ரெண்டுங்கெட்டான் எப்ப வந்துச்சோ அப்பத்திலிருந்து ஐயாவை அண்ட விடறதில்லை. ரொம்ப தான் பண்ணுது” என்றார் கணபதி.

“ஐயா கூடவே வருது. அவரு கூடவே போயிடுது. ஆபீஸ்ல வேலைக்கு வர்ற மாதிரியா இருக்கு! கட்டின பெண்டாட்டின்னு நெனப்பு,” என்றான் ஜான்.

“கட்டின பொண்டாட்டி மாதிரியா.. நல்லா சொல்லுவியே.. அதுக்கும் மேல” என்று கண்ணடித்து “மார்ல அவரு பேரை பச்சை குத்திகிட்டுருக்கு” என்று உதடு பிதுக்கினார் கணபதி.