

வேலைக்கு செல்லாமல் இருக்கும் இல்லத்தரசிகளிடம் பலர் கேட்கும் கேள்வி "சும்மா தானே இருக்கே" என்பது தான். அது எவ்வளவு மன உளைச்சலைத் தரும் என்று தெரியுமா?
வேலைக்கு சென்று சம்பாதிக்கவில்லை, சம்பளம் வாங்கவில்லை என்பதற்காக ஒரு பெண்ணின் உழைப்பு மதிப்பற்றதாகிவிடுமா? வீட்டையும் குடும்பத்தையும் சுமந்து நிற்கும் இல்லத்தரசிகளின் அன்றாடப் பணிகளுக்குப் பின்னால் இருக்கும் அர்ப்பணிப்பைப் புரிந்துகொள்வோம்.
“நீ வேலைக்குப் போகவில்லையா? வீட்டில்தானே இருக்கிறாய்? அப்படியென்றால் சும்மாதானே இருக்கிறாய்?” என்று இல்லத்தரசிகளைப் பார்த்து சிலர் கேட்பதுண்டு. இந்தக் கேள்வி சாதாரணமாகக் கேட்கப்படுவதாக இருந்தாலும், அதற்குப் பின்னால் இருக்கும் அலட்சியம் பல பெண்களின் மனதைப் புண்படுத்துகிறது. உண்மையில் வீட்டில் இருப்பவர்கள் சும்மாவா இருக்கிறார்கள்?
ஒரு அலுவலகத்துக்குச் செல்பவருக்கு வேலை நேரம் உண்டு. வார விடுமுறை உண்டு. சில நேரங்களில் விடுமுறை எடுத்துக்கொள்ளவும் முடியும். ஆனால் இல்லத்தரசியின் வேலைக்கு நேரக்கட்டுப்பாடும் கிடையாது; வார விடுமுறையும் கிடையாது!
அதிகாலையில் அனைவரும் எழுவதற்கு முன்பே இல்லத்தரசியின் நாள் தொடங்கிவிடுகிறது. சமையல், காலை உணவு தயாரித்தல், குழந்தைகளைப் பள்ளிக்கு அனுப்புதல், கணவருக்குத் தேவையானவற்றை எடுத்துக் கொடுத்தல், வீட்டைச் சுத்தம் செய்தல், துணி துவைத்தல் என வேலைகள் ஒன்றன்பின் ஒன்றாக அணிவகுத்து நிற்கும்.
இவை முடிந்துவிட்டால் ஓய்வா என்றால் அதுவும் இல்லை. மதிய உணவு தயாரிக்க வேண்டும். வீட்டில் வயதானவர்கள் இருந்தால் அவர்களுக்கான மருந்து, உணவு, மருத்துவப் பராமரிப்பு எனக் கூடுதல் பொறுப்புகள் இருக்கும். குழந்தைகள் வீட்டுக்கு வந்ததும் அவர்களுடைய படிப்பு, உணவு, தேவைகள் என மீண்டும் வேலை தொடங்கிவிடும்.
குடும்பத்தின் மாதச் செலவைக் கணக்கிட்டு, கிடைக்கும் வருமானத்திற்குள் தேவைகளைச் சமாளிப்பதும் இல்லத்தரசியின் முக்கியமான பணிகளில் ஒன்று. எதிர்பாராத செலவு வந்தால் எப்படிச் சமாளிப்பது என்று யோசிப்பதும் அவள் தான்.
வீட்டில் யாருக்காவது உடல்நிலை சரியில்லையென்றால் இரவு முழுவதும் கண்விழித்துப் பார்த்துக்கொள்வாள். தனக்குக் காய்ச்சல் வந்தாலும் சமையலறைக்குச் செல்ல வேண்டிய சூழல் பல பெண்களுக்கு இருக்கிறது. அவளுடைய உடல்நலத்தையும் மனநிலையையும் விசாரிப்பவர்கள் எத்தனை பேர்?
இல்லத்தரசி என்பவள் வேலைக்குச் செல்லாதவள் மட்டுமல்ல; ஒரு குடும்பத்தின் அன்றாட இயக்கத்திற்குப் பின்னால் இருக்கும் முக்கியமான சக்தி. அவள் செய்யும் பணிகளுக்குச் சம்பளம் கிடைப்பதில்லை என்பதற்காக அவற்றின் மதிப்பு குறைந்துவிடாது. குடும்பத்தினர் அவளுடைய உழைப்பைப் பகிர்ந்துகொள்வதும், அவளுக்கென்று ஓய்வு நேரம் அளிப்பதும் அவசியம்.
இலக்கியங்களும் போற்றும் இல்லற மாண்பு!!
"இல்லதென் இல்லவள் மாண்பானால் உள்ளதென் இல்லவள் மாணாக்கடை" (குறள் 53) என்ற குறளில், இல்லத்தரசியின் மாண்பே ஒரு குடும்பத்தின் சிறப்பு என்பதை வலியுறுத்துகிறார் திருவள்ளுவர். சங்க இலக்கியமான புறநானூற்றிலும் இல்லத்தரசி "மனைக்கு விளக்கு" என்ற உவமையால் போற்றப்படுகிறாள். குடும்பத்திற்கு ஒளி தரும் விளக்காகப் பெண் விளங்குகிறாள் என்ற உயர்ந்த பார்வையை இந்த இலக்கியக் குறிப்பு வெளிப்படுத்துகிறது.
காலங்கள் மாறினாலும் குடும்பத்தை அன்பால் இணைத்து, அதன் தேவைகளை உணர்ந்து செயல்படும் பெண்களின் பங்களிப்பு மாறவில்லை. இன்று பெண்கள் வேலைக்குச் சென்றாலும், வீட்டிலிருந்து குடும்பத்தை நிர்வாகித்தாலும் அவர்களுடைய உழைப்புக்கு உரிய மதிப்பு கிடைக்க வேண்டும். இல்லறம் என்பது ஒருவருடைய பொறுப்பு மட்டுமே அல்ல. குடும்பத்தில் உள்ள அனைவரும் பகிர்ந்து கொள்ள வேண்டிய கடமை என்பதை ஒவ்வொருவரும் உணர வேண்டும்.
வார்த்தைகளால் ஏற்படும் மன உளைச்சல்!!
"சும்மா தானே இருக்கிறாய்" என்ற ஒரு கேள்வி, நாள் முழுவதும் உழைக்கும் இல்லத்தரசியின் மனதை எவ்வளவு காயப்படுத்தும் என்பதை அந்த கேள்வியை கேட்பவர்கள் உணருவதில்லை. தன்னுடைய உழைப்பை யாரும் மதிக்கவில்லை என்ற எண்ணம் அவளுக்குள் தாழ்வு மனப்பான்மையையும் மனச்சோர்வையும் ஏற்படுத்தலாம். வேலைக்கு செல்பவர்கள் அலுவலகத்தில் செய்த வேலைக்குப் பாராட்டு பெறும் போது தான் செய்யும் பணிகளுக்கு ஒரு நன்றி வார்த்தை கூட கிடைக்கவில்லையே என்ற ஏக்கம் தோன்றலாம்.
வீட்டுப் பொறுப்புகளைச் சுமப்பதோடு, தன் உணர்வுகளையும் அடக்கிக் கொண்டு வாழும் பெண்கள் எவ்வளவு பேர் இருக்கிறார்கள்? எனவே, இல்லத்தரிசிகளிடம் பேசும் போது அவர்களுடைய உழைப்பையும் உணர்வுகளையும் மதிக்கும் அன்பான வார்த்தைகளைப் பயன்படுத்துவோம். ஒரு சிறிய பாராட்டு கூட அவர்களுக்கு மிகப் பெரிய உற்சாகத்தைத் தரும்.
“சும்மாதானே இருக்கிறாய்?” என்று கேட்பதற்கு முன்பு, ஒரு நாள் அவளுடைய பொறுப்புகளைப் பகிர்ந்து பாருங்கள். அப்போதுதான் இல்லத்தரசியின் உழைப்பும் அர்ப்பணிப்பும் எவ்வளவு மகத்தானது என்பது புரியும். சம்பளம் இல்லாத அவளுடைய சேவைக்கும் மரியாதை கொடுப்போம்!
வீட்டில் இருப்பவர்களின் உழைப்பை எடைபோடும் முன், அவர்களின் நாள் எத்தனை மணி நேரம் ஓடுகிறது என்ற தெளிவு வாசகருக்குக் கிடைக்கும். குடும்ப உறவுகளில் வார்த்தைகளின் தாக்கத்தை உணர்ந்து, அன்பும் மரியாதையும் பகிரும் மனமாற்றம் உருவாகும்.