புனித நீராடப் போறீங்களா? ஜாக்கிரதை! – கும்பமேளா பகுதியில் 1,000 மடங்கு நச்சு ரசாயனம்..!!

நாசிக்கின் அம்பாட் (Ambad) தொழிற்பேட்டைக்கு அருகில் மேற்கொள்ளப்பட்ட ஆய்வகப் பரிசோதனை ஒன்று தீவிரமான சுகாதாரக் கவலையை எழுப்பியுள்ளது. இப்பகுதிக்கு ஏராளமான பக்தர்கள் வருகை தருவார்கள் என எதிர்பார்க்கப்படும் 'சிம்ஹஸ்த கும்பமேளா' (Simhastha Kumbh Mela) நிகழ்விற்கு நாசிக் தயாராகி வரும் வேளையில் இந்தக் கண்டுபிடிப்பு வெளியாகியுள்ளது.

2027-இல் நாசிக்கில் 'சிம்ஹஸ்த கும்பமேளா' (Simhastha Kumbh Mela) நடைபெறவுள்ள நிலையில், அம்பாட் தொழிற்பேட்டைக்கு அருகில் சேகரிக்கப்பட்ட நீர் மாதிரிகளில் குரோமியம் அளவு அனுமதிக்கப்பட்ட குடிநீர் அளவை விட 1,000 மடங்கு அதிகமாக இருப்பது ஆய்வக அறிக்கையில் தெரியவந்துள்ளது. இதை அணைகள், ஆறுகள் மற்றும் மக்களுக்கான தெற்காசிய கூட்டமைப்பு (SANDRP) வெளியிட்ட அறிக்கையில் தெரிவித்துள்ளது. மேலும் அம்பாட் மகாராஷ்டிரா தொழில் வளர்ச்சிக் கழக (MIDC) பகுதியில் நடைபெறும் தொழில் நடவடிக்கைகளே இந்த மாசுபாட்டிற்குக் காரணமாக இருக்கலாம் என்றும் SANDRP கூறியுள்ளது.

மகாராஷ்டிராவின் நாசிக் மாவட்டம், அம்பாத் பகுதி நிலத்தடி நீரில் (கும்பமேளா நீர்) புற்றுநோயை உண்டாக்கும் 'ஹெக்ஸாவலன்ட் குரோமியம்' (Hexavalent Chromium) என்ற நச்சு ரசாயனம் பாதுகாப்பு அளவைக் காட்டிலும் 1,000 மடங்கு அதிகமாக இருப்பதாக ஆய்வில் அதிர்ச்சித் தகவல் வெளியாகியுள்ளது. இதனைத் தொடர்ந்து, சுற்றுச்சூழலை மாசுபடுத்தும் தொழிற்சாலைகள் மீது நடவடிக்கை எடுக்குமாறு மாநில அரசு அதிகாரிகளுக்கு உத்தரவிட்டுள்ளது. மேலும், சுகாதாரத் துறை மற்றும் பக்தர்கள் மத்தியில் எச்சரிக்கை விடுக்கப்பட்டுள்ளது.

நடைபெற உள்ள கும்பமேளா விழாவை முன்னிட்டு லட்சக்கணக்கான பக்தர்கள் கூடும் வேளையில், இந்த செய்தி பொதுமக்களின் ஆரோக்கியம் குறித்த பெரும் அச்சத்தை ஏற்படுத்தியுள்ளது.

மாசடைந்த நீரினால் அப்பகுதி மக்களுக்கு தோல் மற்றும் பிற உடல்நலப் பிரச்சனைகள் ஏற்படுகின்றன. மேலும், இந்த மாசடைந்த நீர் உள்ளூர் வடிகால்கள் வழியாக கோதாவரி ஆற்றிலும் கலக்கிறது.

விரைவில் கும்பமேளா நடைபெறவுள்ள படித்துறைகளை உள்ளடக்கிய, பாதிக்கப்பட்ட ஆற்றுப் பகுதியானது, நகரத்திற்கு வருகை தரும் லட்சக்கணக்கான பக்தர்களுக்கு சுகாதார அபாயத்தை ஏற்படுத்தக்கூடும் என்று அறிக்கையில் தெரிவிக்கப்பட்டுள்ளது.

இந்த ஆய்வில், குடிநீரில் ஒரு லிட்டருக்கு 50.5 மி.கி மொத்த குரோமியம் இருப்பதும், அதில் மிகவும் நச்சுத்தன்மை வாய்ந்த 'ஹெக்ஸாவேலன்ட் குரோமியம்' (hexavalent chromium) ஒரு லிட்டருக்கு 50.3 மி.கி அளவில் இருப்பதும் கண்டறியப்பட்டுள்ளது. அதாவது, தண்ணீருக்காகப் பரிந்துரைக்கப்பட்ட வரம்பை விட 1,000 மடங்கு அதிகமாகும். குடிநீரில் மொத்த குரோமியத்தின் அளவுக்கான உலக சுகாதார அமைப்பின் அனுமதிக்கப்பட்ட அளவு ஒரு லிட்டருக்கு 0.05 மி.கி மட்டுமே (அல்லது ஒரு லிட்டருக்கு 50 மைக்ரோகிராம்) ஆகும்.

நாசிக்கில் உள்ள அம்பாட் தொழிற்பேட்டைக்கு அருகில், கோதாவரி ஆற்றில் கலக்கும் நந்தினி ஆற்றுப் பகுதியிலிருந்து இந்த நீர் மாதிரிகள் சேகரிக்கப்பட்டன. கும்பமேளாவின் போது லட்சக்கணக்கான பக்தர்கள் புனித நீராடச் செல்லும் ஆற்றில், இத்தகைய தொழிற்சாலைக் கழிவுகளால் மாசு பரவக்கூடும் என்ற கவலையை இந்த ஆய்வு முடிவுகள் காட்டுகின்றன. கோதாவரி ஆற்றில் புனித நீராடுவதே இத்திருவிழாவின் மிக முக்கிய நிகழ்வாகும்.

இந்தக் கண்டுபிடிப்புகள், நந்தினி ஆறு மற்றும் கோதாவரியில் தொழிற்சாலைக் கழிவுகளின் தாக்கம் குறித்த கவலைகளை எழுப்பியுள்ளன.

கும்பமேளாவின் போது கோதாவரி ஆற்றங்கரையோரம் உள்ள பல படித்துறைகளுக்கு அதிக எண்ணிக்கையிலான பக்தர்கள் வருவார்கள் என்று எதிர்பார்க்கப்படுவதால், அந்த விழாவிற்கு முன்னதாக நீரின் தரம் ஒரு முக்கிய கவலையாக எழுந்துள்ளது.

இதற்கிடையே அப்பகுதியை மாசுபடுத்தும் தொழிற்சாலைகள் மீது உடனடியாகவும் தகுந்த முறையிலும் நடவடிக்கை எடுக்குமாறு மகாராஷ்டிரா மாநில மாசுக்கட்டுப்பாட்டு வாரிய அதிகாரிகளுக்கு அமைச்சர் முண்டே உத்தரவிட்டுள்ளார்.

அம்பாத்தில் உள்ள மகாராஷ்டிர தொழிற்துறை மேம்பாட்டுக் கழக (MIDC) மண்டலத்தில் இயங்கும் மின்முலாம் பூசுதல், உலோக மெருகூட்டல், வண்ணப்பூச்சு மற்றும் பிற தொழில்கள் இந்த இரசாயனத்தின் மூலமாக இருக்கலாம் என கருதப்படுகிறது.

ஹெக்ஸாவலன்ட் குரோமியம் மனிதர்களுக்கு புற்றுநோயை உண்டாக்கும் ஒரு வேதிப்பொருள் என்பது அறியப்படுகிறது. இதன் வெளிப்பாடு கடுமையான உடல்நல அபாயங்களை ஏற்படுத்தக்கூடும்

குறிப்பாக அந்த பகுதியில் உள்ள குழந்தைகள், பெண்கள் உட்பட பலர் இந்தத் தண்ணீரைப் பயன்படுத்தி வருவதன் விளைவாக, மக்கள் புண்கள், தோல் தடிப்புகள் மற்றும் கொப்புளங்களால் அவதிப்பட்டு வருகின்றனர்.

இளம் பெண்களும் குழந்தைகளும் வலிமிகுந்த, வீங்கிய நிணநீர் கணுக்கள் மற்றும் நாள்பட்ட நோய்களால் அவதிப்படுகின்றனர்.

பாதிக்கப்பட்ட பகுதியில் இரண்டு பெண்களுக்குக் கருச்சிதைவு ஏற்பட்டுள்ளது.

நாசிக் மாநகராட்சியிலிருந்து வரும் குறைந்த மற்றும் சீரற்ற நீர் விநியோகத்தின் காரணமாக, அந்த பகுதியில் உள்ள பொதுமக்கள் குளிப்பதற்கும், துணி துவைப்பதற்கும், பாத்திரங்கள் கழுவுவதற்கும் இந்தத் தண்ணீரையே நம்பியிருக்க வேண்டிய கட்டாயத்தில் உள்ளதாக SANDRP கூறியுள்ளது.

ஊடக செய்திகளைத் தொடர்ந்து, மகாராஷ்டிர மாசுக் கட்டுப்பாட்டு வாரியம் (MPCB) செப்டம்பர் 30 அன்று ஒரே ஒரு நிறுவனத்திற்கு மட்டும் விளக்கம் கோரும் அறிவிப்பை அனுப்பியது.

‘மாநகராட்சி மாசுக்கட்டுப்பாட்டு வாரியம் தனது நீர் பரிசோதனைத் தரவுகளைப் பொதுவெளியில் வெளியிடவோ அல்லது பாதிக்கப்பட்ட குடியிருப்பாளர்களுக்குத் தெரிவிக்கவோ இல்லை. அந்த அபாயகரமான இரசாயனத்தின் ஆபத்துகள் குறித்து அது சமூகத்தினரை இருட்டில் வைத்துள்ளது’ என்று SANDRP தெரிவித்துள்ளது.

இதற்கிடையே அங்கீகரிக்கப்பட்ட தொழிற்சாலைகளும் சட்டவிரோத நிறுவனங்களும் சுத்திகரிக்கப்படாத கழிவுநீரைத் திறந்தவெளியில் வெளியேற்றி வருவதாக சுற்றுச்சூழல் ஆர்வலர் ராஜேஷ் பண்டிட் குற்றம்சாட்டியுள்ளார். நிலத்தடி நீர் மாசுபாட்டின் அளவு இன்னும் அறியப்படவில்லை என்றும், அது எவ்வளவு தூரம் பரவியுள்ளது என்பதைக் கண்டறிய ஒரு விரிவான ஆய்வு நடத்தப்பட வேண்டும் என்றும் அவர் வலியுறுத்தி உள்ளார்.