ரோடு ஷோவில் முதலமைச்சர் விஜய் காலில் கட்டியிருந்த வினோத கயிறு... கவனித்தீர்களா?

தமிழகத்தில் அக்டோபர் 6-ம்தேதி நடைபெற உள்ள மதுராந்தகம் சட்டமன்றத் தொகுதி இடைத்தேர்தலை முன்னிட்டு, தமிழ்நாடு முதலமைச்சரும் தமிழக வெற்றிக் கழகத்தின் (தவெக) தலைவருமான விஜய் மாமண்டூர் முதல் மதுராந்தகம் வரை பிரம்மாண்ட தேர்தல் பிரச்சார ரோடு ஷோவை (Road Show) நடத்தினார். அப்போது அவரது வலது காலில் ஒரு கயிறு (விஜய் கயிறு) கட்டியிருந்தார். அந்தக் காட்சி இணையத்தில் வைரலாகி வரும் நிலையில், அவர் கட்டியிருப்பது என்ன கயிறு, எதற்காக அதைக் கட்டியிருக்கிறார் என்பது குறித்து நெட்டிசன்கள் விவாதித்து வருகின்றனர்.

மதுராந்தகம் மற்றும் தாராபுரம் சட்டப்பேரவை தொகுதிகளுக்கான இடைத்தேர்தல் வரும் அக்டோபர் 6-ம்தேதி நடைபெறுகிறது. வாக்கு எண்ணிக்கை 9-ம்தேதி நடைபெற உள்ளது.

அதிமுக சட்டமன்ற உறுப்பினர்களின் எதிர்பாராத ராஜினாமாவால் தமிழ்நாட்டில் தாராபுரம் மற்றும் மதுராந்தகம் தொகுதிகளுக்கு இடைத்தேர்தல் நடைபெற உள்ளது. நடைபெற உள்ள இத்தேர்தலுக்காக களத்தில் ஐந்துமுனை போட்டி நிலவுகிறது. தேர்தல் நெருங்கிவரும் நிலையில் போட்டியிடும் அரசியல் கட்சிகள் தீவிரப் பிரசாரத்தில் ஈடுபட்டு வருகின்றன.

இந்த இரு தொகுதிகளிலும், தவெக சார்பில் முன்னாள் எம்எல்ஏக்களான அதிமுகவில் இருந்து வந்த மரகதம் குமரவேல் மற்றும் சத்தியபாமா ஆகியோர் போட்டியிடுகின்றனர்.

இத்தேர்தல் ஆளும் தவெகவிற்கு முக்கியமான ஒன்றாக அமைந்துள்ளது. காரணம் இத்தேர்தலில் தவெக வெற்றிப்பெற்றால் கூட்டணி கட்சிகளின் ஆதரவின்றி ஆட்சியைத் தொடரலாம். இதனைக்கருத்தில் கொண்டு தீவிர பிரசாரத்தில் தவெக ஈடுபட்டு வருகிறது.

மேலும், திமுக, அதிமுகவை விட அதிக வாக்குகள் வித்தியாசத்தில் வெற்றி பெற வேண்டிய நிர்பந்தத்தில் தவெக உள்ளதாகக் கூறும் அரசியல் விமர்சகர்கள், 'அவ்வாறு பெறாவிட்டால் முதலமைச்சர் விஜய் மீதான பிம்பத்தில் சரிவு ஏற்படும்' என்கின்றனர்.

இதற்கிடையே, மதுராந்தகத்தில் அக்டோபர் 3-ம் தேதியும், தாராபுரத்தில் 4-ம் தேதியும் தனது கட்சி வேட்பாளர்களை ஆதரித்து முதலமைச்சர் விஜய் பிரசாரம் மேற்கொண்டார்.

பிரசாரங்களைத் தொடர்ந்து நேற்று (அக்டோபர் 2) மதுராந்தகத்தில் வேட்பாளர் மரகதம் குமரவேலை ஆதரித்து ரோடு ஷோ நடத்தினார். மாமண்டூரில் தொடங்கி மதுராந்தகம் வரை சுமார் 45 கிலோ மீட்டர் தூரத்திற்கு , 30-க்கும் மேற்பட்ட கிராமங்கள் வழியாக முதலமைச்சர் விஜய் தனது பிரசாரப் பயணத்தை மேற்கொண்டார்.

ரோடு ஷோ சென்ற வழியெங்கும் திரண்டிருந்த பொதுமக்களும், தவெக தொண்டர்களும் விஜய்க்கு உற்சாக வரவேற்பு அளித்தனர்.

ரோடு ஷோவின் போது சாலையோரம் இருந்த டீக்கடையில் டீ குடித்த அவர், வயல்வெளியில் வேலை செய்து கொண்டிருந்த பெண் தொழிலாளர்களிடம் கலந்துரையாடி, அங்கு டிராக்டர் ஓட்டியும் அசத்தினார்.

இந்நிலையில் முதலமைச்சர் விஜய் ரோடு ஷோ தொடர்பான புகைப்படங்கள் மற்றும் வீடியோக்கள் சமூக வலைத்தளத்தில் வெளியான நிலையில், அதில் அவரது வலது காலில் ஒரு கயிறு கட்டப்பட்டிருப்பது பலரது கவனத்தையும் ஈர்த்ததுடன், அவர் கட்டியிருப்பது என்ன கயிறு, எதற்காக அதைக் கட்டியிருக்கிறார் என்பது குறித்து நெட்டிசன்கள் விவாதித்து வருகின்றனர்.

பொதுவாக ஆன்மீக ரீதியாகவும், கண் திருஷ்டி மற்றும் எதிர்மறை ஆற்றல்களிலிருந்து தங்களைப் பாதுகாத்துக் கொள்ளவுமே காலில் கருப்புக் கயிறு கட்டுவது வழக்கம்.

அந்த வகையில், முதலமைச்சர் விஜய்யின் இந்தத் தோற்றம், பொதுமக்களாலும் அவரது தொண்டர்களாலும் சமூக வலைத்தளங்களில் உன்னிப்பாகக் கவனிக்கப்பட்டுள்ளதுடன், விஜய் காலில் கட்டியிருக்கும் கயிறுக்குப் பின்னணியில் என்ன காரணம் இருக்கும் என்பது பற்றிய விவாதம் தற்போது இணையத்தில் சூடுபிடித்துள்ளது.

முன்னதாக, அவர் முதலமைச்சராகப் பதவியேற்கும் போதும், ஆளுநரைச் சந்திக்கும் போதும் அவரது கையில் காப்பு, நெற்றியில் திலகம் மற்றும் கயிறு அணிந்திருந்தது, இதே போன்று பல விவாதங்களை ஏற்படுத்தியது.

இருப்பினும், அவரது தரப்பில் இருந்து இதற்கான அதிகாரப்பூர்வ விளக்கம் எதுவும் இதுவரை வெளியாகவில்லை என்பது குறிப்பிடத்தக்கது.