ஆன்லைனில் பி.எட் படிப்பு கல்லூரியை தேர்ந்தெடுக்கலாம்! அரசு அறிவிப்பு!

பி.எட். ஆசிரியர் பட்டப்படிப்பில் சேர விரும்பும் மாணவ, மாணவிகள் ஆன்லைனிலேயே தாங்கள் படிக்க விரும்பும் கல்லூரியை தேர்வு செய்துகொள்ளலாம். இச்செய்தியை தமிழக அரசு சமீபத்தில் அறிவித்துள்ளது.

கடந்த ஆண்டுகளில் பி.எட் மாணவர்கள் சேர்க்கை நேரடி கலந்தாய்வின் மூலம் நடைபெற்று வந்தது. இதன் காரணமாக வெளி ஊர்களில் இருந்து மாணவர்கள் தங்களுடைய பெற்றோர்களுடன் சென்னைக்கு வந்து கலந்தாய்வில் கலந்து கொள்ளும் நிலை நேரிட்டது. இதனால் பி.எட்.படிக்க விரும்பிய மாணவர்கள் பல இன்னல்களை எதிர்கொள்ள வேண்டியிருந்தது.

இந்த நிலையில் அரசு மற்றும் அரசு உதவிபெறும் கல்வியியல் கல்லூரிகளில் 2025-2026 ஆம் கல்வியாண்டிற்கான தமிழ்நாடு பி.எட். மாணாக்கர் சேர்க்கையை இணைய வழியில் நடத்திட உயர்க்கல்வித் துறை முடிவு செய்துள்ளது.

இக்கல்வி ஆண்டு பி.எட். படிப்பிற்கான விண்ணப்பங்கள் 20.06.2025 முதல் 21.07.2025 வரை இணைய வழியில் பெறப்பட்டன. 557 ஆண்கள் 2983 பெண்கள் மற்றும் 5 மூன்றாம் பாலினத்தவர் என மொத்தம் 3545 நபர்கள் இப்படிப்பிற்கு விண்ணப்பித்துள்ளனர். இதற்கான தரவரிசைப் பட்டியல் 31.07.2025 அன்று இணையதளத்தில் வெளியிடப்பட்டது.

தமிழ்நாட்டில் உள்ள 7 அரசு கல்வியியல் கல்லூரிகளில் 900 இடங்களும், 14 அரசு உதவிபெறும் கல்லூரிகளில் 1140 இடங்கள் என 21 கல்வியியல் கல்லூரிகளில் 2040 இடங்கள் உள்ளன. இணைய வழியில் ஆகஸ்ட் 04.08.2025 முதல் 09.08.2025 மாலை 5.00 வரை மாணவர்கள் தாங்கள் விரும்பும் கல்லுரியைத் தேர்வு செய்ய வழிவகை செய்யப்பட்டுள்ளது.

மாணவர்கள் தங்கள் உள்நுழைவு ID மூலம் www.lwiase.ac.in என்ற இணையதளம் வாயிலாக தாங்கள் படிக்க விரும்பும் பி.எட். கல்லூரியைத் தேர்வு செய்து கொள்ளலாம் என்று தமிழக உயர்க்கல்வித் துறை தெரிவித்துள்ளது. இதன் மூலம் பி.எட்.படிப்புக்கு தான் வசிக்கும் பகுதிக்கு அருகில் உள்ள கல்லூரியை தேர்ந்தெடுத்து மாணவர்கள் படிக்க முடியும்.

சேர்க்கை கலந்தாய்வுக்காக அவர்களுக்கு ஏற்படும் நேரவிரயமும், பணவிரயமும் தவிர்க்கப்படும். எனவே, அரசின் இந்த புதிய அறிவிப்பால் ஆசிரியர் படிப்புக்கு விண்ணப்பித்துள்ள மாணவர்கள் மகிழ்ச்சி அடைந்துள்ளார்கள் என்பது குறிப்பிடத்தக்கது.