குட் நியூஸ்: இனி ஆதார் கார்டில் மொபைல் எண்ணை நீங்களே மாற்றிக் கொள்ளலாம்..!

நாட்டில் தனிநபர் அடையாள ஆவணங்களில் ஆதார் கார்டு மிகவும் முக்கியமானதாக இருக்கிறது. ஆதார் கார்டில் முகவரி மாற்றம், தொலைபேசி எண்ணை இணைத்தல் மற்றும் பிறந்த தேதியை மாற்றுதல் உள்ளிட்ட பல சேவைகளைப் பெற வேண்டுமனில் வங்கிகள், அஞ்சல் அலுவலகங்கள் மற்றும் ஆதார் மையங்களுக்கு சென்று விண்ணப்பிக்க வேண்டியது அவசியம். இந்நிலையில் மொபைல் எண்ணை வீட்டில் இருந்தே, மொபைல் செயலி மூலமாக மாற்றிக் கொள்ளும் புதிய வசதியை கொண்டு வர உள்ளது இந்திய தனித்துவ அடையாள ஆணையம் (UIDAI).

தற்போது வரை ஆதார் கார்டில் திருத்தங்களை மேற்கொள்வதற்கு பொதுமக்கள் வரிசையில் நீண்ட நேரம் காத்திருக்க வேண்டிய நிலை உள்ளது. அதிலும் ஒவ்வொருவருக்கும் திருத்தத்தை மேற்கொள்ள அதிக நேரம் எடுக்கிறது. மேலும் ஆதார் கார்டில் மேற்கொள்ளப்படும் பல திருத்தங்களுக்கு ஒப்புதல் அளிக்கப்படாமல் நிராகரிக்கப்படுகிறது. இதனால் பொதுமக்கள் பலமுறை விண்ணப்பிக்க வேண்டிய சிரமத்திற்கு ஆளாகியுள்ளனர்.

திருத்தங்களுக்கு ஒப்புதல் அளித்து, ஆதார் கார்டை அப்டேட் செய்ய வேண்டும் என ஏற்கனவே பொதுமக்கள் கோரிக்கை விடுத்து வரும் நிலையில், தற்போது மொபைல் எண்ணை வீட்டில் இருந்தே மாற்றிக் கொள்ளும் புதிய வசதி விரைவில் கொண்டு வரப்பட உள்ளது. இந்த வசதி பொதுமக்கள் பலருக்கும் பயனுள்ளதாக இருக்கும்.

தொழில்நுட்பம் வளர்ந்து வரும் இன்றைய நிலையில், இதனைப் பயன்படுத்தி ஆதார் கார்டில் மொபைல் செயலி மூலம் மொபைல் எண்ணை சேர்க்கவும், புதுப்பிக்கவும் நடவடிக்கை எடுக்கப்பட்டு வருகிறது. இதன்படி முதற்கட்டமாக ஆதார் கார்டுடன் ஏற்கனவே இணைக்கப்பட்ட மொபைல் எண்ணை மாற்றிக் கொள்ளும் புதிய வசதி விரைவில் அறிமுகப்படுத்தப்படும் எனத் தெரிவித்துள்ளது ஆதார் ஆணையம்.

இதுகுறித்து ஆதார் ஆணையம் வெளியிட்ட பதிவில், “விரைவில் பொதுமக்களுக்கு பயன்படும் விதமாக ஒரு புதிய வசதி வரப் போகிறது. ஆதார் கார்டில் இணைக்கப்பட்ட மொபைல் எண்ணை, மிக சுலபமாக வீட்டில் இருந்து கொண்டே முக அங்கீகாரம் மற்றும் ஓடிபி வாயிலாக மாற்றிக் கொள்ளலாம். இதற்காக இனியும் ஆதார் மையங்களில் நீண்ட நேரம் வரிசையில் காத்திருக்க வேண்டிய அவசியம் இல்லை” எனத் தெரிவித்துள்ளது.

ஆதார் கார்டில் மொபைல் எண்ணை இணைக்கவோ அல்லது மாற்றவோ வேண்டுமெனில், ஆதார் மையங்களுக்கு சென்று அதற்குரிய விண்ணப்பப் படிவத்தை பூர்த்தி செய்து ரூ.50 கட்டணம் செலுத்தி விண்ணப்பிக்க வேண்டும். இந்நிலையில் ஆதார் ஆணையம் கொண்டு வர உள்ள புதிய வசதியின் மூலம், பொதுமக்கள் எங்கும் அலைய வேண்டிய அவசியம் இருக்காது.

ஆதார் சேவையை விரிவுபடுத்தவும், பொது மக்களுக்கு எளிதாக கிடைக்கவும் ஆதார் ஆணையம் பல்வேறு நடவடிக்கைகளை மேற்கொண்டு வருகிறது. அதோடு ஆதார் கார்டின் நம்பகத்தன்மையை உறுதி செய்யவும் ஆதார் அணையும் தொடர்ந்து நடவடிக்கை எடுத்து வருகிறது. இதன்படி கடந்த சில ஆண்டுகளில் மட்டும் இறந்தவர்கள் 2 கோடி நபர்களின் ஆதார் எண்கள் நீக்கப்பட்டதாக சமீபத்தில் ஆதார் ஆணையம் தெரிவித்திருந்தது.

மேலும் குடும்ப உறுப்பினர்கள் யாரேனும் இறந்து விட்டால், அவர்களின் விவரங்களை ‘மை ஆதார் (My Aadhar)’ எனும் இணையதளத்தில் பதிவு செய்யலாம். தற்போது வரை இந்த வசதி 25 மாநிலங்கள் மற்றும் யூனியன் பிரதேசங்களுக்கு கிடைக்கிறது. இதனை மற்ற மாநிலங்களுக்கும் ஆதார் ஆணையம் விரைவில் விரிவுபடுத்த உள்ளது.