திடீரென ஆட்டோ கட்டணத்தை உயர்த்திய தமிழக அரசு: இனி குறைந்தபட்சம் ரூ.50! முழு கட்டணப் பட்டியல் இதோ..!

தமிழ்நாடு அரசு வெளியிட்டுள்ள அரசாணையின்படி, சென்னை பெருநகர பகுதி மற்றும் மாநிலத்தின் இதர பகுதிகளில் இயக்கப்படும் ஒப்பந்தப் பயண ஆட்டோ பயணக் கட்டணங்கள் கணிசமாக உயர்த்தப்பட்டுள்ளன.

அதன்படி, தமிழகத்தில் 13 ஆண்டுகளுக்குப் பிறகு ஆட்டோ கட்டணத்தை உயர்த்தி, முதலமைச்சர் விஜய் தலைமையிலான தவெக அரசு அதிகாரப்பூர்வ அரசாணையை வெளியிட்டுள்ளது. தீபாவளி பண்டிகைக்கு முன்பாக ஆட்டோ ஓட்டுநர்களின் நீண்ட நாள் கோரிக்கையை ஏற்று இந்த தீபாவளி பரிசாக இந்த அறிவிப்பு வெளியாகியுள்ளது. இதன்படி, ஆட்டோவில் முதல் 1.8 கிமீ பயணம் செய்ய ரூ.50 கட்டணம் செலுத்த வேண்டும்.

கடந்த 2013-ஆம் ஆண்டிற்குப் பிறகு எரிபொருள் விலை உயர்வு மற்றும் வாகனப் பராமரிப்புச் செலவுகள் அதிகரிப்பைக் கருத்தில் கொண்டு, தமிழகம் முழுவதும் இந்த புதிய சீரமைக்கப்பட்ட கட்டண உயர்வு உடனடியாக அமலுக்கு வந்துள்ளது.

2013-ஆம் ஆண்டில், அரசு முதல் 1.8 கிலோமீட்டருக்கு ரூ.25 என்றும், அதற்கடுத்த ஒவ்வொரு கிலோமீட்டருக்கும் ரூ.12 என்றும் கட்டணம் நிர்ணயித்தது. இந்த ஆண்டு ஜூலை மாதம் நடைபெற்ற சம்பந்தப்பட்டோர் கூட்டத்தில், தொழிற்சங்கங்கள் 1.5 கிலோமீட்டருக்கு குறைந்தபட்ச கட்டணமாக ரூ.60 என்றும், அதற்கடுத்த ஒவ்வொரு கிலோமீட்டருக்கும் ரூ.30 என்றும் கோரிக்கை விடுத்தன.

மேலும் அதிகரித்து வரும் எரிபொருள் விலை, காப்பீட்டு பிரீமியங்கள், உதிரிபாகங்களின் விலை மற்றும் வாகனப் பராமரிப்புச் செலவுகள் ஆகியவை தங்களது வருமானத்தைக் குறைத்துவிட்டதாக ஆட்டோ ஓட்டுநர்கள் கூறினர். அதுமட்டுமின்றி வீட்டு வாடகை, மின்சாரக் கட்டணம், மருத்துவச் செலவுகள் மற்றும் கல்விச் செலவுகள் அதிகரித்துள்ளதால் ஓட்டுநர்களின் வருமானம் குறைந்துவிட்டதாகவும், ஓலா, ஊபர், பைக் டாக்சிகளால் ஏற்படும் போட்டியையும் அவர்கள் சுட்டிக்காட்டினர்.

விலையேற்றத்திற்கு ஏற்ப மீட்டர் கட்டணங்களைத் திருத்தியமைக்குமாறு 4 ஆண்டுகளுக்கு முன்பு சென்னை உயர் நீதிமன்றம் மாநில அரசுக்கு உத்தரவிட்டிருந்த போதிலும், அந்தத் திருத்தம் இன்னும் செயல்படுத்தப்படவில்லை என்றும் அவர்கள் கூறினர்.

இதற்கிடையே மெட்ரோ ரெயில், மினி பேருந்துகள் மற்றும் பைக் டாக்சிகள் உள்ளிட்ட மாற்றுப் போக்குவரத்து வசதிகளின் விரிவாக்கம் மற்றும் பெண்களுக்கு இலவசப் பேருந்துப் பயணம் ஆகியவை ஆட்டோ ஓட்டுநர்களின் வருமானத்தைப் பாதித்துள்ளதாக தொழிற்சங்கங்கள் தெரிவித்தன. தீபாவளிக்கு முன்பாகக் கட்டணத் திருத்தத்தை அறிவிக்குமாறும், வருமான இழப்பைச் சந்தித்த ஓட்டுநர்களுக்குப் பண்டிகைக்கால ஊக்கத்தொகையைப் பரிந்துரைக்குமாறும் அவர்கள் அரசை வலியுறுத்தினர்.

இந்நிலையில் தான் ஆட்டோ ஓட்டுநர் சங்கங்கள் விடுத்த தொடர் கோரிக்கைகளை கருத்தில் கொண்டு, முதலமைச்சர் விஜய், தமிழகத்தில் ஆட்டோ ஓட்டுநர்களுக்கு தீபாவளி பரிசாக கட்டண உயர்வை அறிவித்துள்ளார்.

இப்புதிய கட்டண மாற்றத்தின்படி, ஆட்டோக்களுக்கான குறைந்தபட்ச தூரம் 1.8 கிலோமீட்டராக நிர்ணயிக்கப்பட்டு, அதற்கான குறைந்தபட்ச கட்டணம் 50 ரூபாயாக மாற்றப்பட்டுள்ளது.

இந்த குறைந்தபட்ச தூரத்தைக் கடந்த பிறகு பயணிக்கும் ஒவ்வொரு கூடுதல் கிலோமீட்டருக்கும் 25 ரூபாய் கட்டணமாக வசூலிக்கப்படும்.

மலைப் பிரதேசங்களில் இயக்கப்படும் ஆட்டோக்களுக்கான மலைப் பாதை கட்டணம் (Ghat Fare), சாதாரண குறைந்தபட்ச கட்டணத்தைப் போல 1.2 மடங்கு அதிகமாக இருக்கும் என அறிவிக்கப்பட்டுள்ளது, அதன்படி மலைப் பாதைகளுக்கான குறைந்தபட்ச அடிப்படை கட்டணம் 60 ரூபாயாக இருக்கும்.

இரவு நேரப் பயணங்களை மேற்கொள்ளும் பொதுமக்களுக்குக் கூடுதல் கட்டணம் பொருந்தும் என இந்த அரசாணையில் தெளிவுபடுத்தப்பட்டுள்ளது. அதன்படி, இரவு 10 மணி முதல் அதிகாலை 5 மணி வரை பயணிக்கும் போது, சாதாரண நேரக் கட்டணத்தைப் போல 1.5 மடங்கு (ஒன்றரை மடங்கு) கூடுதல் கட்டணம் செலுத்த வேண்டும்.

அதுமட்டுமின்றி பயணத்தின் போது காத்திருப்பு நேரத்திற்கான கட்டணமாக ஒவ்வொரு 1 நிமிடத்திற்கும் 1 ரூபாய் வீதம் வசூலிக்க அரசு அனுமதி அளித்துள்ளது.

சுருக்கமாக புதிய ஆட்டோ கட்டணம் விவரங்கள் (உதாரணம்: 5 கி.மீ தூரத்திற்கு):

* முதல் 1.8 கிலோமீட்டர் தூரத்திற்கு ரூ. 50 ஆக நிர்ணயிக்கப்பட்டுள்ளது (முன்பு இது ரூ. 25 ஆக இருந்தது).

* 1.8 கி.மீ-க்கு மேல் பயணிக்கும் ஒவ்வொரு கூடுதல் கிலோமீட்டருக்கும் ரூ. 25 வசூலிக்கப்படும் (முன்பு ரூ. 12 ஆக இருந்தது).

* ஆட்டோ காத்திருக்கும் ஒவ்வொரு ஒரு நிமிடத்திற்கும் ரூ. 1 கட்டணம் நிர்ணயம் செய்யப்பட்டுள்ளது.

* இரவு 10 மணி முதல் காலை 5 மணி வரை பயணிக்கும் போது, சாதாரண கட்டணத்தை விட 1.5 மடங்கு (ஒன்றரை மடங்கு) கூடுதலாக வசூலிக்கப்படும்.

* மலைப் பாதைகளுக்கான குறைந்தபட்ச அடிப்படை கட்டணம் 60 ரூபாயாக (முதல் 1.8 கி.மீ தூரத்திற்கு) நிர்ணயிக்கப்பட்டுள்ளது.

* மலைப் பாதைகளில் முதல் 1.8 கி.மீ தூரத்திற்கு பிறகு கூடுதல் தூரம் பயணிக்கும் ஒவ்வொரு கிலோமீட்டருக்கும் 30 ரூபாய் வசூலிக்கப்படும்.

பெட்ரோல், டீசல் விலை உயர்வு மற்றும் வாகனப் பராமரிப்புச் செலவுகள் அதிகரிப்பைக் கருத்தில் கொண்டும், அண்மையில் அரசுப் பேருந்துகளில் பெண்களுக்கு 'வெற்றிப் பயணம்' என்ற இலவசப் பயணத் திட்டம் விரிவாக்கம் செய்யப்பட்டதால் தங்களுக்கு ஏற்பட்ட வாழ்வாதாரப் பாதிப்புகளைச் சுட்டிக்காட்டியும் ஆட்டோ ஓட்டுநர் சங்கங்கள் விடுத்த தொடர் கோரிக்கைகளின் அடிப்படையில் இந்த நடவடிக்கை எடுக்கப்பட்டுள்ளது.