நாட்டில் காற்று மாசு குறைவான நகரங்களில் தமிழ்நாடு தான் டாப்..!

நாட்டில் உள்ள நகரங்களின் அசுர வளர்ச்சியால், சுற்றுச்சூழலும் பாதிப்படைந்து வருகிறது. பொதுமக்கள் பலரும் நகரங்களில் குடியேறும் வரும் நிலையில், நிலத்தின் மதிப்பு பன்மடங்கு பெருகி விட்டது. இருப்பினும் சுத்தமான காற்று, மற்றும் தரமான தண்ணீர் ஆகியவை தான் மனிதர்களின் வாழ்நாளை தீர்மானிக்கும் முக்கிய கருவியாக இருக்கிறது. இந்நிலையில் நகரங்களில் காற்று மாசுபாடு தொடர்ந்து அதிகரித்த வண்ணம் உள்ளது.

ஆண்டுதோறும் மத்திய மாசு கட்டுப்பாட்டு வாரியம், நாட்டில் அதிகம் மற்றும் குறைந்த காற்று மாசு கொண்ட நகரங்களின் பட்டியலை வெளியிட்டு வருகிறது. அவ்வகையில் நடபபாண்டில் குறைந்த காற்று மாசுடைய நகரங்களின் பட்டியலில், முதல் 10 இடங்களில் தமிழ்நாட்டைச் சேர்ந்த 8 நகரங்கள் இடம் பிடித்துள்ளன. அதோடு நாட்டிலேயே குறைந்த மாசு கொண்ட நகரமாக தமிழ்நாட்டின் அரியலூர் முதலிடத்தைப் பிடித்துள்ளது.

கடந்த 2024 ஆம் ஆண்டு குறைந்த மாசுடைய நகரங்களின் பட்டியலில் தமிழ்நாட்டில் இருந்து ராமநாதபுரம், மதுரை மற்றும் திருச்சியின் பல்கலைப்பேரூர் ஆகிய மூன்று நகரங்கள் இடம்பெற்றன. நடப்பாண்டில் இந்த எண்ணிக்கை 8-ஆக அதிகரித்துள்ளது.

காற்று தரக் குறியீட்டின் (AQI) மூலம் ஒவ்வொரு நகரத்திலும் உள்ள காற்று மாசுபாடு குறித்த பட்டியலை தயார் செய்கிறது மத்திய மாசு கட்டுப்பாட்டு வாரியம்.

AQI அளவீடு:

0 - 50: காற்றின் தரம் சிறப்பு.

51 - 100: காற்றின் தரம் திருப்திகரமாக உள்ளது.

101 - 200: காற்றின் தரம் மிதமானது.

201 - 300: காற்றின் தரம் மோசமானது.

301 - 400: காற்றின் தரம் மிகவும் மோசமானது.

401 - 500: காற்றின் தரம் கடுமையான பாதிப்பை ஏற்படுத்தக் கூடிய வகையில் உள்ளது.

டெல்லி, ஹரியானா மற்றும் அசாம் உள்ளிட்ட வட இந்திய மாநிலங்களில் விவசாய அறுவடைக்குப் பிறகு பயிர்க் கழிவுகளை எரிப்பதால், அதிக புகைமூட்டம் ஏற்படுகிறது. இதனால் அப்பகுதிகளில் காற்றின் தரம் மோசமாக உள்ளதாக மாசுக்கட்டுப்பாட்டு வாரியம் தெரிவித்துள்ளது.

குறைவான மாசு கொண்ட நகரங்களில் அரியலூர், ஊட்டி, கரூர், திருச்சி, தஞ்சாவூர், பெருந்துறை, திருப்பூர் மற்றும் சேலம் உள்ளிட்ட எட்டு நகரங்கள் இடம் பிடித்துள்ளன.

குறைவான காற்று மாசு கொண்ட டாப் 10 நகரங்கள்:

1. அரியலூர் - 13

2.ஊட்டி - 15

3. கரூர் - 16

4. திருச்சி - 16

5. தஞ்சாவூர் - 17

6. ஷில்லாங் - 17

7. பெருந்துறை - 21

8. திருப்பூர் - 22

9. சேலம் - 22

10. மங்களூர் - 25

அதிக காற்று மாசு கொண்ட டாப் 10 நகரங்கள்:

1. ஹாபூர் - 416

2. நொய்டா - 397

3. காசியாபாத் -396

4. டெல்லி - 382

5. கிரேட்டர் நொய்டா - 382

6. சார்க்கி தத்ரி - 366

7. புலந்த்ஷர் - 356

8. மீரட் - 350

9. மனேசர் - 342

10. பாக்பட் - 330