தென்காசி பேருந்து விபத்து: தாயை இழந்து பரிதவிக்கும் 2 குழந்தைகள்..! உதவிக்கரம் நீட்டுமா தமிழக அரசு..?

தென்காசி மாவட்டத்தில் கடந்த நவம்பர் 24ஆம் தேதி திங்கள்கிழமை இரண்டு தனியார் பேருந்துகள் நேருக்கு நேர் மோதிக்கொண்ட விபத்தில் 7 பேர் பரிதாபமாக உயிரிழந்தனர். மேலும் 60க்கும் மேற்பட்டோர் காயமடைந்தனர். விபத்து நடந்த இடத்தில் எதிரெதிரே இரண்டு பேருந்துகள் செல்வதற்கு சாலை வசதிகள் இருந்தது. இருப்பினும் தனியார் பேருந்து ஓட்டுநர்கள் போட்டி போட்டுக் கொண்டு அதிவேகமாக ஓட்டியதும், சாலையில் சென்டர் மீடியன் இல்லாததுமே விபத்துக்கு காரணம் என முதல் கட்ட விசாரணையில் தெரிய வந்துள்ளது.

இந்த விபத்தில் சம்பந்தப்பட்ட ஓட்டுநர்கள் இருவர் மீதும் காவல்துறையினர் வழக்குப் பதிவு செய்துள்ளனர். தென்காசி விபத்து குறித்து இரங்கல் தெரிவித்த முதல்வர் மு.க.ஸ்டாலின், விபத்தில் உயிரிழந்தவர்களுக்கு ரூ.3 லட்சமும், படுகாயமடைந்தவர்களுக்கு ரூ.1 லட்சமும், லேசான காயமடைந்தவர்களுக்கு ரூ.50,000 நிவாரணமாக வழங்கப்படும் என தெரிவித்துள்ளார்.

கோவில்பட்டியில் இருந்து தென்காசியின் திருமலைக்கோயிலை நோக்கி தனியார் பேருந்து ஒன்று சென்று கொண்டிருந்தது. எதிர் முனையில் தென்காசியில் இருந்து ராஜபாளையம் நோக்கி மற்றொரு தனியார் பேருந்து சென்று கொண்டிருந்தது. மதுரை டூ கொல்லம் தேசிய நெடுஞ்சாலையில் கடையநல்லூர் அருகே உள்ள துரைச்சாமியாபுரம் என்ற கிராமத்தில், இரண்டு பேருந்துகளும் நேருக்கு நேர் மோதியது. இந்த விபத்தில் சம்பவ இடத்திலேயே 5 பெண்கள் உள்பட 6 பேர் பலியாகினர். படுகாயம் அடைந்தவர்களை மருத்துவமனைக்கு கொண்டு செல்லும் வழியில் மேலும் ஒருவர் உயிரிழந்தார்.

இந்த கோர விபத்தில் ஆலங்குளத்தைச் சேர்ந்த கற்பகவல்லி என்ற பெண்மணியும் உயிரிழந்தது குறிப்பிடத்தக்கது. கற்பகவல்லிக்கு இரண்டு பெண் குழந்தைகள் உள்ளனர். ஏற்கனவே கணவரை இழந்த இவர், தற்போது விபத்தில் உயிரிழந்ததால் இரண்டு பெண் குழந்தைகளும் துணையின்றி நிற்கின்றனர்.

இந்நிலையில் வாசுதேவநல்லூர் எம்எல்ஏ சதன் திருமலை குமார் விபத்தில் இறந்த கற்பகவல்லி வீட்டிற்கு சென்று, அவரின் இரண்டு பெண் குழந்தைகள் மற்றும் உறவினர்களை நேரில் சந்தித்து ஆறுதல் தெரிவித்தார். அப்போது ஆதரவற்று நிற்கும் 2 பெண் குழந்தைகளின் எதிர்காலத்திற்கு தமிழக அரசு உதவி செய்ய வேண்டும் என உறவினர்கள் எம்எல்ஏ-விடம் கோரிக்கை வைத்தனர்.

ஏற்கனவே உடல் நலக்குறைவால் தந்தையை இழந்த குழந்தைகள், தற்போது விபத்தில் தாயையும் இழந்து கண்ணீரில் மூழ்கியுள்ளனர். குழந்தைகளின் முழு கல்விச் செலவையும் அரசே ஏற்க வேண்டும் எனவும், வீடு இல்லாத நிலையில் அதற்கும் அரசே ஏற்பாடு செய்ய வேண்டும் எனவும் உறவினர்கள் கண்ணீர் மல்க கோரிக்கை வைத்துள்ளனர்.

இந்த விபத்தில் புளியங்குடி டி.என்.புதுக்குடியைச் சேர்ந்த மாற்றுத்திறனாளி இளம் பெண்ணின் தாயான மல்லிகாவும் உயிரிழந்தார். இவருடைய தந்தை ஏற்கனவே இறந்த நிலையில், தற்போது தாயும் இறந்ததால் ஆதரவற்று தவிக்கும் மாற்றுத்திறனாளி இளம் பெண் கீர்த்திகாவிற்கு சொந்த நகராட்சியிலேயே அரசு வேலையை வழங்கியுள்ளது தமிழக அரசு.

தென்காசியில் ஏற்பட்ட இந்த கோர விபத்து காரணமாக இரண்டு பேருந்துகளின் உரிமமும் ரத்து செய்யப்பட்டுள்ளதாக தமிழ்நாடு வருவாய் மற்றும் பேரிடர் மேலாண்மை துறை அமைச்சர் கே.கே.எஸ்.எஸ்.ஆர். ராமசந்திரன் தெரிவித்துள்ளார். மேலும் தனியார் பேருந்துகள் இதுபோல் அதிவேகமாக இயக்கப்படுவதை கட்டுப்படுத்த விரைவில் நடவடிக்கை எடுக்கப்படும் எனவும் அவர் உறுதியளித்தார்.