ஏ.டி.எம் கார்டில் இந்த சின்ன குறியீடு இருக்கா? பின் நம்பர் இல்லாமலேயே பணம் செலுத்தலாம்!

இன்றைய நவீன வங்கியியல் சூழலில் பெரும்பாலான மக்களிடமும் ஏ.டி.எம். (டெபிட் மற்றும் கிரெடிட்) கார்டுகள் பயன்பாட்டில் உள்ளன. பொருட்களை வாங்கும்போது கடையிலிருக்கும் இயந்திரத்தில் கார்டை உள்ளே நுழைத்து (Insert), நான்கு இலக்க PIN எண்ணைத் தட்டச்சு செய்து பணம் செலுத்தும் பழைய முறையைத்தான் இன்னமும் பெரும்பாலானோர் கடைப்பிடித்து வருகின்றனர்.

ஆனால், தற்காலத்தில் வங்கிகள் புதிதாக வழங்கும் அல்லது புதுப்பித்துத் தரும் பெரும்பாலான ஏ.டி.எம். கார்டுகளில் 'காண்டாக்ட்லெஸ்' (Contactless) எனும் நவீன வசதி இணைக்கப்பட்டு வருகிறது. ஆனால், அந்தக் கார்டுகளைப் பயன்படுத்துகிறவர்களில் அனேகம் பேருக்கு இது குறித்துத் தெரிந்திருப்பதில்லை.

ஏ.டி.எம். கார்டில் இப்படி ஒரு வசதி இருப்பதையோ, அதைப் பயன்படுத்தி PIN எண்ணே இல்லாமல் பணம் செலுத்த முடியும் என்பதையோ அறியாதவர்கள் இன்றைக்கும் ஏராளமானோர் உள்ளனர். அதனால் அவர்களின் கார்ட் காண்டாக்ட்லெஸ் கார்டாக இருந்தாலுமே அது குறித்து அவர்களுக்குத் தெரியாது.

உங்கள் கார்டு காண்டாக்ட்லெஸ் கார்ட்தானா? கண்டறிவது எப்படி?

நீங்கள் டெபிட் & / கிரெடிட் கார்டு பயன்படுத்துகிறவரா? உங்களுக்கு காண்டாக்ட்லெஸ் கார்ட் பற்றித் தெரிந்திருந்தால் நல்லது. இல்லை எனில் உங்கள் ஏ.டி.எம். கார்டை எடுத்துப்பாருங்கள். கார்டின் முன்பகுதியில், வைஃபை (Wi-Fi) சிக்னல் போன்ற நான்கு வளைந்த அலைவரிசைக் குறியீடு அச்சிடப்பட்டிருக்கிறதா? அந்தக் குறியீடு இருந்தால், அது 'காண்டாக்ட்லெஸ்' வசதி கொண்ட கார்டு ஆகும். இந்தக் குறியீடு இல்லையென்றால், அது வழக்கமான சாதாரண ஏ.டி.எம். கார்டு.

இன்னும் உறுதியாகத் தெரிந்துகொள்ள, உங்கள் வங்கியின் மொபைல் செயலி (Mobile App), நெட் பேங்கிங் அல்லது வங்கிக் கிளையைத் தொடர்புகொண்டும் சரிபார்த்துக் கொள்ளலாம்.

எப்படி இயங்குகிறது இந்தத் தொழில்நுட்பம்?

இவ்வகைக் கார்டுகளுக்குள் மிகச் சிறிய 'NFC' (Near Field Communication) சிப்பும், நுண் அலைவாங்கியும் பொருத்தி அனுப்பப்படுகின்றன.

கடைகளில் உள்ள கட்டணச் செலுத்து இயந்திரத்தின் (POS Machine) அருகில் கார்டைக் கொண்டு சென்று லேசாகத் தொட்டாலே போதும்; அது ரேடியோ அலைவரிசை மூலம் இயங்கி, PIN எண் எதுவுமின்றி பணப் பரிவர்த்தனையை முடித்துவிடும். இந்த செயல்முறை Tap & Pay எனப்படுகிறது.

பாதுகாப்பு அம்சம்:

இங்கு நினைவில் கொள்ளவேண்டிய முக்கிய அம்சம் - ஒவ்வொரு முறை நீங்கள் கார்டை Tap செய்து பணம் செலுத்தும்போதும், ஒரு பிரத்யேகப் பாதுகாப்புக் குறியீடு (Dynamic Cryptogram) உருவாக்கப்படுகிறது. இதனால், பழைய காந்தப் பட்டை (Magnetic Strip) கார்டுகளைப் போல இந்தத் தரவுகளை அப்படியே நகலெடுத்து (Skimming) மீண்டும் பயன்படுத்திப் பணத்தைத் திருடுவது மிகக் கடினம்.

விதிமுறைகளும் எல்லைகளும் (RBI Rules)

இந்திய ரிசர்வ் வங்கியின் (RBI) விதிமுறைகளின்படி, PIN எண் இல்லாமல் 'Tap & Pay' முறையில் ஒரு பரிவர்த்தனைக்கு அதிகபட்சமாக ₹5,000 வரை மட்டுமே பணம் செலுத்த முடியும்.

₹5,000-க்கு மேற்பட்ட தொகைக்கோ அல்லது தொடர்ச்சியாகப் பல பரிவர்த்தனைகள் நடைபெறும் போதோ, பாதுகாப்பு கருதி வழக்கம்போலக் கார்டை நுழைத்து PIN எண் தட்டச்சு செய்வது கட்டாயமாக்கப்பட்டுள்ளது.

கார்டு தொலைந்தால் என்ன நடக்கும்?

கார்டு தொலைந்துவிட்டாலோ அல்லது யாரேனும் திருடிவிட்டாலோ, உங்களின் வங்கியிலிருக்கும் சேமிப்பு முழுவதையும் ஒரே நிமிடத்தில் யாராலும் சுருட்டிவிட முடியாது.

1. ஏ.டி.எம்-மில் பணம் எடுக்க முடியாது: கார்டைப் பயன்படுத்தி ஏ.டி.எம். இயந்திரத்தில் ரொக்கமாகப் பணம் எடுக்க வேண்டுமென்றால், கார்டை நுழைத்து PIN உள்ளீடு செய்தே ஆகவேண்டும். PIN இல்லாமல் ஏ.டி.எம்-மில் பணம் வராது.

2. குறைந்த அளவுப் பொருட்களையே வாங்க முடியும்: PIN இல்லாமலேயே கடைகளில் சிறிய அளவிலான பணப் பரிவர்த்தனைகளை மட்டுமே செய்ய முடியும் என்பதால், கார்டு தொலைந்தால் ஏற்படும் இழப்பு என்பது ரிசர்வ் வங்கி நிர்ணயித்த ₹5,000 வரம்பிற்குள் மட்டுமே இருக்கும்.

'ரிலே தாக்குதல்' (Relay Attack) எனும் சிக்னல் திருட்டு:

காண்டாக்ட்லெஸ் கார்டுகளில் கோட்பாட்டு ரீதியாகச் சாத்தியமான ஒரு நுட்பமான திருட்டு முறை இது. உதாரணமாக, பேருந்து அல்லது ரயில் கூட்ட நெரிசலில் உங்களை ஒட்டி நிற்கும் ஒரு திருடன், தன் கையிலிருக்கும் சிக்னல் கருவி வழியே உங்கள் பையிலிருக்கும் கார்டின் ரேடியோ அலைவரிசையைப் படிப்பான்.

அந்தச் சிக்னலை அப்படியே இணையம் வழியே தூரத்தில் உள்ள ஒரு கடையில் நிற்கும் தன் கூட்டாளியின் போனுக்கு அனுப்புவான். அந்தப் போனை கடையில் உள்ள இயந்திரத்தில் தொட்டு, உங்கள் கணக்கிலிருந்து பணத்தை எடுக்க முயற்சிப்பார்கள்.

கேட்பதற்கு பயமாக இருந்தாலும், நடைமுறையில் இத்தகைய திருட்டுகள் நடப்பது மிக மிக அரிது. ஏனெனில், இதற்கு மிக அதிநவீனத் தொழில்நுட்பக் கருவிகள் தேவைப்படுவதோடு, கார்டு மிக அருகில் இருக்கவேண்டும்.

நாம் செய்யவேண்டிய பாதுகாப்புக் கடமைகள்

தொழில்நுட்பம் நமக்கு வசதியைத் தரும் அதே வேளையில், சுயவிழிப்புணர்வே நமக்கான முதன்மை பாதுகாப்பு அரண்.

· அடிப்படை முன்னெச்சரிக்கை: கார்டை எப்போதும் பாதுகாப்பாக வைத்திருப்பது, கார்டை யாருக்கும் கொடுக்காமல் இருப்பது, கார்டின் தரவுகளைப் பாதுகாப்பது ஆகியவை முக்கியம். கார்டின் மேல் அச்சிடப்பட்டுள்ள கார்டு எண், காலாவதி தேதி மற்றும் CVV எண்களைப் பிறர் பார்க்காதவாறு கவனம் கொண்டிருக்கவும்.

· வசதியை முடக்குதல் அல்லது வரம்பைக் கட்டுப்படுத்துதல்: கார்டில் இத்தகைய தொடுதலற்ற வசதி உங்களுக்குத் தேவையில்லை என்றாலோ அல்லது அதன் தினசரி வரம்பைக் குறைக்க விரும்பினாலோ, உங்களின் வங்கியின் மொபைல் செயலி (Mobile Banking App) அல்லது நெட் பேங்கிங் வழியாக 'Manage Card / Contactless Payment' பகுதிக்குச் சென்று அதைச் செய்துகொள்ளலாம்.

· உடனடி நடவடிக்கை: கார்டு தொலைந்துவிட்டால், அது தெரியவந்த அடுத்த கணமே, வங்கியின் வாடிக்கையாளர் சேவை மையத்தையோ அல்லது மொபைல் செயலியையோ தொடர்புகொண்டு கார்டை உடனடியாக முடக்க (Block) வேண்டும்.

புதிய தொழில்நுட்ப வசதிகளைப் பற்றித் தெளிவாக அறிந்து வைப்பதும், தேவைக்கேற்ப அவற்றைப் பாதுகாப்பாகப் பயன்படுத்துவதுமே நமது பணத்திற்கும் சேமிப்பிற்கும் உண்மையான கவசமாகும்!