வால் இழந்து விண்கல்லாக மாறப்போகிறதா? விஞ்ஞானிகளை வியக்க வைக்கும் 'என் கே வால் நட்சத்திரம்'!

சூரியனுக்கு மிக அருகில் சென்று தன் பனிப்படலத்தை இழந்து வரும் விண்வெளி அதிசயத்தின் கதை.
என் கே - Space Science Tamil
என் கே - Space Science TamilImage credit: Gemini
கலைமதி சிவகுரு

கலைமதி சிவகுரு, 1983-ல் நாகர்கோவில் ஹோலி கிராஸ் கல்லூரியில் பட்டம் பெற்றவர். இவரது படைப்புகள் மங்கையர் மலர், தேவதை, தினத்தந்தி குடும்ப மலர் இதழ்களில் வெளியாகிப் பரிசுகள் பெற்றுள்ளன. தற்போது கல்கி குழுமத்தில் எழுதுகிறார். சமையல், ஆன்மிக வாசிப்பு, தையல் கலையில் ஆர்வம் கொண்டவர்.

Updated on: 

வால் நட்சத்திரங்கள் என்பது பல நூற்றாண்டுகளான ஆண்டுகளுக்கு ஒருமுறை வானில் தோன்றும் அபூர்வ நிகழ்வு என்ற எண்ணம் பலரிடம் உண்டு. ஹாலியின் வால் நட்சத்திரம் போன்ற பிரபலப் பொருட்கள் நம் வாழ்வில் ஒரு முறை மட்டுமே காணக்கூடியவை. ஆனால் அவ்வாறில்லாமல் மிக குறைவான காலத்தில் ஒரு விசித்திரமான வால் நட்சத்திரம் உள்ளது. அதுவே என் கே வால் நட்சத்திரம் (Comet Encke) ஆகும்.

இந்த வால் நட்சத்திரம் முதன் முதலில் 1786 ஆம் ஆண்டு பிரெஞ்சு வானவியலாளர் பியர் மெச்சின் (Pierre Mechain) என்பவரால் கண்டறியப் பட்டது. அதனைத் தொடர்ந்து 1795 மற்றும் 1805 ஆண்டுகளிலும் இது வெவ்வேறு அறிவியலாளர்களால் கவனிக்கப்பட்டது.

எனினும், இவை தனித்தனி வால் நட்சத்திரங்கள் அல்ல; ஒரே வால் நட்சத்திரம்தான் குறிப்பிட்ட கால இடைவெளியில் மீண்டும் மீண்டும் வருகிறது என்பதை ஜெர்மன் வானவியலாளரான ஜோஹன் ஃபிரான்ஸ் என்கே (Johann Franz Encke) 1819 ஆம் ஆண்டில் தனது கடுமையான கணிதக் கணக்கீடுகள் மூலம் உறுதிப்படுத்தினார்.

இவரது துல்லியமான ஆராய்ச்சிக்குப் பெருமை சேர்க்கும் வகையிலேயே இதற்கு ‘என் கே வால் நட்சத்திரம்’ என்று பெயரிடப்பட்டது.

சுற்றுப்பாதையும் அதன் தனித்துவமான சிறப்புகளும் என்னவெனில் நம் சூரிய மண்டலத்தில் இதுவரை மனிதர்களால் கண்டறியப்பட்ட அனைத்து வால் நட்சத்திரங்களிலும் மிகக் குறைவான சுற்றுப்பாதை காலத்தைக் கொண்டது இதுவே ஆகும். இது சூரியனை ஒருமுறை சுற்றிவர வெறும் 3.3 ஆண்டுகள் (தோராயமாக 3 ஆண்டுகள் 4 மாதங்கள்) மட்டுமே எடுத்துக்கொள்கிறது.

இதன் சுற்றுப்பாதை நீள்வட்ட வடிவில் உள்ளது. இதன் அண்மைப் புள்ளி புதன் கிரகத்தின் சுற்றுப்பாதைக்கு அருகில் சூரியனை நெருங்குகிறது; இதன் சேய்மைப் புள்ளி வியாழன் கிரகத்தின் சுற்றுப்பாதையைத் தாண்டிச் செல்கிறது.

இது சூரியனுக்கு மிக அருகில் அடிக்கடி செல்வதால், அதன் பனி மற்றும் வாயுப் படலங்கள் வேகமாக ஆவியாகி வருகின்றன. இதனால் எதிர்காலத்தில் இது தனது வால் பகுதியை இழந்துவிட்டு ஒரு சாதாரண விண்கல்லாக மாறக்கூடும் என்று விஞ்ஞானிகள் கணிக்கின்றனர்.

இதையும் படியுங்கள்:
நாம் தினமும் பயன்படுத்தும் காலிங் பெல் எப்படி கண்டுபிடிக்கப்பட்டது தெரியுமா?
என் கே - Space Science Tamil

வால் நட்சத்திரங்கள் சூரியனை நெருங்கும்போது அவற்றுள் உள்ள பனி உருகி, தூசு மற்றும் பாறைக் துகள்களைத் தனது சுற்றுப்பாதையில் பின்னால் விட்டுச் செல்கின்றன. என் கே வால் நட்சத்திரம் கடந்த காலங்களில் விட்டுச்சென்ற இத்தகைய குப்பைகள் மற்றும் தூசுப்படலத்தின் ஊடாக பூமி தனது சுற்றுப்பாதையில் ஆண்டுதோறும் அக்டோபர் மற்றும் நவம்பர் மாதங்களில் கடந்து செல்கிறது.

இந்தத் தூசுத்துகள்கள் பூமியின் வளிமண்டலத்துடன் மோதி எரியும்போது, அது டாரிட் (Taurids) விண்கற்கள் பொழிவு என அழைக்கப்படுகிறது. இந்த நிகழ்வின் போது வானில் பல ஒளிக்கோடுகள் மற்றும் எரிநட்சத்திரங்களைக் காணமுடியும்.

இதன் அறிவியல் முக்கியத்துவம் என்னவெனில் வானியல் ஆராய்ச்சியாளர் களுக்கு என் கே வால் நட்சத்திரம் ஒரு மிக முக்கிய ஆய்வுப் பொருளாகும். சூரிய மண்டலத்தின் தொடக்கக் காலப் பொருள்கள் எவ்வாறு சூரிய வெப்பத்தாலும் கதிர்வீச்சினாலும் சிதைவடைகின்றன என்பதை அறிய இது பெரிதும் உதவுகிறது.

என் கே - Space Science Tamil
என் கே - Space Science TamilImage credit: Gemini

மேலும், இது ஒரு சிறிய உட்கருவைக் (Nucleus) கொண்டிருப்பதால், விண்கலங்கள் மூலம் எதிர்காலத்தில் ஆராய்வதற்கு மிகவும் சாதகமான இலக்காகவும் கருதப்படுகிறது.

வான்வெளியின் பிரம்மாண்டமான ரகசியங்களுக்கு மத்தியில், என் கே வால் நட்சத்திரம் தன் குறுகிய சுற்றுப்பாதையின் மூலம் காலத்தின் சுழற்சியை நமக்கு நினைவூட்டுகிறது. நீண்ட காத்திருப்பு இல்லாமல் வானியலாளர்களை அடிக்கடி சந்திக்கும் இந்தப் பயணி, சூரிய மண்டலத்தின் பரிணாம வளர்ச்சியைப் புரிந்துகொள்ள நமக்குக் கிடைக்கும் ஒரு அற்புதமான சான்றாகும்.

இதையும் படியுங்கள்:
மண்ணுக்குள் பூக்கும் விசித்திர மலர்: தாய்லாந்து காட்டில் கண்டறியப்பட்ட 'டெவில் ஃப்ளவர்'!
என் கே - Space Science Tamil