Subscribe
- முகப்பு
- கல்கி
- மங்கையர் மலர்
- தீபம்
- கோகுலம்/Gokulam
- முக்கிய பிரிவுகள்முக்கிய பிரிவுகள்
- தொகுப்புகள்தொகுப்புகள்
- PremiumPremium
ஒருவர் ஆன்லைனில் ஆயிரம் யூரோ கொடுத்து ஒரு புதிய ஸ்மார்ட்போனை வாங்குகிறார். பெட்டி புத்தம் புதியது. வெளிப்புறத்தில் எந்தக் கீறலும் இல்லை. சீலும் சரியாக இருக்கிறது. ஆனால் அந்தப் பெட்டிக்குள் இருப்பது உண்மையில் ஏற்கெனவே பயன்படுத்தப்பட்ட போன் என்றால் அவருக்கு எப்படி இருக்கும்?
ஐரோப்பாவில் இத்தகைய ஒரு மிகப்பெரிய ஆன்லைன் மோசடி தற்போது வெளிச்சத்துக்கு வந்துள்ளது. அதிர்ச்சியூட்டும் முறையில் 10 லட்சத்துக்கும் அதிகமான பயன் படுத்தப்பட்ட மொபைல் போன்கள் “புதியவை” என்று விற்பனை செய்யப்பட்டிருக்கலாம் என்று தெரிய வந்துள்ளது.
இதன் காரணமாக ஐரோப்பிய ஒன்றிய நுகர்வோருக்கு ஏற்பட்டிருக்கக்கூடிய இழப்பு குறைந்தது 300 மில்லியன் யூரோ (இந்திய மதிப்பில் சுமார் 3000 கோடி ரூபாய்) என்றும், பல நாடுகளுக்கு ஏற்பட்ட VAT வரி இழப்பு 30 மில்லியன் யூரோவுக்கும் அதிகம் என்றும் ஐரோப்பிய பொது வழக்குத் தொடர்வு அலுவலகம் தெரிவித்துள்ளது.
பழைய பாகங்களில் உருவான ‘புதிய’ போன்கள்
‘டிரோஜா” என்று பெயரிடப்பட்டுள்ள இந்தப் புலனாய்வு விசாரணையின்படி, பயன்படுத்தப்பட்ட மொபைல் போன்களின் உதிரிபாகங்கள் ஹாங்காங் மற்றும் ஐக்கிய அரபு அமீரகம் உள்ளிட்ட இடங்களில் சேகரிக்கப்பட்டு, அவற்றைக் கொண்டு போன்கள் மீண்டும் அசெம்பிள் செய்யப்பட்டதாகக் கூறப்படுகிறது.
பின்னர் அந்த சாதனங்கள் சுத்தம் செய்யப்பட்டு, புதிய போன்களைப் போல பேக்கிங் செய்யப்பட்டன. இதன் பிறகு அவை நெதர்லாந்துக்கு அனுப்பப்பட்டதாக விசாரணை அதிகாரிகள் கூறுகின்றனர். அங்கிருந்து ஜெர்மனியில் உள்ள கிடங்குகளுக்கு கொண்டு செல்லப்பட்டு, பல்வேறு ஆன்லைன் சந்தைகள் மூலம் ஐரோப்பிய ஒன்றிய நாடுகளில் உள்ள வாடிக்கையாளர் களுக்கு விற்கப்பட்டதாகவும் தெரிய வருகிறது.
இதில் முக்கியமான கேள்வி எழுகிறது: ஏன் நெதர்லாந்து?
நெதர்லாந்து – ஒரு ‘டிரான்சிட் ஹப்”
நெதர்லாந்து ஐரோப்பாவின் மிக முக்கியமான சரக்கு மற்றும் வர்த்தக மையங்களில் ஒன்று. உலகின் பல பகுதிகளில் இருந்து வரும் பொருட்கள் இங்கு வந்து, பின்னர் ஐரோப்பாவின் பிற நாடுகளுக்கு செல்லும் மிகப்பெரிய விநியோக வலையமைப்பைக் கொண்டுள்ளது.
எனவே, இந்த புது மெருகூட்டிய பழைய மொபைல் போன்கள் நெதர்லாந்தில் தயாரிக்கப்படவில்லை; மாறாக, பிற நாடுகளில் பழைய பாகங்களைக் கொண்டு அசெம்பிள் செய்யப்பட்ட மொபைல் போன்கள் நெதர்லாந்து வழியாக ஜெர்மனிக்கும் அங்கிருந்து ஐரோப்பிய சந்தைக்கும் சென்றதாக விசாரணை தெரிவிக்கிறது.
இந்த வழக்கில் இன்னும் சிக்கலான பகுதி “வாட் வரி மோசடி ஆகும். பழைய பொருட்கள் விற்பனைக்கான வாட் வரிச்சலுகையைப் பயன்படுத்தி, வரி ஏய்ப்பு செய்துவிட்டு, பழிய மொபைல் போன்களி புதிது என்று மார்க்கெட்டில் விற்பனை செய்யப்பட்டிருக்கும் மோசடி இப்போது அம்பலமாகி உள்ளது. 2018ம் ஆண்டிலிருந்தே இந்த மோசடி நடந்திருக்கலாம் என்ற சந்தேகமும் எழுந்துள்ளது.
19 நாடுகளில் அதிரடி நடவடிக்கை
19 ஐரோப்பிய நாடுகளில் 160-க்கும் மேற்பட்ட இடங்களில் சோதனைகள் மற்றும் பறிமுதல் நடவடிக்கைகள் மேற்கொள்ளப்பட்டன. சுமார் 1,770 போலீஸ், சுங்கம் மற்றும் வரித்துறை அதிகாரிகள் இந்த அதிரடி நடவடிக்கையில் ஈடுபட்டனர். ஆஸ்திரியா, ஜெர்மனி, ஸ்பெயின் ஆகிய நாடுகளில் ஏழு சந்தேக நபர்கள் கைது செய்யப்பட்டனர்.
இந்த விசாரணை இன்னும் முடிவடையவில்லை. எந்தெந்த நிறுவனங்கள், விற்பனையாளர்கள், ஆன்லைன் தளங்கள் மற்றும் சாதனங்கள் முழுமையாக இதில் தொடர்புபட்டுள்ளன என்பது குறித்து அதிகாரிகள் தொடர்ந்து விசாரித்து வருகின்றனர்.
இந்தச் சம்பவம் ஒரு முக்கியமான பாடத்தைச் சொல்கிறது: ஆன்லைனில் ஒரு பொருளின் பெட்டி புத்தம் புதியதாக இருப்பது மட்டும், அந்தப் பொருளும் உண்மையில் புதியது என்பதற்கு உத்தரவாதம் அல்ல. குறிப்பாக விலை உயர்ந்த மொபைல் வாங்கும்போது விற்பனையாளர் யார், warranty எங்கிருந்து வருகிறது, IMEI/serial number சரியாக உள்ளதா, சாதனத்தின் வரலாறு என்ன என்பதையும் கவனிப்பது அவசியம்.
