ஒரு சொட்டு திரவம் போதும்... உங்க குழந்தை பல் சொத்தை பிரச்சனைக்கு முற்றுப்புள்ளி!

சிறிய குழந்தைகளுக்குப் பற்களில் ஏற்படும் பாதிப்புகள் பெற்றோருக்கு மிகப்பெரிய மன உளைச்சலைக் கொடுக்கின்றன. வழக்கமாகப் பல் மருத்துவமனைக்குச் சென்றாலே டிரில்லிங் மற்றும் ஊசி போடும் பயத்தில் குழந்தைகள் அலறுவார்கள். ஆனால் இப்போது எந்தவித வலியும் இல்லாமல் பற்களைக் காப்பாற்ற ஒரு எளிய திரவ மருந்து வந்துவிட்டது.

பயமில்லாத எளிய மருத்துவ முறை!

சில்வர் டைஅமைன் ஃபுளோரைடு (Silver Diamine Fluoride - SDF) எனப்படும் இந்த திரவ மருந்தை ஒரு சிறிய பஞ்சு மூலம் பாதிக்கப்பட்ட பல்லின் மீது தடவினால் போதுமானது. வெறும் சில வினாடிகளில் இந்த சிகிச்சையை மிகச் சுலபமாக முடித்துவிடலாம். இதில் பற்களைக் குடைவதோ அல்லது குழந்தைகளை மயக்க நிலைக்குக் கொண்டு செல்வதோ தேவையில்லை.

சிறிய குழந்தைகளுக்கு ஏற்படும் பல் சொத்தை பிரச்சனையை ஆரம்பத்திலேயே கட்டுப்படுத்த இந்த மருந்து பெரிதும் உதவுகிறது. அமெரிக்காவில் உள்ள மிச்சிகன் பல்கலைக்கழகம் (University of Michigan) நடத்திய விரிவான ஆய்வில் 38% வீரியமுள்ள இந்தத் திரவம் பாதிப்பு அடைந்த பற்களை மேலும் கெட்டுப்போகாமல் தடுத்து நிறுத்துவது துல்லியமாக நிரூபிக்கப்பட்டுள்ளது.

ஆராய்ச்சி முடிவுகள் சொல்லும் உண்மை!

பேராசிரியர் மார்கரிட்டா ஃபோன்டானா (Margherita Fontana) தலைமையிலான குழுவினர் 6 வயதிற்குட்பட்ட 830 குழந்தைகளிடம் 2018 ஆம் ஆண்டு முதல் இந்த ஆய்வை மேற்கொண்டனர். தொடர்ச்சியாக 6 மாதங்களுக்கு ஒருமுறை இந்த திரவத்தைத் தடவி வந்தபோது பாதிக்கும் மேற்பட்ட பற்களில் சொத்தை பரவுவது உடனடியாகக் கட்டுப்படுத்தப்பட்டது.

பற்களை அகற்றாமல் அதன் மேல் பகுதியிலேயே இந்த திரவத்தைத் தடவுவது மிகவும் பாதுகாப்பான வழிமுறையாகும். இருப்பினும் இந்த மருந்தை வைக்கும்போது பாதிக்கப்பட்ட பல்லின் பகுதி நிரந்தரமாகக் கருமை நிறமாக மாறிவிடும் என்ற ஒரு சிறிய குறைபாடும் இதில் உள்ளது. ஆனால் வலியுடன் ஒப்பிடும்போது இது பெரிய விஷயம் இல்லை.

மருத்துவத்துறையின் புதிய மைல்கல்!

மருத்துவ ஆராய்ச்சி நிறுவனமான NIH இந்த ஆய்விற்காக 12 மில்லியன் டாலர்களுக்கு மேல் நிதி வழங்கி உதவக்கூறி உள்ளது. இந்த ஆய்வின் தரவுகள் மூலம் அமெரிக்க FDA அமைப்பின் முறையான ஒப்புதலைப் பெற முடியும் என்று ஆராய்ச்சியாளர் அம்ர் முர்சி (Amr Moursi) மிகவும் நம்பிக்கையுடன் கூறுகிறார்.

எளிமையான பயன்பாடு & பலன்கள்!

பால் பற்கள் தானாக விழும் வரை அவற்றை வலி இல்லாமல் வைத்திருக்க இந்த முறை உதவுகிறது. குறிப்பாக மாற்றுத்திறனாளி குழந்தைகள் மற்றும் பல் மருத்துவமனைக்குச் செல்லப் பயப்படும் முதியவர்களுக்கும் இந்த எளிய திரவச் சிகிச்சை ஒரு சிறந்த வரப்பிரசாதமாக அமையும் என்பதில் எவ்வித மாற்றுக் கருத்தும் இல்லை.

குழந்தைப் பருவத்தில் தோன்றும் பல் சொத்தை பாதிப்பை ஆரம்பத்திலேயே தடுத்து நிறுத்துவது அவர்களின் ஒட்டுமொத்த உடல் ஆரோக்கியத்திற்கும் நல்லது. வலி நிறைந்த அறுவை சிகிச்சைகளுக்கு மாற்றாக வந்துள்ள இந்த எளிய திரவ சிகிச்சை எதிர்காலத்தில் பல் மருத்துவத் துறையில் ஒரு மிகப்பெரிய மாற்றத்தைக் கொண்டுவரும் என எதிர்பார்க்கலாம்.

Reference