மனிதர்களின் கண்களில் பச்சை நிறம் உருவாவது எப்படி.. பரிணாம வளர்ச்சி கூறும் ஆச்சரியமான ரகசியம்!

Green eyes science: ஒரு பெரிய கூட்டத்தில் நீங்கள் எவ்வளவு தீவிரமாகத் தேடிப் பார்த்தாலும், பச்சை நிறக் கண்கள் கொண்ட ஒருவரைக் கண்டுபிடிப்பது மிக மிகக் கடினமான விஷயமாகும். இதற்குக் காரணம், உலகில் வெறும் 2 சதவீத மக்கள் மட்டுமே இந்த அபூர்வமான பச்சை நிறக் கண்களைக் கொண்டுள்ளனர். பொதுவாகப் பார்த்தால், உலக மக்கள் தொகையில் 79 சதவீத மக்களுக்குப் பழுப்பு நிறக் கண்களும், 8 முதல் 10 சதவீத மக்களுக்கு நீல நிறக் கண்களும் உள்ளன. 

மனித வரலாற்றின் ஆரம்பக் காலகட்டங்களில் எல்லா மக்களுக்கும் கருமையான கண்கள், முடி மற்றும் சருமம் மட்டுமே இருந்தன என்று பழங்கால மரபணு ஆய்வுகள் ஆணித்தரமாகக் கூறுகின்றன. மூவாயிரம் ஆண்டுகளுக்கு முன்பு வரை ஐரோப்பியர்கள் கூட அடர்த்தியான நிறத்தையே கொண்டிருந்தனர்.

அப்படியென்றால் இந்த வெளிர் நிறக் கண்கள் எப்படி மனிதர்களிடம் உருவாகின, அதுவும் பச்சை நிறக் கண்கள் ஏன் இவ்வளவு அரிதாக உள்ளன என்பதைத் தெரிந்து கொள்ளலாம் வாங்க.

வெளிச்சம் Vs மூளையின் செயல்பாடு!

 இதற்கு முதல் காரணமாக அறிவியலாளர்கள் கூறுவது நரம்பியல் மற்றும் சூரிய ஒளி தொடர்பான விஷயங்களைத்தான். வெளிர் நிறக் கண்கள் இயற்கையாகவே அதிக ஒளியை உள்ளே அனுமதிக்கின்றன. குளிர்காலத்தில் பல மாதங்கள் கடும் இருட்டிலேயே வாழும் வட ஐரோப்பிய மக்களுக்கு இது மிகவும் உதவியாக இருந்துள்ளது. 

மார்க் லுகாக் (Mark Lucock) என்ற ஆராய்ச்சியாளர் தனது ஆய்வில், கண்களுக்குள் செல்லும் ஒளி நமது மூளையில் உள்ள பீனியல் சுரப்பியைத் தூண்டி, மெலடோனின் அளவையும் தூக்கச் சுழற்சியையும் நேரடியாகக் கட்டுப்படுத்துகிறது என்று தெளிவாகக் கூறியுள்ளார். 

இருட்டினால் ஏற்படும் குளிர்கால மனச்சோர்வு என்பது பழங்காலத்தில் வேட்டையாடி வாழ்ந்த மனிதர்களுக்கு ஒரு பெரிய தடையாக இருந்தது. அந்த மனச்சோர்வில் இருந்து தப்பிக்கவே, இயற்கையான பரிணாம வளர்ச்சி இப்படிப்பட்ட வெளிர் நிறக் கண்களை மனிதர்களுக்கு உருவாக்கியிருக்கலாம் என்று நம்பப்படுகிறது.

மரபணு மாற்றம்! 

இரண்டாவது காரணம் மிகவும் சுவாரஸ்யமானது. ஒரு பெரிய கூட்டத்தில் ஒருவருக்கு மட்டும் வித்தியாசமான நிறத்தில் கண்கள் இருந்தால், அது மற்றவர்களை மிக எளிதாக ஈர்க்கும். இந்த அதீத ஈர்ப்பின் காரணமாக, பல தலைமுறைகளாக வெளிர் நிறக் கண்கள் கொண்டவர்களுக்கான துணையைத் தேடும் ஆர்வம் மக்களிடையே பல மடங்கு அதிகரித்தது. 

இது OCA2 மற்றும் HERC2 ஆகிய இரண்டு முக்கிய மரபணுக்களில் பெரிய மாற்றத்தை ஏற்படுத்தியது. குறிப்பாக நமது 15வது குரோமோசோமில் உள்ள இந்த மரபணுக்கள் தான் கண்களின் நிறத்தை முழுமையாக முடிவு செய்கின்றன. தற்செயலாக நடந்த மரபணு மாற்றம் மட்டுமின்றி, மக்களின் அழகியல் விருப்பமும் இந்த நிறம் உலகளவில் பரவ ஒரு மிக முக்கியக் காரணமாக அமைந்துள்ளது.

பச்சை நிறத்தின் ரகசியம்!

உண்மையில் மனிதர்களின் கண்களில் பச்சை நிறமிகள் கிடையவே கிடையாது. கண்களின் கருவிழியில் உள்ள நடுத்தர அளவிலான மெலனின், லிபோக்ரோம் (Lipochrome) எனப்படும் தனித்துவமான மஞ்சள் நிறமி மற்றும் வானத்தை நீல நிறமாகக் காட்டும் அதே ஒளியியல் விதியான ரேலே சிதறல் (Rayleigh Scattering) ஆகிய மூன்றும் மிகத் துல்லியமாக இணையும்போதுதான் கண்கள் பார்வைக்குப் பச்சையாகத் தெரிகின்றன. இதில் எந்த ஒரு சிறிய மரபணு மாற்றம் நடந்தாலும் கண்கள் பழுப்பு அல்லது நீல நிறமாக மாறிவிடும்.

பச்சை நிறக் கண்கள் இயற்கையின் ஒரு அற்புதமான தற்செயல் நிகழ்வு எனலாம்.