அடேங்கப்பா... மனிதர்களைப் போலவே ரோபோக்களுக்கும் வந்துடுச்சு ஆம்புலன்ஸ்!

மனிதர்களுக்கு உடல்நிலை சரியில்லை என்றால் உடனடியாக மருத்துவமனைக்கு அழைத்துச் செல்ல ஆம்புலன்ஸ்கள் உள்ளன. ஆனால் எதிர்காலத்தில் வீடுகளிலும் அலுவலகங்களிலும் வேலை செய்யும் இயந்திர மனிதர்கள் திடீரென பழுதாகிவிட்டால் என்ன செய்வது என நீங்கள் எப்போதாவது யோசித்திருக்கலாம். 

இதற்கான ஒரு அற்புதமான தீர்வை தொழில்நுட்பத்தில் எப்போதுமே முன்னோடியாகத் திகழும் ஜப்பான் நாடு தற்போது வெற்றிகரமாகக் கண்டுபிடித்துள்ளது. இயந்திர மனிதர்கள் நம்முடைய அன்றாட வேலைகளை எளிதாக்கப் போகின்றன என்பது உறுதியாகிவிட்ட நிலையில் அவற்றின் தடையற்ற சேவைக்கு இது போன்ற புதிய கண்டுபிடிப்புகள் மிக அவசியமாகின்றன.

புதிய பழுதுபார்க்கும் வாகனம்!

டோக்கியோ நகர வீதிகளில் இனி மனிதர்களுக்காக மட்டுமின்றி இயந்திரங்களுக்காகவும் பிரத்யேகமாக வடிவமைக்கப்பட்ட அவசர வாகனங்கள் வலம் வர உள்ளன. GMO Internet Group என்ற பிரபல தகவல் தொழில்நுட்ப நிறுவனம் இந்த அட்டகாசமான புதிய வாகனத்தை உலகிற்கு அறிமுகம் செய்துள்ளது. 

இது பார்ப்பதற்கு ஊதா நிற விளக்குகள் பொருத்தப்பட்ட சாதாரண வாகனம் போலத் தோன்றினாலும் உள்ளே மடிக்கணினிகள் மற்றும் பல நவீன கருவிகள் உள்ளன. ஜப்பானில் இதுவே முதல் முறையாக அறிமுகப்படுத்தப்பட்ட பிரத்யேக சேவையாகும். இந்த வாகனத்தில் எந்த ஒரு கடினமான பழுதையும் சரிசெய்யக்கூடிய அதிநவீன உபகரணங்கள் மிகவும் நேர்த்தியாகப் பொருத்தப்பட்டுள்ளன.

மாற்று இயந்திர மனிதன்! 

இந்த ரோபோ ஆம்புலன்ஸ் உள்ளே பழுதுபார்க்கும் பொறியாளர்கள் மற்றும் உதிரிபாகங்கள் மட்டுமின்றி ஒரு மாற்று இயந்திர மனிதனும் எப்போதுமே தயார் நிலையில் வைக்கப்பட்டிருக்கும். வாடிக்கையாளர் இடத்தில் வேலை செய்யும் இயந்திரம் பழுதானால் உடனடியாக இந்த மாற்று இயந்திரம் அந்தப் பணியைத் தொடர்ந்து செய்யும். 

பழுதான இயந்திரத்தை அங்கேயே சரிசெய்வார்கள் அல்லது பெரிய பழுது என்றால் தங்களது பிரத்யேக பழுதுபார்க்கும் மையத்திற்கு பாதுகாப்பாக எடுத்துச் சென்று சரிசெய்வார்கள். Shota Takizawa என்ற முன்னணி பொறியாளர் இந்தத் திட்டத்தின் முக்கியப் பொறுப்பில் இருக்கிறார். இயந்திரங்கள் வேலை செய்யாத நேரத்தால் ஏற்படும் தொழில் நஷ்டத்தைத் தவிர்க்கவே இந்தச் சேவை கொண்டுவரப்பட்டுள்ளது.

சந்தைப் போட்டி! 

GMO Air நிறுவனத்தின் தலைமைச் செயல் அதிகாரி Tomohiro Uchida இந்த புதிய சேவையை மிகுந்த பெருமையுடன் அறிமுகப்படுத்தியுள்ளார். வாடிக்கையாளர்களின் வேலை பாதிக்கப்படக் கூடாது என்பதற்காகவே மாற்று இயந்திரம் வழங்கும் ஐடியா வந்ததாக அவர் குறிப்பிட்டுள்ளார். 

தற்போது அமெரிக்கா மற்றும் சீனா போன்ற நாடுகள் அதிநவீன இயந்திர மனிதர்கள் தயாரிப்பில் அரசாங்க ஆதரவுடன் மிகக் கடுமையான போட்டியில் ஈடுபட்டுள்ளன. சீனா தங்களுக்கென தனி விநியோகச் சங்கிலியை உருவாக்கி பெரும் முதலீடுகளைச் செய்து வருகிறது. அமெரிக்க நிறுவனங்கள் செயற்கை நுண்ணறிவு மென்பொருளில் அதீத கவனம் செலுத்தி சந்தையை ஆக்கிரமிக்கத் துடிக்கின்றன.

எதிர்காலம்! 

உலக அளவில் செயற்கை நுண்ணறிவு தொழில்நுட்பத்தில் முன்னணியில் இருக்க ஜப்பான் அரசு பல தீவிரமான நடவடிக்கைகளை எடுத்து வருகிறது. வரும் 2040 ஆம் ஆண்டிற்குள் சுகாதாரம் மற்றும் உணவு தயாரிப்பு உட்பட 18 முக்கியத் துறைகளில் சுமார் 10 மில்லியன் இயந்திர மனிதர்களைப் பயன்பாட்டிற்கு கொண்டு வர அந்த நாட்டு அரசாங்கம் இலக்கை நிர்ணயித்துள்ளது. 

2040 ஆம் ஆண்டுக்குள் உலகளாவிய ரோபாட்டிக்ஸ் சந்தை சுமார் 370 பில்லியன் டாலர் மதிப்பை எட்டும் என McKinsey கணித்துள்ளது. இந்த மாபெரும் தொழில் புரட்சியில் ஜப்பான் தனது பாரம்பரிய உற்பத்தித் திறனைப் பயன்படுத்தித் தனக்கென ஒரு மாபெரும் சாம்ராஜ்யத்தை உருவாக்கத் திட்டமிட்டுள்ளது. ஆரம்பக் கட்டத்தில் 1 வாகனம் மட்டுமே டோக்கியோ தலைமையகத்தில் இருந்தாலும் விரைவில் இதன் எண்ணிக்கை அதிகரிக்கப்படும்.

இயந்திர மனிதர்களின் பயன்பாடு வீடுகளிலும் தொழிற்சாலைகளிலும் அதிகரிக்கும்போது இதுபோன்ற பிரத்யேகமான ரோபோ ஆம்புலன்ஸ் சேவைகள் உலகெங்கிலும் மிக முக்கியமான அத்தியாவசியத் தேவையாக மாறும். தொழில்நுட்பம் அசுர வேகத்தில் வளர்ந்து வரும் நிலையில் அடுத்த சில ஆண்டுகளில் நமது ஊர் வீதிகளிலும் இது போன்ற விசித்திரமான அவசர வாகனங்களை நாம் சாதாரணமாக நேரில் பார்க்கும் காலம் வெகு தொலைவில் இல்லை.