செகண்ட் ஹேண்டில் வித்தாலும் செம லாபம்.. 2026ல் சக்கப்போடு போடும் 5 அட்டகாசமான EV!

பெட்ரோல் விலை நாளுக்கு நாள் உச்சத்தைத் தொட்டு வரும் இந்த காலத்தில், பலரும் எலக்ட்ரிக் ஸ்கூட்டர்கள் பக்கம் தங்களது கவனத்தைத் திருப்பி வருகின்றனர். வண்டி ஓட்டுவதற்கு மிகவும் ஸ்மூத்தாகவும், பராமரிப்புச் செலவு குறைவாகவும் இருப்பதால் இது பலருக்கும் பிடித்துப் போய்விட்டது. ஆனாலும், சில வருடங்கள் கழித்து பேட்டரி வீணாகிவிட்டால் சுமார் 40,000 ரூபாய் முதல் 90,000 ரூபாய் வரை செலவாகுமே என்ற ஒரு பெரிய தயக்கம் மக்கள் மத்தியில் நிலவுகிறது. 

இந்தப் பயத்தை முழுமையாகப் போக்குவதற்காகவே, முன்னணி நிறுவனங்கள் இப்போது தங்களது பேட்டரிகளுக்கு 8 ஆண்டுகள் வரை பிரம்மாண்டமான வாரண்டியை அள்ளிக் கொடுக்கின்றன. 2026 ஆம் ஆண்டில் நீங்கள் தைரியமாக வாங்கக்கூடிய சிறந்த எலக்ட்ரிக் ஸ்கூட்டர்களைப் பற்றி தெரிந்துகொள்ளலாம் வாங்க. 

ஓலா மற்றும் ஏத்தரின் அதிரடி ஆஃபர்கள்!

இந்திய இவி சந்தையில் ஓலா (Ola) மற்றும் ஏத்தர் (Ather) ஆகிய இரண்டு நிறுவனங்களும் வாடிக்கையாளர்களைக் கவரப் பல அசத்தலான திட்டங்களை வழங்கி வருகின்றன. ஓலா எஸ்1 சீரிஸ் (Ola S1 Series) வாகனங்களில் அடிப்படையில் மூன்று வருட வாரண்டி வழங்கப்படுகிறது.

ஆனால், நாம் சிறிதளவு கூடுதல் தொகையைச் செலுத்துவதன் மூலம் இதனை 8 வருடங்கள் அல்லது அதிகபட்சமாக 1,25,000 கிலோமீட்டர் வரை சுலபமாக நீட்டித்துக்கொள்ள முடியும். S1 Pro, S1 Air மற்றும் S1 X மாடல்களுக்கு இந்த சூப்பர் வசதி உள்ளது.

ஏத்தர் நிறுவனத்தைப் பொறுத்தவரை, ஏத்தர் 450எக்ஸ் (Ather 450X) மற்றும் ரிஸ்டா (Rizta) மாடல்களில் ஏய்ட்70 (Eight70) என்ற அட்டகாசமான திட்டத்தைக் கொண்டு வந்துள்ளனர். எட்டு வருடங்கள் அல்லது 80,000 கிலோமீட்டர் வரை வாரண்டி கொடுப்பதோடு, பேட்டரியின் ஆரோக்கியம் 70 சதவீதத்திற்குக் கீழ் குறைந்தால் முற்றிலும் இலவசமாகப் புதிய பேட்டரியை மாற்றித் தருவதாக அவர்கள் உறுதியளிக்கிறார்கள்.

சிம்பிள் ஒன் வழங்கும் சலுகைகள்!

அதிக ரேஞ்ச் கொடுக்கும் ஸ்கூட்டராக அறியப்படும் சிம்பிள் ஒன் (Simple One), வாடிக்கையாளர்களின் நம்பிக்கையைப் பெற பேட்டரி வாரண்டியை வண்டியின் விலையோடு இணைத்தே வழங்குகிறது. சிம்பிள் எனர்ஜி நிறுவனம் வழங்கும் இந்த 8 வருட வாரண்டி திட்டம் மிகவும் பயனுள்ள ஒன்று. இருப்பினும், நீங்கள் ஷோரூமுக்குச் சென்று பணம் செலுத்துவதற்கு முன், அங்குள்ள டீலரிடம் அந்த நேரத்தில் உள்ள வாரண்டி நிபந்தனைகளை ஒருமுறை தெளிவாகக் கேட்டுத் தெரிந்துகொள்வது மிகவும் சிறந்தது.

ஹீரோ விடா மற்றும் டிவிஎஸ்!

ஹீரோ விடா வி1 (Hero Vida V1) மற்றும் டிவிஎஸ் ஐகியூப் (TVS iQube) ஸ்கூட்டர்கள் தங்களின் நம்பகத்தன்மைக்காகப் பலராலும் விரும்பப்படுகின்றன. இந்த இரு நிறுவனங்களும் தங்களது வாகனங்களுக்கு எவ்வித மறைமுகக் கட்டணமும் இன்றி, நிலையான 5 ஆண்டுகள் அல்லது 60,000 கிலோமீட்டர் பேட்டரி வாரண்டியைத் தருகின்றன. 

இதில் ஹீரோ விடா ஒருபடி மேலே சென்று, தங்களது வாரண்டியை அடுத்த உரிமையாளருக்கும் மாற்றிக்கொள்ளும் வசதியை அளிக்கிறது. இதனாலேயே, எதிர்காலத்தில் நீங்கள் வண்டியை செகண்ட் ஹேண்டில் விற்றால் கூட உங்களின் கைக்கு ஒரு அருமையான தொகை திரும்பக் கிடைக்கும்.

ஒரு புதிய எலக்ட்ரிக் வாகனம் வாங்குவதற்கு முன்பு வண்டியின் தோற்றம், வேகம் மற்றும் ரேஞ்ச் ஆகியவற்றை மட்டுமே பார்ப்பது சரியான முறை கிடையாது. வண்டியின் இதயமாக விளங்கும் பேட்டரியின் ஆயுட்காலம் மற்றும் நிறுவனங்கள் வழங்கும் வாரண்டி விதிமுறைகளை மிகக் கவனமாகப் படித்துப் பார்க்க வேண்டும்.