போன் சார்ஜர் நெருப்பு மாதிரி கொதிக்குதா.. வெடிக்கும் முன் இதை உடனே படிங்க!

மொபைல் போன் சார்ஜ் போடும்போது சார்ஜர் சூடாவது நாம் அனைவரும் அன்றாடம் சந்திக்கும் ஒரு சாதாரண விஷயம். இதை பலரும் பெரிதாக எடுத்துக்கொள்வதில்லை. ஆனால், இந்த சின்ன விஷயத்திற்குப் பின்னால் பெரிய ஆபத்து ஒளிந்திருக்கிறது என்பதை நாம் உணர வேண்டும். 

ஹுவாய் (Huawei) போன்ற முன்னணி நிறுவனங்கள் இது குறித்து சில முக்கிய தகவல்களைப் பகிர்ந்துள்ளன. சார்ஜர் ஏன் இப்படி நெருப்பாகக் கொதிக்கிறது, இதனால் போனுக்கு என்ன பாதிப்பு வரும், இதை எப்படித் தடுப்பது என்பது பற்றி இந்தப் பதிவில் பார்க்கலாம்.

சார்ஜர் சூடாவதற்கான முக்கிய காரணங்கள்!

சார்ஜர் சூடாவதற்குப் பல அறிவியல் மற்றும் நடைமுறைக் காரணங்கள் உள்ளன. மின்மாற்றம் நடக்கும்போது, அதாவது பிளக்கில் வரும் AC மின்சாரத்தை, போன் பேட்டரிக்குத் தேவையான DC மின்சாரமாக மாற்றும் போது இயற்கையாகவே கொஞ்சம் வெப்பம் வெளியாகும். இது இயல்பானது தான். ஆனால், ஃபாஸ்ட் சார்ஜிங் தொழில்நுட்பத்தைப் பயன்படுத்தும் போது இந்த வெப்பம் இன்னும் அதிகமாகும். 

இதைத் தவிர, தரம் குறைந்த அல்லது போலி சார்ஜர்கள், சேதமடைந்த கேபிள்கள் போன்றவற்றைப் பயன்படுத்துவதும் முக்கியக் காரணமாகும். மேலும், போனை சார்ஜில் போட்டுக்கொண்டே அதிக நேரம் கேம் விளையாடுவது, வீடியோ பார்ப்பது, காற்றோட்டம் இல்லாத இடத்தில் வைத்து சார்ஜ் செய்வது போன்ற தவறுகளாலும் Adapter கொதிக்கத் தொடங்குகிறது.

எப்போது ஆபத்து?

சார்ஜர் லேசாகச் சூடாவது பரவாயில்லை, ஆனால் தொட்டாலே சுடும் அளவுக்குக் கொதித்தால் அது மிகப்பெரிய ஆபத்தின் அறிகுறியாகும். பிளாஸ்டிக் கருகும் வாடை அடித்தால் அல்லது உள்ளே இருந்து ஏதேனும் விசித்திரமான சத்தம் வந்தால் உடனடியாக பிளக்கை அணைத்துவிட வேண்டும். 

சார்ஜரின் நிறம் மாறுவது, விட்டு விட்டுச் சார்ஜ் ஏறுவது மற்றும் மொபைல் திரையில் அதிக வெப்பம் குறித்த எச்சரிக்கை மெசேஜ் வருவது போன்றவை நிலைமை கைமீறிப் போவதைக் காட்டுகின்றன. இதை அப்படியே விட்டால் போன் வெடிக்கவும் வாய்ப்புள்ளது.

பாதுகாக்கும் எளிய வழிமுறைகள்!

இந்தச் சிக்கலில் இருந்து உங்கள் போனைப் பாதுகாக்கச் சில எளிய வழிமுறைகளைப் பின்பற்றினாலே போதும். எப்போதும் மொபைல் நிறுவனங்கள் வழங்கும் ஒரிஜினல் சார்ஜர்கள் மற்றும் கேபிள்களை மட்டுமே பயன்படுத்துங்கள். சார்ஜ் ஆகிக் கொண்டிருக்கும் போது எக்காரணம் கொண்டும் மொபைலைப் பயன்படுத்தாதீர்கள். போனையோ, சார்ஜரையோ தலையணைக்கு அடியிலோ அல்லது பெட்ஷீட் மேலோ வைக்கக் கூடாது. 

அதற்குப் பதிலாக, மேஜை போன்ற உறுதியான, குளிர்ச்சியான பரப்பின் மீது வைத்துச் சார்ஜ் செய்வது மிகவும் பாதுகாப்பானது. அதேபோல, இரவில் தூங்கும் போது போனை சார்ஜில் போட்டுவிட்டு விடிய விடிய அப்படியே விட்டுவிடுவதைக் கண்டிப்பாகத் தவிர்க்க வேண்டும்.

விலை உயர்ந்த நமது ஸ்மார்ட்போனைக் காப்பாற்றுவது நமது கைகளில் தான் உள்ளது. சிறிய கவனக்குறைவு கூடப் பெரிய விபத்துகளை ஏற்படுத்தலாம். மேலே சொன்ன இந்த எளிய குறிப்புகளை உங்களின் அன்றாட வாழ்வில் ஒரு பழக்கமாக மாற்றி வாருங்கள். உங்களின் மொபைல் போன் மற்றும் சார்ஜர் இரண்டுமே எந்த ஒரு பிரச்சினையும் இன்றிப் பல வருடங்களுக்குப் பாதுகாப்பாகவும் நீடித்து உழைக்கும்.