‘வலியச் சிறுத்தை’ எனப்படும் ஜாகுவார் பற்றி பலரும் அறியாத உண்மைகள்!

சர்வதேச ஜாகுவார் தினம் ஒவ்வொரு ஆண்டும் நவம்பர் 29 அன்று கொண்டாடப்படுகிறது. இது ஜாகுவார்களின் பாதுகாப்பு குறித்த விழிப்புணர்வை ஏற்படுத்துவதையும் அவற்றின் வாழ்விடங்களை பாதுகாப்பதற்கான முயற்சிகளை ஊக்குவிப்பதையும் நோக்கமாகக் கொண்டுள்ளது 2018 முதல் ஐக்கிய நாடுகள் சபையின் தலைமையகத்தில் நடந்த  ஜாகுவார் எல்லை நாடுகளின் கூட்டத்தில் எடுக்கப்பட்ட முடிவின்படி இந்த நாள் அனுசரிக்கப்படுகிறது.

உலகில் வாழக்கூடிய பெரும் பூனை இனம் ஜாகுவார் ஆகும். இது பூனை குடும்பத்தில் சிங்கம் மற்றும் புலிக்கு அடுத்தபடியாக மூன்றாவது பெரிய விலங்காக உள்ளது. இது சிறுத்தைகளை விட பெரியது. இது இந்தியா மற்றும் ஆசியப் பகுதிகளில் இல்லை. ஆகவே, இதற்கு தனியாக பெயர் கிடையாது. இருப்பினும் வலியச் சிறுத்தை என இது அழைக்கப்படுகிறது. அமெரிக்க கண்டத்தைப் பூர்வீகமாகக் கொண்ட விலங்கு ஜாக்குவார் ஆகும்.

மெக்சிகோ முதல் அர்ஜென்டினா வரை 18 நாடுகளை உள்ளடக்கிய லத்தீன் அமெரிக்காவில் ஜாகுவார் காணப்படுகின்றன. இதன் விருப்பமான வாழ்விடங்கள், பொதுவாக மழைக்காடுகள், சதுப்பு நிலங்கள் மற்றும் மரங்கள் நிறைந்த பகுதிகளாகும். இருப்பினும் புதர்களிலும் பாலைவனங்களிலும் இவை வாழ்கின்றன. தற்போது 64,000 ஜாக்குவார்கள் இருப்பதாகக் கணக்கிடப்பட்டுள்ளன. இந்த எண்ணிக்கையில் 89 சதவீதம் ஜாகுவார் அமேசான் நதிப் படுகையில் வாழ்கின்றன.

ஜாகுவாரின் அறிவியல் பெயர் பாந்தெரா ஓன்கா என்பதாகும். இதில் 3 துணை இனங்கள் மட்டுமே அங்கீகரிக்கப்பட்டுள்ளன. இதன் உடல் ஆரஞ்சு முதல் பழுப்பு நிறத்தில் காணப்படும். இதன் உடலில் ரோஜா போன்ற குறியீடுகள் உள்ளன. இதன் மையத்தில் ஒரு கருப்பு புள்ளியும் இருக்கும். இது புதர் மற்றும் புற்களில் மறைவதற்கு உதவுகிறது. இது ஆப்ரிக்கா மற்றும் ஆசியாவின் சிறுத்தை போன்ற வெளிப்புற தோற்றத்தைக் கொண்டுள்ளது. ஆனால், சிறுத்தைக்கு கரும்புள்ளி கிடையாது. நடுப்பகுதியில் நீண்ட கரும்புள்ளிகளின் வரிசை காணப்படும். தலை மற்றும் கழுத்தில் உள்ள புள்ளிகள் திடமானவை காலில் உள்ள புள்ளிகள் ஒன்றிணைந்து பட்டைகளைக் கொண்டுள்ளன.

ஆண் ஜாகுவார், பெண் ஜாகுவார்களை விட பெரியது. இது வால் உள்பட 5.6 அடி முதல் 9 அடி நீளம் வரை இருக்கும். இதன் உயரம் தோள்பட்டை வரை 68 முதல் 75 சென்டி மீட்டர் இருக்கும். உடல் எடை 68 முதல் 90 கிலோ வரை காணப்படும்.

ஜாகுவார் வேகமாக ஓடக்கூடிய விலங்கு. குறுகிய தூரத்திற்கு மணிக்கு 80 கிலோ மீட்டர் வேகத்தில் ஓடும். இது நீரில் நன்றாக நீந்தும் என அறியப்பட்டுள்ளது. இது பெரும்பாலும் இரவு மற்றும் அந்தி நேரத்தில் சுறுசுறுப்பாக இயங்கும். ஜாகுவார் மான்கள், பறவைகள், முதலைகள், ஆமைகள் மற்றும் மீன்களை வேட்டையாடும்.

மாடு போன்ற பெரிய உடலைக் கொண்ட விலங்கைக் கூட ஒரு மரத்தின் மேலே இழுத்துச் செல்ல இதனால் முடியும். இது வேட்டையாடிய விலங்கை ஒரு அடர்ந்த புதர் அல்லது வேறு மறைவான இடத்திற்கு இழுத்துச் செல்லும். பெண் ஜாகுவார் 1 முதல் 4 குட்டிக வரை ஈன்றெடுக்கும். குட்டிகள் மூடிய கண்களுடன் பிறக்கின்றன. இரண்டு வாரங்களுக்குப் பிறகே குட்டிகள் கண்களைத் திறக்கும். ஆறு மாதங்களுக்குப் பிறகு தாயுடன் செல்லும். குட்டிகள் இரண்டு ஆண்டுகள் வரை தாயுடன் வாழ்கின்றன. இதன் சராசரி ஆயுட்காலம் பதினொரு ஆண்டுகள். ஜாகுவார்கள் 22 ஆண்டுகள் வரை உயிர் வாழும்.

சர்வதேச ஜாகுவார் தினம் உலகெங்கும் கடைப்பிடிக்கப்படுகிறது. ஜாகுவார் வாழாத நாடுகளிலும் இத்தினம் கடைப்பிடிக்கப்படுகிறது. இந்தியாவில் உள்ள தேசிய விலங்கியல் பூங்காக்களிலும் இந்த தினம் கொண்டாடப்படுகிறது. பல்லுயிர் பெருக்கத்திற்கு அடையாளமாக ஜாகுவாரை பிரேசில் நாடு அங்கீகரித்துள்ளது. பிரேசில் நாட்டிலும் தேசிய ஜாகுவார் தினம் கொண்டாடப்படுகிறது.