அறிவியல் வளர்ச்சிக்கு தனது வருவாயில் பெரும் பகுதியை வழங்கிய இந்திய விஞ்ஞானி!

நம் வீட்டில் வளர்க்கும் செடி, கொடிகளைப் பார்த்து ரசிக்கிறோம், அதன் வளர்ச்சியை வியந்து பார்க்கும்போது, ‘அதற்கும் நம்மைப் போல உயிர் இருக்கிறதா? அவற்றிற்கும் நம்மைப் போல உணர்ச்சிகள் உண்டா’ என யோசித்து இருக்கிறோமா? ஆனால், அவற்றுக்கும் நம்மைப் போல உயிர் உண்டு என்பதை உணர்ந்து அதை உலகறியச் செய்தார் ஒரு இந்திய விஞ்ஞானி. அவர்தான் நவம்பர் 30, 1858ம் ஆண்டு விக்ரம்பூரில் அன்றைய இந்திய கிழக்கு வங்காளத்தில் (இன்றைய வங்காளதேசம்) பிறந்த சர்,ஜெகதீஷ் சந்திர போஸ். இவர்தான் விலங்குகள் மற்றும் தாவரங்கள் இரண்டும் பொதுவானவை என்பதை பரிசோதனை மூலம் நிரூபித்த முதல் இந்திய விஞ்ஞானி.

எதையும் உற்றுநோக்கும் குணமும், நிறைய விஷயங்களைத் தெரிந்துகொள்ள வேண்டும் என்ற ஆர்வமும் இயற்கையிலேயே அமையப்பெற்ற சந்திர போஸ் பட்டப்படிப்பை முடித்ததும் கேம்ப்ரிட்ஜ் பல்கலைக்கழகத்தில் அறிவியல் கற்றார். வைஸ்ராய் சிபாரிசுடன் கல்கத்தா மாநிலக் கல்லூரியில் பேராசிரியராக நியமிக்கப்பட்டார்.

இந்தியர்கள் திறன் குறைந்தவர்கள் என்ற பிரிட்டிஷ் அரசு, அதே பதவி வகிக்கும் ஆங்கிலேயரின் சம்பளத்தில் மூன்றில் ஒரு பங்குதான் கொடுக்கப்படும் என்றது. சரியென, போஸ் 3 ஆண்டுகள் சம்பளமே வாங்காமல் வேலை பார்த்தார். அறிவாற்றல், கற்பிக்கும் திறனால் பேரும் புகழும் பெற்றார். தவறை உணர்ந்த கல்வித் துறை, அவருக்கான 3 ஆண்டு ஊதியத்தையும் மொத்தமாக வழங்கியது.

இந்தப் பணத்தில் தனது வீட்டிலேயே ஆராய்ச்சிக்கூடம் அமைத்தார். தனது ஆயுள் முழுவதையும் ஆராய்ச்சிக்கே அர்ப்பணிப்பது என 1894ல் முடிவெடுத்தார். முதலில் மின்சாரம் பற்றி ஆராய்ந்தார். மின் அலைகள், கம்பிகளின் உதவியின்றி பொருட்களைக் கடந்து செல்லக்கூடியவை என்று கண்டறிந்தார். இதன் அடிப்படையில்தான் இத்தாலி நாட்டின் மார்கோனி வானெலி கண்டுபிடித்தார் என்பது குறிப்பிடத்தக்கது.

இவரது ஆராய்ச்சி தாவரவியல் பக்கம் திரும்பியது. தாவரங்கள் வெப்பம், குளிர், ஒளி, சத்தம் மற்றும் பல்வேறு வெளிப்புற தூண்டுதல்களுக்கும் எதிர்வினை ஆற்றுகிறது என்பதை அவர் உணர்ந்தார். பகவத் கீதையில், ‘நான் அனைத்து உயிர்களிலும் இருக்கிறேன்’ என்பது பகவான் கிருஷ்ணர் கூறியது. இதுவே இந்தக் கண்டுபிடிப்புக்கு உத்வேகம் அளித்தது என்று ஜெகதீஷ் சந்திர போஸ் பின்னர் குறிப்பிட்டுள்ளார்.

தாவரங்களும் உணர்ச்சிகளுக்கு ஆளாகின்றன என்னும் உண்மையை நிரூபிக்க போஸ் இரவு பகலாக பல ஆய்வுகளை மேற்கொண்டார். தாவரங்களின் செயல்பாடுகளை சில விலங்குகளின் செயற்பாடுகளுடன் ஒப்பிட்டு ஆய்வுகள் மேற்கொண்டார். தாவரங்களின் உணர்ச்சிகளைக் கண்டறிய போஸ் ஒரு கருவியைக் கண்டுபிடித்தார். அவைதான், ‘ரெஸனன்ட் ரெக்கார்ட்’, ‘கிரெஸ்கோகிராப்’ ஆகிய கருவிகள்.

இக்கருவி மூலம் தாவரங்கள் சுருங்கி விரிவதை நிரூபித்தார். அது அதன் உணர்ச்சி வெளிப்பாடு என்பதையும் கண்டறிந்தார். மனிதர்களைப் போலவே தாவரங்களும் நோய்களால் பாதிக்கப்படுவதையும் கண்டறிந்தார். தனது கண்டுபிடிப்புகளை 1902ம் ஆண்டு ‘The Reaction of Living and Non - living’ எனும் கட்டுரையை வெளியிட்டு தாவரங்களுக்கும் உயிர் உண்டு என்பதை உலகிற்கு எடுத்துரைத்தார். அந்தக் கட்டுரை உலகிற்கே வியப்பை அளித்தது.

அதன் பின்னர் அவர் எழுதிய ‘ரெஸ்பான்ஸ் இன் லிவிங் அண்ட் நான் லிவிங்’, ‘த நெர்வஸ் மெக்கானிஸம் ஆப் பிளான்ட்ஸ்’ ஆகிய 2 நூல்களும் இவருக்கு உலகப் புகழைப் பெற்றுத் தந்தன. இயற்கையின் நுண் உணர்வுகளையும் அதன் பல ரகசியங்களையும் கண்டுபிடித்து உலகறியச் செய்தமைக்கும் மற்றும் அறிவியல் உலகிற்கு அவர் ஆற்றிய சாதனைகளையும் பாராட்டி பிரிட்டிஷ் அரசு அவருக்கு புகழ் பெற்ற ‘சர்’ பட்டத்தை 1917ம் ஆண்டு வழங்கி கெளரவித்தது.

க்ரெஸ்கோகிராஃப், கிரிஸ்டல் டிடெக்டர், மின் காந்தவியல், உயிர் இயற்பியல், ஷார்ட்வேவ் ரேடியோ சிக்னல்கள் மற்றும் குறைக்கடத்திகள் ஆகியவற்றில் குறிப்பிடத்தக்க பங்களிப்புகள் செய்தது மட்டுமல்ல, கல்கத்தாவில் போஸ் ஆய்வு நிறுவனத்தை நிறுவியது, நுண்ணலைகளை உருவாக்கும் இயந்திரத்தை முதன் முதலில் வடிவமைத்தது, போட்டோகிராபிக் கோட்பாட்டை உருவாக்கியது என பல பெருமைகளுக்கு சொந்தக்காரர் போஸ். இதனால் பல நாடுகளின் அறிவியல் கழகங்களில் சொற்பொழிவுகள் நிகழ்த்தினார். இந்தியாவின் புகழ் உலகம் முழுவதும் பரவியது. பல பல்கலைக்கழகங்கள் டாக்டர் பட்டங்களை அவருக்கு வழங்கின. விருதுகள் குவிந்தன.

ஜெகதீஷ் சந்திர போஸ் தனது ஆண்டு வருமானத்தில் தனது அத்தியாவசியத் தேவைக்கு ஐந்தில் ஒரு பங்கை வைத்துக்கொண்டு எஞ்சிய தொகையை அறிவியல் பயிலும் மாணவர்களுக்கு செலவழித்தார். இந்திய நாட்டின் வளர்ச்சிக்காக பல லட்சம் ரூபாய் உயில் எழுதி வைத்த இந்த தேச பக்த விஞ்ஞானி, நவம்பர் 23, 1937ம் ஆண்டு தனது 79 வயதில் காலமானார்.