வாக்களிக்க தயாரா? முதல்ல இத படிங்க மக்களே!

இந்தியாவில் ஒவ்வொரு ஆண்டும் ஜனவரி 25 அன்று, ‘தேசிய வாக்காளர் நாள்’ (January 25: National Voters’ Day) கடைப்பிடிக்கப்பட்டு வருகிறது.

இந்தியா முழுவதும் தேர்தல்களை நடத்தி மேற்பார்வையிடும் அரசியலமைப்பான இந்தியத் தேர்தல் ஆணையம் தொடங்கப்பட்ட 1950 ஆண்டு, ஜனவரி 25 ஆம் நாளைக் கொண்டாடுவதுடன், மக்கள் வாக்களிப்பதைத் தங்கள் கடமையாகக் கருத வேண்டும் என்ற விழிப்புணர்வை மக்களிடையே ஏற்படுத்தும் நோக்கத்துடன், 2011 ஆம் ஆண்டு ஜனவரி மாதத்தில் அப்போதைய இந்தியப் பிரதமர் மன்மோகன் சிங் தலைமையில் நடந்த ஒன்றிய அமைச்சரவைக் கூட்டத்தில் முடிவு செய்யப்பட்டு, 2011 ஆம் ஆண்டு முதல் ஜனவரி 25 ஆம் நாளன்று ‘தேசிய வாக்காளர் நாள்’ கடைப்பிடிக்கப்பட்டு வருகிறது.

2011ஆம் ஆண்டு முதல் கொண்டாட்டத்தின் நோக்கமாக, புதிய வாக்காளர்களைச் சேர்ப்பதும், அண்மையில் வாக்காளர் பட்டியலில் இணைந்த அனைவரையும் சிறப்பிப்பது என்று அமைந்தது. அதனைத் தொடர்ந்து, தேசிய வாக்காளர் நாளில், பள்ளிகள், கல்லூரிகள், கிராமங்கள் மற்றும் நகரங்களிலிருக்கும் புதிய வாக்காளர்களைச் சேர்க்கும் விதமாக, நாடு தழுவிய விழிப்புணர்வு இயக்கமாகச் செயல்பட்டு வருகிறது.

தேசிய வாக்காளர் தினத்தின் முக்கிய நோக்கங்கள்:

• 18 வயது அல்லது அதற்கு மேற்பட்ட ஒவ்வொரு குடிமகனும் வாக்காளராகப் பதிவு செய்வதை உறுதி செய்தல்.

• பதிவு செய்யப்பட்ட வாக்காளர்களை வாக்குப்பதிவு நாளில் வந்து வாக்களிக்க ஊக்குவித்தல்.

• மக்கள் தங்கள் உரிமைகள், பொறுப்புகள் மற்றும் வாக்களிக்கும் செயல்முறையைப் புரிந்து கொள்ள உதவுதல்.

• வாக்களிப்பதற்கு லஞ்சம், அழுத்தம் மற்றும் பணம் அல்லது அதிகாரத்தைத் தவறாகப் பயன்படுத்துவதைத் தடுத்தல்.

இவற்றைச் செயல்படுத்த தேசிய வாக்காளர் நாள் உதவுகிறது. இந்திய மக்கள் தொகையில் பெரும் பகுதியினர் இளைஞர்களாக இருக்கின்றனர். இவர்களை வாக்காளர்களாக பதிவு செய்து, அடையாள அட்டையை வழங்கி, அவர்களை உண்மையான குடியுரிமைக்கான நுழைவுக்குக் கொண்டு வர இந்தியத் தேர்தல் ஆணையம் முயற்சிக்கிறது.

மேலும், தேசிய வாக்காளர் நாளில், முதல் முறை வாக்காளர்களின் மேல் சிறப்பு கவனம் செலுத்துகிறது. எதிர்காலத் தேர்தல்கள் அனைத்திலும் வாக்களிப்பதை உறுதி செய்யும் நோக்குடன் உறுதிமொழி எடுக்கவும், நல்ல சிந்தனையுடனும் நேர்மையுடனும், வாக்களிக்கவும் அவர்கள் வேண்டப்படுகிறார்கள். முதல் முறை வாக்காளர்கள் சரியாக வழி நடத்தப்படும் போது, அவர்கள் தங்கள் வாழ்நாள் முழுவதும் ஜனநாயகத்தில் சுறுசுறுப்பான மற்றும் பொறுப்பான பங்கேற்பாளர்களாக இருப்பதற்கான வாய்ப்புகள் அதிகம் என்று கருதப்படுகிறது.

வாக்களிப்பது என்பது வெறும் தேர்தல் எந்திரப் பொத்தானை அழுத்துவது அல்லது அதில் இடம்பெற்றுள்ள சின்னத்தை குறிப்பது மட்டுமல்லாமல், தேர்தல்கள் பொருளுள்ளதாக இருக்கவும், வாக்களிப்பு சுதந்திரமாகவும், நியாயமாகவும், தகவலறிந்ததாகவும் இருக்க வேண்டும். வாக்களிப்பு என்பது பயம், அழுத்தம், லஞ்சம் அல்லது பாகுபாடு இல்லாமல் ஒரு தேர்வை மேற்கொள்வதாகும். நியாயமான வாக்களிப்பு என்பது அனைத்து வேட்பாளர்களும் விதிகளைப் பின்பற்றுவதையும், நிர்வாகம் பாரபட்சமின்றி தேர்தல்களை நடத்துவதையும் குறிக்கிறது. தகவலறிந்த வாக்களிப்பு என்பது முடிவெடுப்பதற்கு முன்பு பிரச்சினைகள், கட்சிகள் மற்றும் வேட்பாளர்களைப் புரிந்து கொள்வதாகும்.

தேசிய வாக்காளர் நாள் கொண்டாட்டத்தில் கல்வி நிறுவனங்கள் பெரும் பங்கு வகிக்கின்றன. பள்ளிகள், கல்லூரிகள் மற்றும் பயிற்சி மையங்கள் வாக்களிப்பதன் முக்கியத்துவம் குறித்து சிறப்பு கூட்டங்கள், கருத்தரங்குகள் மற்றும் போட்டிகளை நடத்துகின்றன. வினாடி வினாக்கள், விவாதங்கள் மற்றும் கட்டுரைப் போட்டிகள் மாணவர்கள் வாக்காளர் பட்டியல்கள், ரகசிய வாக்குச்சீட்டுகள் மற்றும் ஒவ்வொரு வாக்கின் மதிப்பு போன்ற தலைப்புகளைப் புரிந்து கொள்ள உதவுகின்றன.

இவை தவிர, பொது இடங்களில் பேரணிகள், தெரு நாடகங்கள் மற்றும் சிறிய பொதுக் கூட்டங்கள் மாவட்ட நிர்வாகங்கள், சமூகக் குழுக்கள் மற்றும் இளைஞர் அமைப்புகளால் ஏற்பாடு செய்யப்படுகின்றன. இதில் பங்கேற்பாளர்கள் பெரும்பாலும் தூய்மையான வாக்களிப்பு, சம உரிமைகள் மற்றும் அரசியலில் சாதி அல்லது மத வெறுப்பை நிராகரித்தல் பற்றிய செய்திகள் இடம் பெறுகின்றன. கூடுதலாக, குடிமக்கள் ஒவ்வொரு தேர்தலிலும் வாக்களிப்பதாகவும், ஜனநாயக விழுமியங்களை மதிப்பதாகவும் கூட்டாக உறுதியளிக்கும் ஒரு முறையான வாக்காளர் உறுதிமொழி எடுத்துக் கொள்ளப்படுகிறது.

இன்றைய நாளில், மிகப்பெரிய ஊடகமாகத் திகழும் சமூக வலைத்தளங்களில் ‘தேசிய வாக்காளர் நாள்’ குறித்த செய்திகளையும், நோக்கங்களையும் அனைவரும் பகிர்ந்து இளைஞர்கள் மற்றும் மாணவர்களிடையே விழிப்புணர்வை ஏற்படுத்தலாம்.