பாட்டி வைத்தியம் என்ற பெயரில் நாம் செய்யும் 5 விபரீதங்கள்… நீங்களும் இதை செய்கிறீர்களா?

நமது வீடுகளில் யாருக்காவது உடம்பு சரியில்லை என்றால் உடனே மருத்துவமனைக்கு ஓடுவதை விட சமையலறையை தேடுவதுதான் நம்மில் பலருக்கும் வழக்கம். பாட்டி வைத்தியம் என்றாலே அது அமிர்தம் என நாம் கண்மூடித்தனமாக நம்புகிறோம். 

ஆனால் பல நூறு ஆண்டுகளாக நமது முன்னோர்கள் பின்பற்றி இன்று வரை நாமும் கைவிடாமல் தொடரும் சில வீட்டு வைத்தியங்கள் உண்மையில் உயிருக்கே ஆபத்தை விளைவிக்க கூடியவை. அறிவியல் இவ்வளவு வளர்ந்துவிட்ட இந்த காலகட்டத்திலும் நாம் அறியாமல் செய்யும் அந்த 5 பயங்கரமான தவறுகளை பற்றி தெரிந்துகொள்ளலாம் வாங்க.

1. தீக்காயங்களுக்கு பற்பசை தடவுவது!

சமையல் அறையில் சூடான பாத்திரம் பட்டு கை சுட்டுவிட்டால் உடனே நாம் தேடுவது ஃப்ரிட்ஜில் இருக்கும் வெண்ணெய் அல்லது பாத்ரூமில் இருக்கும் டூத்பேஸ்ட்டை தான். இது மிகவும் ஆபத்தான ஒரு பழக்கம் ஆகும். காயத்தின் மீது இவற்றை தடவும் போது அது உள்ளே இருக்கும் வெப்பத்தை வெளியேற விடாமல் தடுத்து தோலின் அடிப்புறத்தை மேலும் வேக வைக்கிறது. 

இதனால் காயம் ஆறுவதற்கு பதிலாக பெரிய கொப்புளங்களாக மாறி அதிக வலியை மட்டுமே ஏற்படுத்தும். சாதாரண குளிர்ந்த தண்ணீரை ஊற்றுவதே சிறந்த முதல் உதவி.

2. காயங்களில் ஸ்பிரிட் ஊற்றுவது!

கீழே விழுந்து முழங்காலில் சிராய்ப்பு ஏற்பட்டால் உடனே ஸ்பிரிட் அல்லது ஹைட்ரஜன் பெராக்சைடு ஊற்றி கழுவும் வழக்கம் பல வீடுகளில் இன்றும் உண்டு. அது நுரைத்து வருவதை பார்த்து கிருமிகள் அழிந்துவிட்டதாக நாம் நிம்மதி அடைகிறோம். 

ஆனால் அந்த ரசாயன திரவம் கிருமிகளை அழிப்பதோடு மட்டுமில்லாமல் புண்ணை ஆற்ற நினைக்கும் நமது உடலின் நல்ல செல்களையும் சேர்த்தே கொன்றுவிடுகிறது. இதனால் காயம் ஆறுவதற்கு அதிக நாட்கள் ஆவதோடு கொடூரமான தழும்புகளும் ஏற்படும்.

3. காதில் எண்ணெய் ஊற்றுவது!

நடு ராத்திரியில் காது வலி வந்தால் உடனே தேங்காய் எண்ணெயை சுட வைத்து அதில் பூண்டு போட்டு காதில் ஊற்றும் பழக்கம் இன்றும் நம்மிடையே தொடர்கிறது. இது செவிப்பறையை நிரந்தரமாக கிழித்துவிட கூடிய ஒரு விபரீதமான செயலாகும். காதுக்குள் ஏற்கனவே புண் அல்லது தொற்று இருந்தால் இந்த எண்ணெய் நேரடியாக அந்த கிருமிகளுக்கு உணவாக மாறி காதை முழுமையாக பழுதாக்கிவிடும் வாய்ப்பு உள்ளது.

4. ரத்தம் வரும் புண்ணில் காபி தூள் வைப்பது!

கத்தியால் ஆழமாக வெட்டிக்கொண்டு ரத்தம் கொட்டினால் உடனே காபி தூள், மஞ்சள் அல்லது மண்ணை எடுத்து காயத்தின் மீது அழுத்தி வைப்பார்கள். இது ரத்தத்தை நிறுத்துவது போல ஒரு மாயையை கொடுத்தாலும், இந்த பொருட்களில் உள்ள அழுக்கு மற்றும் கண்ணுக்கு தெரியாத பாக்டீரியாக்கள் நேரடியாக ரத்தத்தில் கலந்து மிகப்பெரிய பாதிப்பை உருவாக்கிவிடும்.

5. விஷம் குடித்தவரை வாந்தி எடுக்க வைப்பது!

தவறுதலாக ஏதேனும் கெமிக்கல் அல்லது விஷம் குடித்துவிட்டால் உடனே தொண்டையில் விரலை விட்டு வாந்தி எடுக்க வைப்பது நாம் செய்யும் மிகப்பெரிய தவறு. வாந்தி எடுக்கும் போது அந்த நச்சு ரசாயனம் மீண்டும் உணவு குழாயை கடந்து வரும்போது தொண்டையை கடுமையாக எரித்து சேதப்படுத்தும். சில நேரங்களில் அந்த திரவம் தவறுதலாக நுரையீரலுக்குள் சென்று உடனடி மூச்சுத்திணறலையும் ஏற்படுத்திவிடும்.

பாரம்பரியமாக வரும் எல்லா விஷயங்களும் எப்போதுமே நன்மையை மட்டுமே தரும் என நாம் குருட்டுத்தனமாக நம்ப கூடாது. காலத்திற்கு ஏற்பவும் அறிவியலின் வளர்ச்சிக்கு ஏற்பவும் நமது பழக்க வழக்கங்களை மாற்றி கொள்வது மட்டுமே விவேகமான செயல். பல நேரங்களில் சிறு சிறு பிரச்சனைகளுக்காக நாம் செய்யும் இந்த சுய வைத்தியங்கள் பெரிய ஆபத்துகளில் கொண்டு போய் விட்டுவிடும்.