குளவி கொட்டியவுடன் இந்த 3 பொருட்களைத் தேய்க்காதீர்கள்... உயிருக்கே ஆபத்தாகும் முக்கிய அறிகுறிகள்!

தோட்டத்திலோ அல்லது வெளியிடங்களிலோ நாம் இயல்பாக உலாவிக்கொண்டிருக்கும்போது, எதிர்பாராத விதமாகத் தேனீ, குளவி நமது சருமத்தில் கொட்டிவிடுவதுண்டு. அந்த நொடியில் ஏற்படும் எரிச்சலும் வலியும் நம்மை நிலைகுலையச் செய்துவிடும். உண்மையில் அந்த நேரத்தில் பதற்றப்படாமல் சரியான முதலுதவி முறைகளைப் பின்பற்றினால், விஷம் உடலில் பரவுவதைத் தடுத்துப் பெரிய பாதிப்புகளில் இருந்து நம்மை எளிதாகப் பாதுகாத்துக்கொள்ள முடியும்.

பாதுகாப்பு நடவடிக்கைகள்!

பூச்சி கொட்டியவுடன் முதலில் அந்த இடத்தை விட்டு பாதுகாப்பான பகுதிக்கு நகர்ந்து செல்வது அவசியம். தேனீக்கள் கொட்டும்போது அவற்றின் கொடுக்கு நமது சதையிலேயே தங்கிவிடும் தன்மை கொண்டது. எனவே, டெபிட் கார்டு போன்ற தட்டையான பொருளைக் கொண்டு சருமத்தைச் சுரண்டி அந்தக் கொடுக்கை உடனே வெளியேற்ற வேண்டும். அதேநேரம் குளவிகள் தங்களின் கொடுக்கைத் தோலில் விட்டுச் செல்வதில்லை என்பதால், நேரடியாக அடுத்தகட்டப் பராமரிப்புக்குச் சென்றுவிடலாம்.

கொடுக்கை நீக்கிய பிறகு, சுத்தமான குளிர்ந்த நீர், வீரியம் குறைந்த சோப்பு பயன்படுத்தி அந்தப் பகுதியை மென்மையாகக் கழுவ வேண்டும். இவ்வாறு செய்வது சருமத்தின் மேல் தங்கியிருக்கும் நச்சுக்களையும் நுண்ணுயிரிகளையும் அகற்றப் பெரிதும் துணைபுரியும். மேலும், கை விரல்களில் கொட்டியிருந்தால் உடனடியாக மோதிரம், வளையல்களைக் கழற்றிவிடுவது நல்லது, இல்லையெனில் வீக்கம் ஏற்பட்ட பிறகு அவற்றை அகற்றுவது மிகவும் கடினமாகிவிடும்.

வலியையும் வீக்கத்தையும் தணிக்க, சுத்தமான பருத்தித் துணியில் ஐஸ் கட்டிகளைச் சுற்றி சுமார் பதினைந்து நிமிடங்கள் வரை ஒத்தடம் கொடுக்கலாம். அடிபட்ட இடம் கை அல்லது கால்களாக இருந்தால், இரத்த ஓட்டத்தை சீராக்கி வீக்கத்தைக் குறைக்க அந்த பகுதியைச் சற்று உயரமாகத் தூக்கிப் படுக்க வைக்கவும். 

தவிர்க்க வேண்டிய தவறுகள்!

நம்மில் பலரும் அவசரத்தில் செய்யும் மிகப்பெரிய தவறு, சருமத்தில் உள்ள கொடுக்கை விரல்களாலோ அல்லது இடுக்காட்டியாலோ அழுத்திப் பிடுங்குவதுதான். அப்படிச் செய்யும்போது அதிலுள்ள நச்சுப்பை நசுங்கி, முழு விஷமும் இரத்தத்தில் வேகமாகக் கலந்துவிடும் அபாயம் உள்ளது. அதேபோல, எவ்வளவுதான் நமைச்சல் எடுத்தாலும் நகங்களால் சொறிவதைத் தவிர்க்க வேண்டும், ஏனெனில் அது பாக்டீரியா தொற்றுக்கு வழிவகுக்கும்.

கிராமப்புறங்களில் இன்றும் சிலர் பூச்சி கொட்டிய இடத்தில் சுண்ணாம்பு, ஈர மண், சாணம் அல்லது பழைய செப்பு நாணயங்களை வைத்துத் தேய்ப்பதை வழக்கமாகக் கொண்டுள்ளனர். இது முற்றிலும் அறிவியலுக்குப் புறம்பான மற்றும் ஆபத்தான செயலாகும். இத்தகைய பொருட்களில் இருக்கும் கண்ணுக்குத் தெரியாத கிருமிகள் காயத்தின் வழியாக உள்நுழைந்து, Tetanus உள்ளிட்ட தீவிரமான சருமப் பாதிப்புகளை உருவாக்கிவிடும் என்பதைப் புரிந்துகொள்ள வேண்டும்.

அவசர நிலையை அறிய வேண்டியது அவசியம்!

சிலருக்குப் பூச்சிகளின் விஷம் அனாபிலாக்ஸிஸ் (Anaphylaxis) எனப்படும் உயிருக்கு ஆபத்தான ஒவ்வாமை வினையை உண்டாக்கக்கூடும். நாக்கு மற்றும் தொண்டைப் பகுதி வீங்குதல், மூச்சுவிடுவதில் சிரமம், நெஞ்சு இறுக்கம், உடல் முழுவதும் சிவப்புத் தடிப்புகள் தோன்றுதல் ஆகியவை இதன் முக்கிய அறிகுறிகளாகும். இத்துடன் தலைச்சுற்றல், மயக்கம் ஏற்பட்டால், ஒரு நொடியும் தாமதிக்காமல் பாதிக்கப்பட்டவரை உடனடியாகத் தீவிர சிகிச்சைப் பிரிவுக்குக் கொண்டு செல்ல வேண்டும்.

இயற்கையோடு இணைந்து வாழும்போது இத்தகைய சிறு விபத்துகள் நிகழ்வது இயற்கையான ஒன்றுதான். ஆனால், மூடநம்பிக்கைகளைத் தவிர்த்துவிட்டு முறையான முதலுதவி வழிமுறைகளைக் கையாண்டால் தேவையற்ற மருத்துவச் சிக்கல்களைத் தவிர்க்கலாம்.

Reference