காபி பிரியர்களுக்கு அதிர்ச்சி தகவல்: சிகரி உண்மையில் ஆரோக்கியமானதா அல்லது ஆபத்தானதா?

நமக்கு காலையில் எழுந்தவுடன் ஒரு கப் திக்கான நல்ல ருசியுள்ள சிகரி கலந்த காப்பியை குடித்து விட்டால் நமக்குள் ஏற்படும் சுறுசுறுப்புக்கு அளவே கிடையாது. அவ்வளவு வேலைகளையும் அப்படி ஆனந்தமாக செய்து முடிப்போம்.

அப்படி சிகரி (Chicory) என்பது காபி பிரியர்களுக்கு மிகவும் பரிச்சயமான ஒரு பெயர். பொதுவாக பில்டர் காபி பொடிகளில் 20% முதல் 30% வரை சிகரி கலந்திருப்பதை நாம் பார்த்திருப்போம். ஆனால், இது வெறும் காபியின் சுவையை கூட்டுவதற்கோ அல்லது அதன் விலையைக் குறைப்பதற்கோ மட்டுமே பயன்படும் ஒரு பொருள் அல்ல. இதற்குப் பின்னால் பல ஆச்சரியமூட்டும் ஆரோக்கிய நன்மைகளும் சுவாரசியமான வரலாறும் உள்ளன.

​சிகரி பற்றிய சில அரிய மற்றும் வியப்பூட்டும் தகவல்கள் பற்றி இந்தப் பகுதியில் தெரிந்து கொள்ளலாம்.

காபியின் தோற்றத்தைக் கொண்ட ஒரு மூலிகை தாவரம்:

​சிகரி (Cichorium intybus) என்பது சூரியகாந்தி மற்றும் டேன்டேலியன் (Dandelion) தாவரக் குடும்பத்தைச் சேர்ந்த, அழகான நீல நிறப் பூக்களைக் கொண்ட ஒரு மூலிகையாகும். இதன் வேர்களை (Roots) அறுவடை செய்து, உலர்த்தி, வறுத்துப் பொடியாக்கும் போதுதான் அது அச்சு அசல் காபி தூள் போன்ற நிறத்தையும், நறுமணத்தையும், கசப்புச் சுவையையும் பெறுகிறது.

கஃபைன் இல்லாத காபி மாற்று:

​காபியில் உள்ள கஃபைன் உடல் நலத்திற்கு ஒத்துக் கொள்ளாதவர்கள் அல்லது காபி குடிப்பதை நிறுத்த நினைப்பவர்களுக்கு சிகரி ஒரு வரப்பிரசாதம். சிகரி வேரில் 0% கஃபைன் உள்ளது. எனவே, முற்றிலும் கஃபைன் இல்லாத காபி போன்ற ஒரு பானத்தைக் குடிக்க நினைப்பவர்கள் வெறும் சிகரிப் பொடியை மட்டும் கொண்டு 'சிகரி காபி' தயாரித்துக் குடிக்கிறார்கள். இது தூக்கத்தைக் கெடுக்காது என்பது ஆச்சரியமூட்டும் தகவல்.

​வயிற்று ஆரோக்கியத்திற்கான 'இனுலின்' நார்ப்பொருள்:

​புதிய சிகரி வேர்களில் சுமார் 68% இனுலின் (Inulin) என்ற ஒருவகை நீரில் கரையக்கூடிய நார்ப்பொருள் (Prebiotic Fiber) நிறைந்துள்ளது. இது நமது குடலில் உள்ள 'நல்ல பாக்டீரியாக்களை' (Microbiome) பலமடங்கு பெருக்குகிறது. செரிமானத்தை சீராக்கி, தீராத மலச்சிக்கல் (Constipation) மற்றும் வயிறு உப்புசப் பிரச்சனைகளை மிக எளிதாகக் குணமாக்குகிறது.

​சர்க்கரை நோய் மற்றும் கல்லீரலுக்கு நல்லது:

​சிகரியில் உள்ள இனுலின் நார்ப்பொருள் மற்றும் சில அமிலங்கள் (Chicoric acid), இரத்தத்தில் சர்க்கரையின் அளவை உடனடியாக அதிகரிக்காமல் கட்டுக்குள் வைக்க உதவுகின்றன. இது கல்லீரலில் பித்த நீர் (Bile) சுரப்பைத் தூண்டி, கொழுப்பு உணவுகள் எளிதில் செரிமானம் அடையவும், பித்தப்பைக் கோளாறுகளைத் தடுக்கவும் துணைபுரிகிறது. இன்சுலின் உணர்திறனை (Insulin Sensitivity) மேம்படுத்துவதாக ஆய்வுகள் கூறுகின்றன. மேலும், இது பித்த நீர் சுரப்பைத் தூண்டி, கல்லீரலில் உள்ள நச்சுகளை வெளியேற்ற (Liver Detox) பாரம்பரிய ஆயுர்வேத யுனானி மருத்துவத்தில் பயன்படுத்தப்படுகிறது.

நெப்போலியன் காலத்து சுவாரசியமான வரலாறு:

​பத்தொன்பதாம் நூற்றாண்டின் தொடக்கத்தில் பிரான்ஸ் நாட்டின் மன்னர் நெப்போலியன் போர்களின் காரணமாக காபி இறக்குமதிக்குத் தடை விதித்தார். காபி கிடைக்காமல் தவித்த பிரெஞ்சு மக்கள், அதற்கு மாற்றாக சிகரி வேர்களை வறுத்துப் பயன்படுத்தத் தொடங்கினர். பிற்காலத்தில் பிரெஞ்சுக்காரர்கள் மூலமாகவே இந்த சிகரி காபி கலாச்சாரம் உலகெங்கும் (இந்தியாவின் தென்பகுதிகள் உட்பட) பரவியது.

​இலைகளும் உண்ணக்கூடியவை:

​இதன் வேர் காபிக்கு பயன்படுவது போல, இதன் இலைகளும் ஐரோப்பிய நாடுகளில் 'எண்டிவ்' (Endive) அல்லது 'ரடிச்சியோ' என்ற பெயரில் சூப், சாலட்களில் கீரையாகப் பயன்படுத்தப்படுகின்றன. இதில் வைட்டமின் K, A, மற்றும் C சத்துக்கள் மற்றும் போலேட் (Folate), இரும்புச்சத்து போன்ற தாதுக்கள் மிக அதிகமாக நிறைந்துள்ளன என்பது கூடுதல் தகவல்.

கால்நடைத் தீவனம்:

​விவசாயத்தில் சிகரித் தாவரம் ஆடு, மாடு போன்ற கால்நடைகளுக்குச் சத்தான தீவனமாகப் (Forage crop) பயிரிடப்படுகிறது. இது கால்நடைகளின் செரிமானத்தை அதிகரித்து, பால் உற்பத்தியைப் பெருக்க உதவுகிறது.

• சிகரி என்பது வெறும் காபி மாற்றுப் பொருள் மட்டுமல்ல; அது குடல் நலம், கல்லீரல் தூய்மை, உடல் எடைக் கட்டுப்பாடு எனப் பல நன்மைகளைத் தரும் ஒரு சிறந்த மூலிகைப் பெட்டகமாகும்.

• நமது ஊர் பில்டர் காபிக்கு அந்தத் தடிமனான (Thick) தன்மையையும், தனித்துவமான நறுமணத்தையும் தருவதே இந்த சிகரிதான்! காபித் தூளில் கலக்கப்படுவதைத் தாண்டி, சிகரி (Chicory) தாவரத்தில் பலவிதமான மருத்துவ, உணவியல் மற்றும் விவசாயப் பயன்கள் நிறைந்துள்ளன. இதன் வேர், இலை மற்றும் பூக்கள் என அனைத்தும் வெவ்வேறு தேவைகளுக்குப் பயன்படுகின்றன என்பதே உண்மை.

• சிகரியில் உள்ள நார்ப்பொருள் வயிற்றை நீண்ட நேரம் நிறைவாக வைத்திருக்கச் செய்கிறது. இதனால் தேவையில்லாத பசி உணர்வு கட்டுப்படுத்தப்பட்டு, உடல் எடையைக் குறைக்க விரும்புவோருக்குச் சிறந்த உணவாக அமைகிறது.

• சிகரியிலிருந்து பிரித்தெடுக்கப்படும் இனுலின், சர்க்கரைக்கு மாற்றாக இனிப்புச் சுவை தரும் கலோரி குறைந்த பொருளாகப் பல பதப்படுத்தப்பட்ட உணவுகளில் பயன்படுத்தப்படுகிறது. இதன் ஆன்டி-ஆக்ஸிடன்ட் பண்புகள் கெட்ட கொழுப்பைக் (LDL) குறைத்து, உயர் இரத்த அழுத்தத்தைக் கட்டுப்படுத்த உதவுகின்றன.

இப்படி சிகரி பல நன்மைகளைக் கொண்டிருந்தாலும், அளவுக்கு அதிகமாக (தினமும் 20 கிராமுக்கு மேல்) எடுக்கும்போது வயிறு உப்புசம் அல்லது வாயுத் தொல்லையை ஏற்படுத்தலாம். மேலும், கர்ப்பிணிப் பெண்கள் சிகரியை அதிக அளவில் உட்கொள்வதைத் தவிர்ப்பது நல்லது என்பது சிகரி பற்றிய எச்சரிக்கை ஆகும்.

ஆக மொத்தம் சிக்கரியை ஒரு ஆகாத பொருள் என்று நினைத்திருந்தோம். இதைப் படித்த பிறகு இந்த எண்ணம் மாறுவதற்கு வாய்ப்பு உள்ளது.

மேலும் அதன் கதை சுவாரசியத்தை தெரிந்து கொள்வதில் இருந்து சிக்கிரியின் வளர்ச்சியை நன்றாக புரிந்து கொள்ள முடிகிறது. எல்லாவற்றிலும் நன்மை தீமை கலந்திருப்பது போல் சிகரியிலும் இருக்கிறது என்பதை இதன் மூலம் தெரிந்து கொள்ளலாம். இப்படி அதிக நன்மைகள் இதில் இருப்பதை நன்றாக உணர்ந்து கொள்ள முடிகிறது என்றாலும் 'அளவுக்கு மீறினால் அமிர்தமும் நஞ்சு' என்பதற்கு ஏற்ப அதை அளவோடு பயன்படுத்தி ஆரோக்கியம் காப்போமாக!

Reference