தூங்குவது என்றாலே பயப்படுபவர்களைப் பற்றித் தெரியுமா?

வயதானவர்கள் பலர் தூக்கம் வரவில்லை என்று புலம்புவதைக் கேட்டிருக்கலாம். மன அழுத்தத்தின் காரணமாக தூக்கம் வராமல் தவிப்பது உண்டு. ஆனால், தூக்கத்தை நினைத்து அஞ்சி, அதை தவிர்க்க நினைக்கும் மனிதர்களைப் பற்றி தெரியுமா? தூக்கத்தை நினைத்து பயப்படும் செயலுக்கு ‘சோம்னிஃபோபியா’ என்று பெயர். அது ‘ஹிப்னோபோபியா’ என்றும் அழைக்கப்படுகிறது.

சோம்னிஃபோபியாவின் அறிகுறிகள்:

கவலை: இந்த நோயால் பாதிக்கப்பட்டவர்கள் தூக்கம் அல்லது உறங்கும் நேரத்தை பற்றி நினைக்கும்போதே அதிக பதற்றத்தை உணர்வார்கள். அதனால் அவர்களுக்கு இதயம் வேகமாகத் துடிக்கும். மூச்சுத்திணறல் உண்டாகும். உடல் முழுவதும் வியர்த்துக் கொட்டும். ஏதாவது ஒரு ஆபத்தில் மாட்டிக் கொண்டால் அதை நினைத்து எப்படி அஞ்சுவார்களோ, அதேபோல, ஆபத்து அல்லது அழிவின் உணர்வு ஆகியவற்றால் பீடித்திருப்பதைப் போன்ற உணர்வை அனுபவிப்பார்கள்.

தூக்கத்தைத் தவிர்த்தல்: தூக்கத்தை தவிர்க்க நினைக்கும் இவர்கள், இரவில் நீண்ட நேரம் விழித்திருப்பார்கள். தூக்கம் குறித்த பயம் இவர்களுக்கு தூங்குவதில் சிரமத்தை ஏற்படுத்துகிறது. இதுவே நாள்பட்ட தூக்கமின்மைக்கு வழி வகுக்கிறது.

உடல் ரீதியான அறிகுறிகள்: சோம்னிஃபோபியாவால் பாதிக்கப்பட்டிருக்கும் மனிதர்களுக்கு நடுக்கம், தலை சுற்றல், இரைப்பை, குடல் அசௌகரியம், குமட்டல், வயிற்றுப்போக்கு, தலைவலி மற்றும் சோர்வு ஆகியவை ஏற்படும். தூக்கத்தைப் பற்றி அளவுக்கு அதிகமாகக் கவலைப்படுவதால் அவர்களது உடல் நலம் இன்னும் மோசம் அடையும்.

பகுத்தறிவற்ற எண்ணங்கள்: இவர்களுக்கு கனவுகளை பற்றிய பயமும் இருக்கும். தூங்கினால் ஒரு வேளை எழுந்திருக்க மாட்டோமா என்று நினைப்பார்கள் அல்லது தூக்கத்தில் சில வகையான கோளாறுகள் ஏற்படும் என்று அஞ்சி, தூக்கம் தொடர்பான ஆபத்துக்களை பற்றி தேவையில்லாமல் கவலைப்படுவார்கள்.

சோம்னிஃபோபியாவிற்கான காரணங்கள்:

அதிர்ச்சிகரமான அனுபவங்கள்: கடுமையான கனவுகள், தூக்கத்தில் நடக்கும் சம்பவங்கள் அல்லது தூக்க முடக்கம் போன்ற தூக்கம் தொடர்பான கடந்த கால எதிர்மறை அனுபவங்கள் இந்த பயத்தின் வளர்ச்சிக்கு ஒரு குறிப்பிடத்தக்க பங்களிப்பை அளிக்கும்.

கவலைக் கோளாறுகள்: முன்பே இருக்கும் கவலைக் கோளாறுகள் அல்லது பொதுவான பதற்றம் உள்ள நபர்கள், அதன் தொடர்ச்சியாக தூக்கத்தைப் பற்றிய அச்சத்தை வளர்த்துக் கொள்கிறார்கள்.

குடும்பக் காரணிகள்: தூக்கம் பற்றிய குடும்ப நம்பிக்கைகள் அல்லது தூக்கத்தைப் பற்றிய அச்சமூட்டும் கதைகள் ஒரு நபரின் உணர்வை பாதிக்கலாம். எனவே, இது பயத்திற்கு வழி வகுக்கிறது.

தூக்கக் கோளாறுகள்: தூக்கமின்மை, மயக்கம் அல்லது தூக்கத்தில் மூச்சு திணறல் போன்ற நிலைமைகள் தூக்கம் தொடர்பான பயத்தை அதிகப்படுத்துகின்றன. இதன் விளைவாக ஒரு தீய சுழற்சி ஏற்படுகிறது.

சிகிச்சை முறைகள்:

அறிவாற்றல் நடத்தை சிகிச்சை: இது பெரும்பாலும் அச்சங்களுக்கு மிகவும் பயனுள்ள சிகிச்சையாக கருதப்படுகிறது. நோயாளிகளுக்கு தூக்கத்தைப் பற்றிய பகுத்தறிவற்ற எண்ணங்களை அடையாளம் கண்டு அவற்றை ஆரோக்கியமான, எதார்த்தமான நம்பிக்கைகளாக மாற்றுகின்றன.

எக்ஸ்போஷர் தெரபி: தூக்கம் பற்றிய யோசனையை படிப்படியாகக் கட்டுப்படுத்தவும், தூக்கம் பற்றிய அச்சத்தை படிப்படியாக கட்டுப்படுத்தவும் ஓய்வெடுக்கும் நுட்பங்கள் மற்றும் நினைவாற்றல் நடைமுறைகளுடன் தொடங்குவதையும் இது ஊக்குவிக்கிறது.

மருந்து: பதற்றத்தின் அறிகுறிகளை நிர்வகிப்பதற்கும் தூக்கத்தை எளிதாக்குவதற்கும் மன அழுத்த எதிர்ப்பு மருந்துகள் அல்லது பதற்ற எதிர்ப்பு மருந்துகள் பரிந்துரைக்கப்படலாம். தளர்வு நுட்பங்கள், ஆழ்ந்த சுவாசம், தசைத் தளர்வு, தியானம் போன்ற முறைகள் பதற்றத்தைக் குறைக்க உதவுவதோடு தூக்கத்தினை நாட உதவுகின்றன.

தூக்கக் கல்வி: வழக்கமான தூக்க அட்டவணையை உருவாக்குதல், தூக்க சூழ்நிலையை உருவாக்குதல், படுக்கைக்கு முன் காஃபின் உள்ளடக்கிய திரவங்களைத் தவிர்த்தல், செல்போன், டி.வி, லேப்டாப் போன்ற டிஜிட்டல் திரைகளைப் பார்ப்பதை கட்டுப்படுத்துதல் போன்ற நல்ல தூக்க நடைமுறைகளைக் கற்றுக்கொள்வதும் செயல்படுத்துவதும் தூக்கம் தொடர்பான கவலையைக் குறைக்க உதவும்.