தாய்ப்பால் அதிகமாக சுரக்க என்ன சாப்பிட வேண்டும்? தாய்மார்கள் தெரிந்துகொள்ள வேண்டியவை!

இதற்கு அறிவியல் பூர்வமான ஆதாரம் உள்ளது. ஆனால், அது நாம் நினைப்பதைவிடச் சற்று வித்தியாசமானது.

பூண்டு உட்கொண்ட சுமார் இரண்டு மணி நேரத்தில் பாலில் பூண்டின் வாசனை அதிகமாக இருந்தது. இந்த மணம் குழந்தைகளுக்கு பிடிக்கும் வகையில் உள்ளது. எனவே பச்சிளம் குழந்தைகள் மார்பகத்தில் அதிக நேரம் இணைந்திருந்து, அதிக முறை உறிஞ்சினார்கள்.

எனவே, பூண்டு தாய்ப்பாலின் சுவை மற்றும் மணத்தை மாற்றி, குழந்தையின் உறிஞ்சும் தன்மையை மேம்படுத்துகிறது.

தாய்ப்பால் உற்பத்தி என்பது குழந்தையின் தேவைக்கேற்ப இயங்கும் இயற்கையான செயல்முறை.

குழந்தை மார்பகத்தை உறிஞ்சும்போது, மூளையில் இருந்து புரோலாக்டின் (Prolactin) மற்றும் ஆக்ஸிடோசின் (Oxytocin) என்ற ஹார்மோன்கள் சுரக்கின்றன. புரோலாக்டின் பால் உற்பத்திக்கும், ஆக்ஸிடோசின் பால் வெளியேறுவதற்கும் உதவுகின்றன.

குழந்தை அடிக்கடி பால் குடிக்கும்போதும், மார்பகத்தில் உள்ள பால் முழுமையாக வெளியேற்றப்படும்போதும், உடல் தொடர்ந்து பால் உற்பத்தி செய்யத் தூண்டப்படுகிறது. இதுவே தாய்ப்பால் சுரப்பின் அடிப்படை விதி.

சில உணவுகள் தாய்ப்பால் சுரப்பை அதிகரிக்க உதவுவதாகப் பாரம்பரியமாகக் கருதப்படுகின்றன. இவற்றில் சிலவற்றுக்கு ஆய்வுகள் இருந்தாலும், உறுதியான முடிவுகள் இன்னும் கிடைக்கவில்லை.

வெந்தயம்: தாய்ப்பால் சுரப்பை அதிகரிக்கப் பயன்படுத்தப்படும் பாரம்பரிய உணவு. ஆனால் இதன் பலன் அனைவருக்கும் ஒரே மாதிரியாக இருப்பதில்லை. சிலருக்கு வயிற்றுப்போக்கு, ஒவ்வாமை ஏற்படலாம்.

முருங்கைக் கீரை: இரும்புச்சத்து, கால்சியம், வைட்டமின்கள் நிறைந்த சத்தான உணவு. தாயின் ஊட்டச்சத்துக்கு உதவுகிறது. பால் சுரப்பை அதிகரிப்பதில் இதன் பங்கு குறித்து மேலும் ஆய்வுகள் தேவை.

ஓட்ஸ் மற்றும் சிறுதானியங்கள்: நார்ச்சத்து மற்றும் ஆற்றலை வழங்குகின்றன. தாயின் ஆரோக்கியமான உணவுப் பழக்கத்தில் இவற்றைச் சேர்த்துக்கொள்ளலாம்.

பூண்டு: பாலின் மணத்தை மாற்றி குழந்தையின் உறிஞ்சும் நடத்தையைப் பாதிக்கலாம். பால் உற்பத்தியை அதிகரிப்பது நிரூபிக்கப்படவில்லை.

சீரகம் மற்றும் சோம்பு: பாரம்பரியமாகப் பயன்படுத்தப்படும் உணவுகள். இவற்றின் மூலம் பால் சுரப்பு அதிகரிக்கும் என்பதற்கு போதுமான தரமான மருத்துவ ஆதாரங்கள் இல்லை.

பருப்பு வகைகள், பால், முட்டை, மீன், காய்கறிகள் மற்றும் பழங்கள்: தாயின் புரதம், தாதுக்கள், வைட்டமின்கள் மற்றும் கலோரி தேவைகளைப் பூர்த்தி செய்ய உதவுகின்றன.

இவற்றை அன்றாட உணவில் சேர்த்துக் கொள்வது நல்லது. குறிப்பிட்ட உணவை அதிக அளவில் சாப்பிடுவதால் மட்டும் பால் சுரப்பு அதிகரிக்கும் என்று எதிர்பார்க்கக் கூடாது.

தாய்ப்பால் சுரப்பை மேம்படுத்துவதில் உணவைவிட முக்கியமானது சரியான தாய்ப்பால் ஊட்டும் முறை.

குழந்தை விரும்பும் போதெல்லாம் பால் கொடுக்க வேண்டும்.

பிறந்த குழந்தைகளுக்கு பொதுவாக 24 மணி நேரத்தில் 8 முதல் 12 முறை பால் கொடுப்பது அவசியம்.

குழந்தை மார்பகத்தைச் சரியாகப் பற்றிப் பால் குடிக்கிறதா என்பதை உறுதிப்படுத்த வேண்டும்.

ஒரு மார்பகத்தில் பால் குடித்த பிறகு, தேவைப்பட்டால் மற்ற மார்பகத்தையும் கொடுக்க வேண்டும்.

குழந்தையிடமிருந்து பிரிந்திருக்க வேண்டிய சூழலில், பால் சுரப்பைப் பராமரிக்கத் தாய்ப்பாலை அவ்வப்போது வெளியேற்றிச் சேகரிக்க வேண்டும்.

தாய்ப்பால் ஊட்டும் காலத்தில் தாயின் உடலுக்கு கூடுதல் ஆற்றலும் ஊட்டச்சத்துகளும் தேவைப்படுகின்றன. எனவே, சீரான உணவு, போதிய ஓய்வு, தாகத்திற்கேற்ப தண்ணீர் அருந்துதல் ஆகியவை அவசியம்.

அதிக அளவு தண்ணீர் குடிப்பதால் மட்டும் பால் சுரப்பு அதிகரிக்காது. அதேபோல், உணவைக் குறைப்பதும், பட்டினி கிடப்பதும் தாயின் உடல்நலத்தைப் பாதிக்கலாம்.

குழந்தையின் அழுகையை மட்டும் வைத்து தாய்ப்பால் போதவில்லை என்று முடிவு செய்யக் கூடாது. குழந்தையின் எடை அதிகரிப்பு, சிறுநீர் கழிக்கும் எண்ணிக்கை, பால் குடித்த பிறகான திருப்தி ஆகியவற்றைக் கவனிக்க வேண்டும்.

ஐந்தாவது நாளுக்குப் பிறகு, பொதுவாக ஒரு நாளில் ஆறு அல்லது அதற்கு மேற்பட்ட முறை சிறுநீர் கழிப்பது போதுமான பால் கிடைப்பதற்கான நல்ல அறிகுறியாகும். எடை சரியாக அதிகரிக்கவில்லை என்றாலோ, குழந்தை சோர்வாக இருந்தாலோ, சிறுநீர் குறைந்தாலோ உடனடியாகக் குழந்தை நல மருத்துவரை அணுக வேண்டும்.

தாய்ப்பால் சுரப்பு குறைவாக இருப்பதாகத் தோன்றினால், முதலில் குழந்தையின் பால் குடிக்கும் முறை, தாயின் உடல்நிலை, ஹார்மோன் குறைபாடுகள் மற்றும் பிற காரணங்களை மதிப்பிட வேண்டும்.

வெந்தயம் போன்ற மூலிகை மருந்துகளையோ, பால் சுரப்பை அதிகரிக்கும் மருந்துகளையோ மருத்துவரின் ஆலோசனை பெற்று எடுத்துக் கொள்வது நல்லது.