HPV தடுப்பூசி: உங்கள் மகளைப் பாதுகாக்க எளிய வழி! இளம் வயதில் ஏன் அவசியம்?

இன்றைய வேகமான வாழ்க்கையில், வரும் முன் காப்பதே சிறந்தது. குறிப்பாக பெண்களின் ஆரோக்கியத்தைப் பாதுகாக்கும் விஷயத்தில் முன்னெச்சரிக்கை நடவடிக்கைகள் மிகவும் அவசியம். அதில் முக்கியமான ஒன்று HPV (Human Papillomavirus) தடுப்பூசி. இது கர்ப்பப்பை வாய்ப் புற்றுநோயைத் தடுக்க உதவுகிறது.

HPV என்பது ஒரு வைரஸ். பெரும்பாலானவர்களுக்கு வாழ்க்கையில் ஒருநாள் இந்த வைரஸ் தொற்று ஏற்பட வாய்ப்புள்ளது. பல சமயங்களில் இது பெரிய பிரச்னையை ஏற்படுத்தாமல் தானாகவே மறைந்து விடும். ஆனால், சில வகைகள் பெண்களில் கர்ப்பப்பை வாய்ப் புற்றுநோயை உருவாக்கும் அபாயத்தை அதிகரிக்கின்றன. இந்தியாவில் பெண்களுக்கு ஏற்படும் புற்றுநோய்களில் கர்ப்பப்பை புற்றுநோய் ஒரு முக்கியமான புற்றுநோயாக உள்ளது.

World Health Organization மற்றும் Indian Council of Medical Research போன்றவை 9 முதல் 14 வயதுக்குட்பட்ட சிறுமிகளுக்கு HPV தடுப்பூசி போட பரிந்துரைக்கின்றன. இந்த வயதில் உடலின் நோய் எதிர்ப்பு முறை மிகச் சிறப்பாக செயல்படும். அதனால் தடுப்பூசி அதிக பயனுள்ளதாக இருக்கும்.

மேலும், இந்த வயதில் பெரும்பாலும் HPV வைரஸ் தொற்று ஏற்படாத நிலையில் இருப்பார்கள். அதனால், வைரஸ் தாக்கத்திற்கு முன்பே பாதுகாப்பு பெறுவது மிகவும் உதவி புரியும்.

HPV தடுப்பூசி, புற்றுநோய் ஏற்படுத்தும் HPV வகைகளுக்கு எதிராக உடலில் நோய் எதிர்ப்பு சக்தியை உருவாக்குகிறது. இதன் மூலம், எதிர்காலத்தில் அந்த வைரஸ் தாக்கினாலும், அதை எதிர்த்து உடலால் போராட முடியும்.

இந்தியாவில் HPV தடுப்பூசி குறித்து விழிப்புணர்வு அதிகரித்து வருகிறது. அரசு மற்றும் சுகாதார அமைப்புகள், அரசு மருத்துவமனைகள் மற்றும் சுகாதார மையங்கள் வழியாக இந்தத் தடுப்பூசியை மக்களுக்கு கொண்டு சேர்க்க முயற்சி செய்து வருகின்றன. மேலும், U-WIN போன்ற டிஜிட்டல் தளங்கள் மூலம் தடுப்பூசி விவரங்கள் பதிவு செய்யப்பட்டு, கண்காணிப்பு மேம்படுத்தப்படுகிறது.

குறிப்பாக, தமிழ்நாட்டில் 9 முதல் 14 வயதுக்குட்பட்ட சிறுமிகளுக்கு கர்ப்பப்பை வாய்ப் புற்றுநோயைத் தடுக்கும் வகையில் இலவச HPV தடுப்பூசித் திட்டம் தொடங்கப்பட்டுள்ளது. 2026 ஆம் ஆண்டின் தொடக்கத்தில் தமிழக அரசால் இந்தத் திட்டம் கொண்டுவரப்பட்டுள்ளது.பெண் குழந்தைகளின் ஆரோக்கியத்தை உறுதி செய்வதற்காக, அரசு சுகாதார நிலையங்களில் இலவச ஒற்றை டோஸ் தடுப்பூசியாக இது செலுத்தப்படுகிறது.

HPV தடுப்பூசி உலகளவில் பல கோடி மக்களுக்கு செலுத்தப்பட்டு பாதுகாப்பானது என நிரூபிக்கப்பட்டுள்ளது. சிலருக்கு சிறிய பக்கவிளைவுகள், உதாரணமாக காய்ச்சல் அல்லது ஊசி போட்ட இடத்தில் வலி போன்றவை இருக்கலாம். ஆனால் இவை தற்காலிகமானவை.

HPV வைரஸ் பெண்களுக்கு மட்டும் அல்ல. ஆண்களுக்கும் இந்த வைரஸ் தாக்கம் ஏற்படலாம். அதனால் பல நாடுகளில் சிறுவர்களுக்கும் இந்தத் தடுப்பூசி பரிந்துரைக்கப்படுகிறது. இது வைரஸ் பரவலைக் கட்டுப்படுத்தவும் உதவுகிறது.

HPV தடுப்பூசி என்பது உங்கள் குழந்தையின் எதிர்காலத்தை பாதுகாக்கும் ஒரு முக்கியமான ஒன்று. சிறு வயதிலேயே இந்த தடுப்பூசியை எடுத்துக் கொள்வது, பெரிய பிரச்னைகளைத் தவிர்க்க உதவும். எனவே, உங்கள் வீட்டில் வளரிளம் பருவச் சிறுமிகள் இருந்தால், அருகிலுள்ள மருத்துவரை அணுகி HPV தடுப்பூசி குறித்து தெரிந்துகொள்ளுங்கள்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)