வெறும் தண்ணீரை வைத்து இரத்த அழுத்தத்தை கட்டுப்படுத்தலாம்: எப்படி தெரியுமா?

இன்றைய பரபரப்பான வாழ்க்கை முறையில் நோய்கள் வந்தபின் குணப்படுத்துவதை விட, அவை வராமல் தடுப்பதே புத்திசாலித்தனம். அந்த வகையில், உயர் இரத்த அழுத்தப் பிரச்சினை உள்ளவர்களுக்கு ஒரு சிறந்த இயற்கை மாற்றுச் சிகிச்சையாக 'நீர் மருத்துவம்' (Hydrotherapy) உருவெடுத்துள்ளது.

தண்ணீரை வெவ்வேறு வெப்பநிலைகளில் பயன்படுத்தி உடலின் ஆரோக்கியத்தை மேம்படுத்தும் முறைதான் நீர் மருத்துவம். ஆரம்பக் காலத்தில் இந்த முறை வெறும் உடல் சோர்வை நீக்கவும், தசை வலிகளைக் குணப்படுத்தவும் மட்டுமே பயன்படுத்தப்பட்டது. ஆனால், இன்றைய நவீன மருத்துவ உலகில், இது உயர் இரத்த அழுத்தத்தைக் கட்டுப்படுத்துவதற்கான ஒரு சிறந்த சிகிச்சையாக அங்கீகரிக்கப்பட்டுள்ளது.

இன்றைய அவசர உலகில், மன அழுத்தம் மற்றும் ஒரே இடத்தில் அமர்ந்து வேலை செய்யும் வாழ்க்கை முறையால் பலரும் உயர் இரத்த அழுத்தப் பிரச்சினையால் அவதிப்படுகிறார்கள். அவர்களுக்கு இந்த நீர் மருத்துவம் ஒரு வரப்பிரசாதம் என்றே கூறலாம்.

நீர் மருத்துவம் இரத்த அழுத்தத்தை எப்படிக் குறைக்கிறது? (Hydrotherapy For Blood Pressure)

1. இரத்த நாளங்கள் விரிவடைதல்:

ஒரு நபர் சுமார் 37°C முதல் 40°C வரையிலான இதமான வெந்நீரில் தன் உடலை நனைக்கும்போது, உடலின் வெப்பம் காரணமாக, அதுவரை சுருங்கியிருந்த இரத்த நாளங்கள் நன்றாகத் தளர்ந்து விரிவடைகின்றன.

இரத்த நாளங்கள் விரிவடையும் போது, அவற்றிற்குள் ஏற்படும் உராய்வும், இரத்த ஓட்டத்திற்கான தடையும் பெருமளவு குறைகிறது. இதனால் உடல் முழுவதும் இரத்தம் எவ்விதத் தடையுமின்றி சீராகப் பாய்கிறது. இது இதயத்தின் மீதான அதிகப்படியான வேலைச் சுமையைக் குறைத்து, இரத்த அழுத்தத்தைக் கட்டுக்குள் வைக்க பெரிதும் உதவுகிறது.

2. நரம்பு மண்டலம் அமைதியடைதல்:

இது உடலை அமைதிப்படுத்தும் 'பாராசிம்பதெடிக்' எனப்படும் நரம்புச் செயல்பாட்டைத் தூண்டுகிறது. அதே நேரத்தில், நமக்கு மன அழுத்தத்தையும் பதற்றத்தையும் உருவாக்கும் அட்ரினலின் மற்றும் கார்டிசோல் போன்ற ஹார்மோன்களைச் சுரக்கும் 'சிம்பதெடிக்' நரம்புச் செயல்பாட்டைக் குறைக்கிறது.

மன அழுத்தத்திற்கும் உயர் இரத்த அழுத்தத்திற்கும் மிக நெருங்கிய தொடர்பு இருப்பதால், நரம்பு மண்டலத்தை இப்படிச் சமநிலையில் வைத்திருப்பது இரத்த அழுத்த நோயாளிகளுக்கு மிகவும் அவசியமான ஒன்றாகும்.

3. சீரான இரத்த ஓட்டம்:

நாம் தண்ணீரில் மூழ்கி இருக்கும் போது, தண்ணீரின் இயற்கை அழுத்தம் நம் உடலின் மீது செயல்படுகிறது. இந்த அழுத்தமானது, நம் கை, கால்களில் உள்ள நரம்புகளில் இருக்கும் இரத்தம் மீண்டும் எவ்விதத் தொய்வும் இன்றி இதயத்திற்குச் சீராகத் திரும்புவதை எளிதாக்குகிறது.

உயர் இரத்த அழுத்தத்திற்கான எளிய நீர் மருத்துவ முறைகள்:

முழு உடல் மூழ்கும் சிகிச்சை: வாரத்திற்கு சில முறை, தகுந்த வெப்பநிலையில் உள்ள வெந்நீர்த் தொட்டியில் 20 முதல் 40 நிமிடங்கள் வரை உடல் மூழ்கும் படி அமர்ந்திருக்கலாம்.

வெந்நீர் பாதக் குளியல்: இது மிகவும் எளிய மற்றும் அனைவரும் வீட்டில் செய்யக்கூடிய முறை. ஒரு வாளியில் கணுக்காலுக்கு சற்று மேல் வரை இருக்கும்படி இதமான வெந்நீரை ஊற்றி, அதில் பாதங்களை 15 நிமிடங்கள் வரை நனைத்து வைக்க வேண்டும். இது உடலின் ஒட்டுமொத்தப் பதற்றத்தைக் குறைக்கும்.

மாற்று வெப்ப நீர் மருத்துவம்: இதில் வெந்நீர் மற்றும் குளிர்ந்த நீரை மாற்றி மாற்றி உடலுக்குப் பயன்படுத்துவார்கள். இதனால் இரத்த நாளங்கள் சுருங்கி விரியும் தன்மை அதிகரித்து, இரத்த ஓட்டம் சீராகும்.

வெந்நீர் ஒத்தடம்: தகுதிவாய்ந்த இயற்கை மருத்துவ நிபுணர்களின் மேற்பார்வையில், நோயாளிகளின் மேல் முதுகு மற்றும் தண்டுவடத்தில் வெந்நீர் ஒத்தடம் கொடுப்பதன் மூலமும் உடலை அமைதிப்படுத்தி, இரத்த அழுத்தத்தை சமநிலையில் வைக்க முடியும்.

நீர் மருத்துவம் என்பது பக்கவிளைவுகள் இல்லாத ஒரு சிறந்த சிகிச்சை முறை ஆகும். எனினும், கடுமையான உயர் இரத்த அழுத்தப் பிரச்சினை உள்ளவர்கள், இதனைத் தொடங்கும் முன் தங்களது மருத்துவரிடம் ஆலோசிப்பது நல்லது.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)