பெரியவர்களின் புகைப் பழக்கத்தால் குழந்தைகளுக்கு ஏற்படும் 8 ஆபத்துகள்!

குழந்தைகளின் சுவாச மண்டலமும், நோய் எதிர்ப்பு அமைப்பும் முழுவளர்ச்சியடையாதவை, வலிமை குறைந்தவை. வயது வந்தவர்களைக் காட்டிலும் குழந்தைகள் நிமிடத்திற்கு அதிக முறை சுவாசிப்பதாலும், உடல் எடைக்குரிய காற்றை அதிகம் உட்கொள்வதாலும் புகையிலைப் புகையின் நச்சுக்கள் அவர்கள்உடலில் மிக எளிதாக ஊடுருவுகின்றன.

புகைப்பிடித்த பிறகு காற்றில் கலந்த நச்சுக்கள் மறைந்துவிட்டாலும், நிக்கோட்டின் மற்றும் கார்சினோஜென்கள் (புற்றுநோய் காரணிகள்) வீட்டின் தரை, உடைகள், மேசைகள் மற்றும் திரைச்சீலைகளின் மேற்பரப்பில் தங்கிவிடுகின்றன. இந்த எச்சங்கள் உட்புறக் காற்றிலுள்ள மூலக்கூறுகளுடன் இணைந்து தொடர் நச்சுத் தன்மையை ஏற்படுத்துகின்றன.

கதவு, ஜன்னல் திறந்திருந்தாலும் அல்லது மின்விசிறி இயங்கினாலும் புகையின் நச்சுத் துகள்கள் முழுமையாக அகலாது. அவை சுவர்கள் மற்றும் பொருட்களின் மீது படிந்து, தரையில் ஊர்ந்து விளையாடும் குழந்தைகள் கைகளை வாயில் வைக்கும்போது அவர்களை நேரடியாகச் சென்றடைகின்றன.

புகையிலைப் புகையில் உள்ள 7,000-க்கும் மேற்பட்ட வேதிப்பொருட்கள் நுரையீரல் காற்று நுண்ணறைகளின் இயல்பான வளர்ச்சியைத் தடை செய்கின்றன. மேலும், நுரையீரலின் இயற்கையான தூய்மைப்படுத்தும் இயக்கமான 'மியூகோசிலியரிகிளியரன்ஸ்' (Mucociliary clearance) பாதிக்கப்படுவதால், சளி மற்றும் நச்சுக்கள் வெளியேறுவது தடைபட்டு மூச்சுக்குழாய் அழற்சி மற்றும் நிமோனியா ஏற்படுகிறது.

ஆஸ்துமா உள்ள குழந்தைகளில் இது கடுமையான மூச்சுக்குழாய்ச் சுருக்கத்தை (Bronchospasm) ஏற்படுத்தி ஆபத்தான மூச்சுத் திணறலை உண்டாக்கும். ஆஸ்துமா இல்லாத குழந்தைகளுக்கும் இது நாள்பட்ட காற்றுப்பாதை அழற்சியைத் தூண்டி, எதிர்காலத்தில் ஆஸ்துமா உருவாகும் வாய்ப்பை அதிகரிக்கிறது.

புகையிலைப் புகை நடுக்காதுப் பாதையில் கடுமையான வீக்கத்தை ஏற்படுத்துகிறது. இதனால் குழந்தைகளுக்கு நடுக்காதுத் தொற்று (Otitis Media) மற்றும் காதில் திரவம் தேங்குதல் போன்ற சிக்கல்கள் உண்டாகி, காதுவலி மற்றும் கேட்கும் திறன் பாதிப்புக்குள்ளாகிறது.

நிகோட்டின் போன்ற தீவிர நச்சுகள் கைக்குழந்தைகளின் மூளைத் தண்டுவடத்தின் (Brainstem) சுவாசக் கட்டுப்பாட்டு மையங்களை நேரடியாகப் பாதிக்கின்றன. இதனால் தூக்கத்தில் ஏற்படும் மூச்சுத் தடை காரணமாக திடீர் கைக்குழந்தை இறப்பு எனும் (Sudden Infant Death Syndrome - SIDS) அபாயம் பலமடங்கு அதிகரிக்கிறது.

'குழந்தையின் அருகில் புகைக்காமல் இருப்பது' அல்லது 'வேறு அறைக்குச் சென்று புகைப்பது' என்பது மட்டும் முழுமையான தீர்வு அல்ல.

வீடுகளிலும் வாகனங்களிலும் எவரும் எந்தச் சூழலிலும் புகைக்கக் கூடாது என்ற முழுமையான புகையற்ற சூழலை உருவாக்குவதே குழந்தைகளின் பாதுகாப்பான சுவாச வளர்ச்சிக்குரிய ஒரே அறிவியல் பூர்வமான வழியாகும்.