காரணமே இல்லாமல் உள்ளங்கையில் வியர்க்கிறதா? உங்க உடம்பு சொல்லும் ரகசியம் இதுதான்!

சிலருக்கு எப்போது பார்த்தாலும் உள்ளங்கையில் வியர்த்துக்கொண்டே இருக்கும். ஆபீஸில் யாருக்காவது கை கொடுக்க வேண்டும் என்றாலோ அல்லது மொபைல் போனை பயன்படுத்த வேண்டும் என்றாலோ கூட மிகவும் சங்கடமாக உணர்வார்கள். வெயில் காலத்திலோ அல்லது நாம் மிகவும் பதற்றமாக இருக்கும்போதோ வியர்ப்பது ரொம்பவே சாதாரணமான ஒரு விஷயம்தான். 

ஆனால் எந்த ஒரு காரணமும் இல்லாமல், ஏசியில் உட்கார்ந்திருக்கும் போது கூட கைகளில் வியர்த்தால் அதை நாம் சாதாரணமாக எடுத்துக்கொள்ளக் கூடாது. மருத்துவ உலகில் இதை ஹைப்பர்ஹைட்ரோசிஸ் என்று சொல்வார்கள். 

வியர்வைக்கு பின்னால் இருக்கும் முக்கிய காரணங்கள்!

1. அதீத வியர்வை (Primary Hyperhidrosis):

பெரும்பாலானவர்களுக்கு உள்ளங்கை வியர்ப்பதற்கு இதுதான் முக்கிய காரணம். இவர்களின் உடலில் உள்ள வியர்வை சுரப்பிகள் எந்த ஒரு காரணமும் இல்லாமல் எப்போதுமே ஓவர்-ஆக்டிவாக வேலை செய்யும். இது பலருக்கு பரம்பரையாகவே வரக்கூடிய ஒரு பிரச்சனைதான். ஆனால் இதில் ஒரு சுவாரஸ்யமான விஷயம் என்னவென்றால், இவர்கள் தூங்கும்போது மட்டும் கைகளில் சுத்தமாக வியர்க்கவே வியர்க்காது.

2. ஸ்ட்ரெஸ், மன அழுத்தம்: 

நமது உள்ளங்கையில் தான் அதிக அளவிலான வியர்வை சுரப்பிகள் இருக்கின்றன. நாம் அதிக வேலைப்பளு காரணமாக டென்ஷனாக இருந்தாலோ அல்லது பெரிய கூட்டத்தின் முன் பேச பயந்தாலோ, நமது மூளை உடனடியாக ஒருவிதமான அவசர நிலை ஹார்மோன்களை வெளியிடும். அந்த ஸ்ட்ரெஸ் ஹார்மோன்கள் நேராகச் சென்று உள்ளங்கை மற்றும் உள்ளங்கால்களில் உள்ள சுரப்பிகளைத் தூண்டிவிட்டு பயங்கரமாக வியர்க்கச் செய்துவிடும்.

3. தைராய்டு, சர்க்கரை அளவு: 

நமது உடலில் தைராய்டு அதிகமாக சுரக்கும்போது ஒட்டுமொத்த உடலின் மெட்டபாலிசமும் ராக்கெட் வேகத்தில் செயல்படத் தொடங்கும். இதனால் உடல் எடை சட்டெனக் குறைவது, படபடப்பு ஆகியவற்றுடன் சேர்த்து கைகளில் அதீத வியர்வையும் ஏற்படும். அதேபோல, ரத்தத்தில் சர்க்கரையின் அளவு திடீரெனக் குறையும்போதும், லேசான மயக்கத்துடன் கைகளில் நடுக்கமும் வியர்வையும் உண்டாகும்.

4. ஹார்மோன் மாற்றம்: 

பருவமடையும் வயது, கர்ப்ப காலம் அல்லது மெனோபாஸ் போன்ற நேரங்களில் உடலில் ஏற்படும் ஹார்மோன் மாற்றங்களாலும் சிலருக்கு கைகளில் அதிகமாக வியர்க்கும். இது தவிர, மன அழுத்தத்திற்காக நாம் எடுத்துக்கொள்ளும் சில குறிப்பிட்ட மாத்திரைகளின் பக்க விளைவாகக் கூட இந்த உள்ளங்கை வியர்வை வர அதிக வாய்ப்புகள் உள்ளன.

கைகளில் வியர்ப்பது பெரிய உயிராபத்து கிடையாது என்றாலும், வியர்வையோடு சேர்த்து நெஞ்சு வலி, மூச்சுத் திணறல் அல்லது திடீர் காய்ச்சல் வந்தால் கொஞ்சமும் தாமதிக்காமல் மருத்துவரைச் சந்திப்பது நல்லது.

இந்த உள்ளங்கை வியர்வையைக் கட்டுப்படுத்த எளிய வழிகள் நிறைய உள்ளன. கைகளை எப்போதுமே சுத்தமாகத் துடைத்து உலர்வாக வைத்துக்கொள்வது, அதிக காஃபின் உள்ள காபி குடிப்பதைத் தவிர்ப்பது போன்றவை நல்ல பலனைக் கொடுக்கும். ரொம்பவும் அதிகமாக இருந்தால் மருத்துவரின் ஆலோசனையோடு பிரத்யேக லோஷன்கள் பயன்படுத்தலாம்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)