இதய ஆரோக்கியத்தை காக்கும் அஞ்சறைப் பெட்டி சீக்ரெட்!

இதய நோய் வராமல் ஆரோக்கியமாக வாழ்வதற்கு நாம் எடுத்துக் கொள்ளும் உணவுகளில் கவனம் மிகவும் அவசியம். பதப்படுத்தப்பட்ட உணவுகளைத் தவிர்த்து ஆரோக்கியமான உணவு எடுத்துக் கொள்வதும், உடற்பயிற்சிகள் செய்வதும், உயர் ரத்த அழுத்தம் மற்றும் கொலஸ்ட்ரால் அளவுகளை கட்டுக்குள் வைப்பது போன்றவையும் அவசியம். மேலும் போதுமான அளவு தூக்கம் மற்றும் மன அழுத்தத்தை குறைப்பதும் இதய ஆரோக்கியத்திற்கு முக்கியமாகும்.

பூண்டு இதய ஆரோக்கியத்தை மேம்படுத்துகிறது. ரத்த அழுத்தத்தை கட்டுப்படுத்துகிறது. கொலஸ்ட்ராலைக் குறைக்கிறது மற்றும் தமனிகளில் பிளேக் உருவாவதைத் தடுக்கிறது. இது அழற்சி எதிர்ப்பு பண்புகளைக் கொண்டுள்ளது. ரத்த நாளங்களை விரிவுபடுத்துவதன் மூலம் இதயத்தை பாதுகாக்கிறது. பூண்டின் 'அல்லிசின்' எனப்படும் கலவை இதய நன்மைகளுக்கு முக்கிய காரணமாகும். பச்சை பூண்டை தினமும் சாப்பிடுவது நல்லது. பூண்டுடன் தேன் சேர்த்து சாப்பிடுவது இதய ஆரோக்கியத்திற்கு நன்மை தரும்.

இஞ்சி ரத்தத்தில் உள்ள கொழுப்பின் அளவைக் குறைத்து இதய ஆரோக்கியத்தை பாதுகாக்கிறது. ரத்த அழுத்தத்தை கட்டுப்படுத்தவும், ரத்த ஓட்டத்தை மேம்படுத்தவும் உதவுகிறது. இதில் உள்ள அழற்சி எதிர்ப்பு பண்புகள் இதய ஆரோக்கியத்திற்கு நன்மை தரும். ரத்த உறைவைத் தடுப்பதுடன், ரத்தக் கட்டிகளை தடுக்கும் பண்புகளும் கொண்டுள்ளது.

மிளகுக்கு 'கருப்பு தங்கம்' என்றொரு பெயர் உண்டு. எண்ணற்ற சத்துக்களைக் கொண்ட மிளகில் 'பைப்பரின்'(Pipirine) என்ற சத்தே மிளகின் வாசனைக்குக் காரணம். மிளகு நச்சு நீக்கும் தன்மையைக் கொண்டுள்ளது. இது கெட்ட கொழுப்பான LDLஐக் குறைக்கவும், உயர் ரத்த அழுத்தத்தை தடுக்கவும் உதவுகிறது. மிளகில் உள்ள அழற்சி எதிர்ப்பு பண்புகள் இதய நோய்களுக்கு எதிராக பாதுகாக்க உதவும் என்று கண்டறியப்பட்டுள்ளது.

மஞ்சள் எல்.டி.எல் என்ற கெட்ட கொழுப்பைக் குறைக்கவும், எச்.டி.எல் என்ற நல்ல கொழுப்பை அதிகரிக்கவும் உதவுகின்றது. இது ஒரு சக்தி வாய்ந்த ஆன்ட்டி ஆக்சிடென்ட் ஆகும். இது உடலில் தீங்கு விளைவிக்கும் ஃப்ரீ ரேடிக்கல்களின் விளைவுகளை நடுநிலையாக்கி இதய ஆரோக்கியத்தை பாதுகாக்கிறது. மஞ்சளில் உள்ள குர்குமின் ரத்தக் குழாய்களின் உள் புறணியான எண்டோதெலியத்தின் செயல்பாட்டை மேம்படுத்துகிறது. ரத்தக் கட்டிகள் உருவாவதை குறைக்கிறது மற்றும் ரத்தக் குழாய்களின் ஆரோக்கியத்தை பராமரிக்கிறது.

தனியா (கொத்தமல்லி விதை) இதய ஆரோக்கியத்திற்கு மிகவும் நல்லது. ஏனெனில் இதில் மெக்னீசியம், கால்சியம், பொட்டாசியம், விட்டமின் ஏ, பி, சி மற்றும் கே போன்ற பல ஊட்டச்சத்துக்களைக் கொண்டுள்ளது. இந்த ஊட்டச்சத்துக்கள் இதய ஆரோக்கியத்தை மேம்படுத்த உதவுகின்றன.

லவங்கப்பட்டை அதன் ஆன்ட்டி ஆக்சிடென்ட்கள் மற்றும் பிற நன்மை பயக்கும் கலவைகள் காரணமாக இதய ஆரோக்கியத்தை மேம்படுத்த உதவுகிறது. இது ரத்த சர்க்கரை அளவைக் கட்டுப்படுத்தவும், இதய நோய்க்கான அபாயத்தைக் குறைக்கவும், அழற்சியை குறைக்கவும் உதவுகிறது. சில ஆராய்ச்சிகள் லவங்கப்பட்டை பெருந்தமனி தடிப்புத் தோலழற்சியிலிருந்து இதயத்தை பாதுகாக்கும் என்பதையும் தெரிவிக்கின்றன.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)